Pisalema ya 104

₁Ndzi lava ku nkhensa HOSI ndzi vuyelela!

U nkulukumba swinene, wena HOSI Xikwembu xanga!

U ambarile ku dzuneka ni vukosi.

₂Ku vonakala i xifunengelo xa wena;

u vambile matilo ku fana ni tende.

₃U tiakerile vutshamo exibakabakeni xa le tilweni,

u khandziya mapapa onge i golonyi,

u ya hala ni hala etimpapeni ta moya;

₄timheho u ti endla tintsumi ta wena,

ndzilo wa rihati wu hundzuka nandza wa wena.

₅U tiyisile misava emasungulweni ya yona,

yi nga ka yi nga tsekatseki ni siku ni rin'we.

₆Swidziva a swi funengetile misava ku fana ni nkumba,

mati a ma khubumetile tintshava.

₇Kambe loko u swi tshinyile, swi hangalakile,

swi tsutsumile loko swi twa ku dzindza ka rito ra wena,

₈tintshava ti sala erivaleni loko swona swi rhelela swi ya eminkoveni,

etindhawini ta swona leti u ti hlawuleke.

₉Kutani u bele mati lawa emindzilekana leyi ma nga ta ka ma nga yi tluli;

a ma nga ha tlheli ma funengeta misava.

₁₀Hi wena u boxeke minseledyana eminkoveni,

kutani mati ya kona ma khuluka exikarhi ka tintshava.

₁₁Swiharhi hinkwaswo swa nhova swi nwa kona,

na tona timangwa ti timula kona torha ra tona,

₁₂Emirhini leyi milaka kusuhi ni milambu,

tinyanyana ti aka swisaka ti ri karhi ti yimbelela emarhavini.

₁₃U cheleta tintshava hi timpfula u ri ematilweni,

misava yi kolwa hi leswi u yi endlelaka swona.

₁₄Hi wena u miriselaka swiharhi ebyanyi,

vanhu u va nyika swimilana leswaku va swi byala,

va tihumesela swakudya emasin'wini,

₁₅yi nga vhinyo leyi tsakisaka timbilu ta vona,

ni mafurha ya ku tola exikandzeni,

ni vuswa lebyi tiyisaka miri wa vona.

₁₆Mirhi leyikulu ya tikedari leyi u yi byaleke eLebanoni, we HOSI,

yi tshama yi ri karhi yi cheletiwa.

₁₇Tinyanyana ti aka swisaka swa tona eka yona,

magumba ma phatsama ehenhla ka yona.

₁₈Tintshava leto leha i kaya ka mbavala,

mbila yi tumbela emakocokocweni ya kona.

₁₉We HOSI, hi wena u endleke n'weti leswaku wu tsema tinguva,

u endle ni dyambu leri tivaka nkarhi wa rona wo pela.

₂₀U endla vusiku, ku va ni munyama,

swiharhi hinkwaswo swi huma swi tifamba-fambela.

₂₁Swinghalana swa bonga, swi lava nyama,

swi langutela wena ku swi phamela.

₂₂Loko ri xa, swa tlhela,

swi ya etlela emabakweni ya swona,

₂₃kutani munhu yena a huma ndlwini a ya entirhweni,

a tirha ku kondza dyambu ri pela.

₂₄We HOSI Xikwembu, mintirho ya wena a hi ku tala ka yona,

hinkwayo u yi endlile hi vutlhari,

misava yi tele hi leswi u swi vumbeke.

₂₅Ku ni malwandle lamakulu yo anama swinene;

swivumbiwa leswikulu ni leswitsongo swa ntsandza-vahlayi,

swi tele eka wona.

₂₆Tingalava ti rhendzeleka eka wona;

na yona Levhiyatani nyoka leyikulu, u yi vumbele ku tihuhela kona.

₂₇Swivumbiwa leswi hinkwaswo swi languta eka wena

leswaku u swi phamela hi nkarhi lowu faneleke.

₂₈Loko u swi haxa swakudya, swa rholela;

u pfula xandla xa wena, kutani swi dya swi xurha.

₂₉Loko u swi fularhela, swi hela matimba;

ni loko u swi tekela moya lowu swi wu hefemulaka, swa fa swi tlhelela entshurini.

₃₀Kambe loko u tlhela u swi huhutela moya, swi tumbuluka hi vuntshwa,

misava u yi nyika xivumbeko lexintshwa.

₃₁Ku dzuneka ka HOSI Xikwembu a ku ve kona hilaha ku nga heriki,

a xi tsakisiwe hi mintirho ya xona.

₃₂Loko xi languta misava, ya rhurhumela,

tintshava ti mbuluka musi loko xi ti khumba.

₃₃Vutomi bya mina hinkwabyo, ndzi ta yimbelela ndzi tlangela HOSI,

ndzi ta dzunisa Xikwembu xa mina loko ndza ha hanya.

₃₄Risimu leri ra mina a ri tsakise HOSI,

hikuva ndzi titsakela eka yona.

₃₅Vadyohi a va herisiwe laha misaveni,

lavo homboloka a va nyamalale!

Mina ndzi lava ku nkhensa HOSI ndzi vuyelela!

Dzunisani HOSI!