Pisalema ya 115

₁We HOSI, ku dzunisiwa a hi swa hina,

hakunene a hi swa hina, kambe i swa wena ntsena,

hikuva u ni rirhandzu, wa tshembeka.

₂Vamatiko va ha vulela yini va ku:

“Xana Xikwembu xa vona xi kwihi ke?”

₃Xikwembu xa hina xi le matilweni,

xi tirha hi ku rhandza;

₄kasi swikwembu swa vona swa swifaniso swi endle hi vanhu,

i nsuku ni silivhere ntsena.

₅Milomo swi na yona, kambe a swi vulavuli,

swi ni mahlo, kambe a swi voni.

₆Swi ni tindleve, kambe a swi twi,

tinhompfu swi na tona, kambe a swi nun'hweti.

₇Swi ni mavoko, kambe a swi khomi nchumu,

milenge swi na yona, kambe a swi famba-fambi;

minkolo ya swona a yi humesi mpfumawulo.

₈Lava va swi vumbaka ni hinkwavo lava va swi tshembaka,

a va fane na swona.

₉N'wina Vaisraele, tshembani HOSI Xikwembu,

hi xona xitlhangu ni mupfuni wa n'wina.

₁₀N'wina va ka Aroni, tshembani HOSI Xikwembu,

hi xona xitlhangu ni mupfuni wa n'wina.

₁₁N'wina mi chavaka HOSI Xikwembu, tshembani xona,

hi xona xitlhangu ni mupfuni wa n'wina.

₁₂HOSI Xikwembu a xi hi rivalanga,

xi ta hi katekisa,

xi ta katekisa Vaisraele,

xi katekisa ni va ka Aroni.

₁₃Lava va xi chavaka, lavakulu ni lavatsongo,

xi ta va katekisa.

₁₄HOSI Xikwembu a xi mi andzise,

n'wina ni vana va n'wina!

₁₅Xona lexi endleke tilo ni misava,

a xi ve xona xi mi katekisaka!

₁₆Matilo i ya HOSI Xikwembu xi ri xoxe,

kasi vanhu xi va nyikile misava.

₁₇Lava feke, va nga hinkwavo lava nga rhelelela exivandleni xa vafi,

va nga ka va nga dzunisi HOSI Xikwembu;

₁₈kambe hina hi ta xi dzunisa

ku sukela namuntlha ni minkarhi hinkwayo.

Dzunisani HOSI!