Pisalema ya 106

₁Dzunisani HOSI.

Tlangelani HOSI, hikuva yi ni vunene,

rirhandzu ra yona hi leri nga heriki.

₂Xana i mani la nga hlamuselaka mintirho ya yona leyikulu xana?

La nga twarisaka ku dzuneka ka yona hinkwako, a nga va mani xana?

₃Ku katekile lava hlayisaka nawu wa yona,

lava endlaka leswi lulameke minkarhi hinkwayo.

₄We HOSI, ndzi anakanye loko u ri karhi u pfuna vanhu va wena,

loko u va kutsula, u nga ndzi siyi ehandle,

₅leswaku ndzi ta kuma minkateko ya lava u nga tihlawulela vona,

ndzi tsaka, ndzi yimbelela swin'we ni vanhu va wena va xiviri.

₆Hi dyohile kukota vatata wa hina,

hi onhile, hi endlile leswo biha.

₇Loko vatata wa hina va ri le Egipta,

a va twisisanga mintirho leyo hlamarisa ya Xikwembu,

a va tsundzukanga vukulu bya rirhandzu ra xona,

kambe va tiarisile loko va ri kusuhi ni lwandle, rona Lwandle-ro-Tshwuka.

₈Hambiswiritano xi va ponisile hikwalaho ka vito ra xona,

leswaku xi twarisa matimba ya xona lamakulu.

₉Xi tshinyile Lwandle-ro-Tshwuka, kutani ri phya,

xi tsemakanyisa Vaisraele exikarhi ka swidziva onge hi loko va ri emananga.

₁₀Xi va lamulerile emavokweni ya valala va vona,

xi va kutsula ematimbeni ya vona,

₁₁kutani valala lava hinkwavo va dyiwa hi mati,

ku ri hava na un'we loyi a ponaka.

₁₂Kavaloko Vaisraele va tshemba marito ya xona,

va yimbelela risimu va xi dzunisa.

₁₃Kambe a va hlwelanga ku rivala mintirho ya xona,

a va yimelanga ku vona ku hetiseka ka makungu ya xona.

₁₄Loko va ri emananga, va ngheniwile hi ku navela ko biha,

va ringa Xikwembu ematikweni lawa ya ndlala.

₁₅Xona xi va nyikile swakudya leswi va swi kombeleke,

kambe xi tlhele xi va ba hi ntungu lowo chavisa.

₁₆Loko va ri emixaxeni, va vondzokile Muxe,

va vondzoka na Aroni, muhlawuriwa wa HOSI Xikwembu,

₁₇kutani misava yi pfuleka yi mita Dotani,

yi khubumeta Abiramu ni va ka vona;

₁₈naswona ku humelela ndzilo exikarhi ka vanghana va vona,

wu herisa vanhu lava vo homboloka.

₁₉Vaisraele va tiendlele rhole le Horebe,

kutani va nkhinsamela xifaniso lexi vumbiweke lexi;

₂₀va tshika Xikwembu xa vona xo dzuneka,

va gandzela xifaniso xa xifuwo xo dya byanyi lexi va xi vumbeke.

₂₁Va rivarile Xikwembu lexi xi va poniseke,

xona lexi endleke swilo leswikulu le Egipta,

₂₂va rivala mintirho ya xona leyo hlamarisa etikweni ra va ka Hamu,

ni leswo chavisa leswi xi swi endleke kusuhi ni Lwandle-ro-Tshwuka.

₂₃Hikokwalaho, Xikwembu xi bohile ku va herisa,

kambe Muxe muhlawuriwa wa xona a yima exikarhi ka xona na Vaisraele,

a va lamulela evukarini bya xona lebyo chavisa.

₂₄Va nyenyile tiko ro saseka ngopfu,

va nga pfumeli leswi Xikwembu xi va tshembiseke swona,

₂₅va n'unun'uta va ha ri emixaxeni ya vona,

va ala ku yingisa rito ra HOSI Xikwembu;

₂₆hiloko xi tlakusa voko, xi hlambanya,

xi ku xi ta va wisa le mananga,

₂₇xi nyiketa ni vana va vona emavokweni ya vanhu vambe,

va hangalasiwa ematikweni.

₂₈Vaisraele va namarherile xikwembu ximbe lexi va nge i Baala-Peyori,

va dya swa magandzelo lama humeseriweke vafi;

₂₉va hlundzukisa Xikwembu hi swiendlo swa vona,

kutani ku humelela ntungu exikarhi ka vona.

₃₀Hiloko Finiyasi a suka a yima a va tshinya,

kutani ntungu wu hela.

₃₁Hikokwalaho Xikwembu xi n'wi hlayile la lulameke,

kutani ú ta vuriwa sweswo hilaha ku nga heriki.

₃₂Vaisraele va hlundzukisile Xikwembu eswihlobyeni swa Meriba,

kutani Muxe a wela hi khombo hikwalaho ka vona,

₃₃a vulavula swin'wana a nga ehleketanga,

hikuva a va n'wi khunguvanyisile.

₃₄Va tlurile xileriso xa HOSI Xikwembu

hi ku ka va nga herisanga vanhu va matiko mambe,

₃₅kambe va tihlanganisile na vona,

va tekelela ni mikhuva ya vona,

₃₆va gandzela swikwembu swa hava swa vamatiko,

kutani swona swi hundzuka ntlhamu eka vona,

₃₇va ko va dlaya vana va vona va xinuna ni va xisati,

va humesa magandzelo ha vona va humesela swikwembu leswi swo biha.

₃₈Va halatile ngati leyi nga riki na nandzu

ya vana va vona va xinuna ni va xisati,

va humesa ha yona magandzelo va nyika swikwembu swa Vakanana,

va nyamisisa sweswo tiko ra vona.

₃₉Na vona vinyi va tinyamisile hi swiendlo swa vona,

va nga ha tshembeki eka Xikwembu.

₄₀Kutani vukari bya HOSI Xikwembu byi pfurhela vanhu va xona va xiviri,

xi nga ha lavi ku twa nchumu hi vona,

₄₁kutani xi va nyiketa emavokweni ya vamatiko,

leswaku va fumiwa hi lava va va vengaka.

₄₂Vaisraele va xanisiwile ngopfu hi valala va vona,

va hundzuka mahlonga ya vona.

₄₃Minkarhi leyo tala, Xikwembu xi va lamulerile,

kambe vona a va tshamela ku tiarisa,

kutani va tsongahatiwa hikwalaho ka vudyoho bya vona.

₄₄Hambiswiritano, Xikwembu xi va twerile vusiwana eku xanisekeni ka vona,

kutani xi yingisa swirilo swa vona.

₄₅Xi tsundzukile ntwanano wa xona na vona,

xi va tsetselela hi mhaka ya rirhandzu ra xona lerikulu.

₄₆Xi endlile leswaku hinkwavo lava yiseke Vaisraele evukhumbini,

va sungula ku va twela vusiwana.

₄₇We HOSI Xikwembu xa hina, hi ponise,

u hi hlengeleta hi huma exikarhi ka vamatiko,

kutani hi ta tlangela vito ra wena lero hlawuleka,

hi tsaka hi ri karhi hi ku dzunisa.

₄₈A ku nkhensiwe HOSI Xikwembu xa Israele,

sweswi ni hilaha ku nga heriki.

Vanhu hinkwavo a va vule va ku: “Amen!”

Dzunisani HOSI!