Pisalema ya 11

₁Khokholo ra mina ri le ka HOSI Xikwembu,

kutani xana mi ndzi byelela yini, mi ku:

“Haha ku fana ni xinyanyana, u ya tumbela etintshaveni!

₂Languta, lavo homboloka va konga vurha,

va vekerile miseve ya vona etingotini,

ku copa exinyamini, va tlhava vanhu va timbilu leti tengeke.

₃Xana loko masungulo ma gubiwile,

munhu wo lulama a nga endla yini xana?”

₄HOSI yi le ndlwini ya yona leyo hlawuleka,

xitshamu xa yona xa vuhosi xi le matilweni.

Mahlo ya yona ma languta vanhu,

hi ku copeta ka tihlo, yi va kambela.

₅HOSI yi kambela lavo lulama ni lavo homboloka;

lava tsakelaka mintirho ya tihanyi yi va nyenya ngopfu.

₆Lavo homboloka, yi va nisela mpfundze ni xivavula,

mpandzwa wa vona i moya lowu hisaka.

₇Kambe HOSI yi rhandza mintirho leyo lulama, hikuva yona yi lulamile;

lava tengeke va ta vona mombo wa yona.