Pisalema ya 102

₁We HOSI, amukela xikhongelo xa mina,

u ndzi yingisa loko ndzi rila ka wena.

₂Loko ndzi ri emaxangwini,

u nga tshuki u ndzi fularhela.

Ndzi rhiyele ndleve u hatla u ndzi hlamula,

loko ndzi huwelela eka wena.

₃Masiku ya mina ya ku hanya ma haha kukota musi,

miri wa mina wu hisa tanihi makala exitikweni.

₄Ndzi titwa ndzi omile kukota byanyi lebyi tsemiweke,

ndzi rivala ni ku dya vuswa byinene.

₅Eku konyeni ka mina lokukulu,

ndzi lo sala marhambu ntsena.

₆Ndzi fana ni nkorho wa le mananga

kumbe xikhovha emarhumbini;

₇a ndza ha khomi hi vurhongo,

onge ndzo va nyanyana leyi tshamaka yi ri yoxe exihlungwanini.

₈Valala va mina va le ku ndzi sandzeni masiku hinkwawo;

loko va rhukana, va hlambanya hi vito ra mina.

₉Ndzi funya ritshuri ematshan'wini ya ku dya vuswa,

swakunwa swa mina swi pfangene ni mihloti,

₁₀hikuva eku hlundzukeni ka wena loku chavisaka,

u ndzi tekile u ndzi tlatlalata ehansi.

₁₁Masiku ya mina ma nyamalala onge i ndzhuti nimadyambu,

ndzi fana ni byanyi lebyi vunaka.

₁₂Kambe wena we HOSI, u fuma hilaha ku nga heriki,

vanhu va ta ku tsundzuka minkarhi hinkwayo.

₁₃U ta suka u yima u tsetselela muti wa Siyoni,

hikuva hi wona nkarhi wa ku wu twela vusiwana,

nkarhi lowu vekiweke hakunene wu fikile.

₁₄Hina malandza ya wena, hi rhandza ni maribye ya muti wolowo,

leswi wu hundzukeke rhumbi, hi twa ku vava lokukulu.

₁₅Vanhu va matiko hinkwawo va ta chava vito ra HOSI,

tihosi hinkwato ta misava ti ta xixima ku dzuneka ka yona,

₁₆hikuva yi ta aka muti wa Siyoni hi vuntshwa,

yi ta tikomba eku kwetsimeni ka yona;

₁₇yi ta yingisa xikhongelo xa lava tshikeleriwaka,

ku khongela ka vona a yi nga ku hunisi.

₁₈Mhaka leyi, a yi tsaleriwe vanhu lava va ha taka,

leswaku loko va ta va va tumbulukile, va ta tiva ku dzunisa HOSI Xikwembu:

₁₉Xi langutile ehansi xi ri exivandleni xa xona lexo hlawuleka,

xi vonile misava xi ri ematilweni,

₂₀kutani xi twile ku konya ka lava bohiweke;

lava a va avanyiseriwile rifu, xi va kutsurile.

₂₁Hikokwalaho vito ra xona ri ta twarisiwa eSiyoni,

va ta ri dzunisa emutini wa Yerusalema,

₂₂loko vanhu va matiko ni tihosi ta vona

va ta va va hlengeletanile kona ku xi gandzela.

₂₃Xikwembu xi ndzi tshovile matimba ndzi nga si dyuhala,

xi hungutile masiku ya mina ya ku hanya.

₂₄Hikokwalaho ndzi te ka xona: “Xikwembu xanga, we loyi malembe ya yena ma nga riki na ku hela,

u nga ndzi susi emisaveni ndza ha ri lontshwa!”

₂₅We HOSI, i khale u vekile masungulo ya misava,

matilo i ntirho wa mavoko ya wena.

₂₆Swilo leswi swi ta hela,

kambe wena u ta va kona hilaha ku nga heriki.

Hinkwaswo swi ta hlakala kukota swiambalo,

u ta swi cukumeta ku fana ni switlakati, kutani swi ta nyamalala.

₂₇Kambe wena, wo va wena a wu hundzuki,

malembe ya wena a ma na ku hela.

₂₈Hi malandza ya wena, kutani vana va hina va ta tshamiseka,

na vona vatukulu va hina va ta hlayiseka emahlweni ka wena.