Swivuriso 17

₁Ku dya rikoko ra xilondza laha ku nga ni ku rhula,

swi tlula ku dya mafehlefehle emutini wa madzolonga.

₂N'wana wa mahanyelo yo khomisa tingana, ú ta fumiwa hi nandza la tlhariheke,

ndzhaka leyi a a ta avelana ni vamakwavo, yi ta kuma hi nandza wa kona.

₃Nsuku ni silivhere swi kamberiwa hi ndzilo,

timbilu ta vanhu tona ti kamberiwa hi HOSI Xikwembu.

₄Munhu wa mahanyelo yo biha, ú lava ngopfu ku yingisela marito ya lavo homboloka,

lowa mavunwa, ú landzelela ngopfu swicele.

₅Loyi a hlekaka xisiwana, ú le ku sandzeni ka Mutumbuluxi wa xona;

munhu loyi a tsakaka loko van'wana va ri ekhombyeni, a nge poni, ú ta biwa.

₆Lava nga ni vatukulu, va tinyungubyisa hi vona,

na vona vana, va tinyungubyisa hi vatswari.

₇Phuphula a ri koti ku vulavula leswi nga swona,

kasi munhu wo chaviseka yena, ú vulavula ntiyiso.

₈Van'wana va ehleketa leswaku mali yo pfala nomo i xitshungulo,

va tshemba leswaku va ta humelela hinkwako lomu va yaka kona.

₉Loyi a rivalelaka van'wana, ú rhandza xinakulobye,

kasi loyi a nga ni xikhomela, ú onha vunghana.

₁₀Munhu loyi a twisisaka, ú hatla ku twa loko a tshinyiwa,

kasi xiphunta, hambi xo himeteriwa ka dzana, a xi twi.

₁₁Munhu wo biha mbilu, ú tiyela ku tiarisa ntsena,

hikokwalaho, ú tivangela ku rhumeriwa munhu wa tihanyi.

₁₂Ku hlangana ni ntswele ya xinkankanka leyi tekeriweke vana,

swa antswa, ku ri ni ku hlangana ni xiphunta ni swa vuphukuphuku bya xona.

₁₃Loyi a nga ni tihanyi eka lava n'wi endleleke leswinene,

khombo a ri nga suki emutini wa yena.

₁₄Ku sungula ka mhaka, swi fana ni ku ndlandlamuka ka mati loko nambu wu tala,

hikokwalaho, suka u famba timhaka ti nga si biha.

₁₅Loyi a yimelelaka lowo homboloka, ni loyi a lumbetaka munhu wo lulama,

HOSI Xikwembu xa va venga hinkwavo.

₁₆Xiphunta xi nga va ni mali yo hakelela vutlhari,

kambe swi nge xi pfuni nchumu, hikuva a xi na miehleketo.

₁₇Loyi a nga nakuloni, wa ku rhandza minkarhi hinkwayo,

loko u ri ekhombyeni, i makwenu wa xiviri.

₁₈La tshembisaka nakulobye ku n'wi hakelela swikweleti, a tiboha ni ku dlaya milandzu ya yena,

i munhu wo kala miehleketo.

₁₉Loyi a rhandzaka ku vavisa van'wana, ú tsakela madzolonga,

munhu wo vulavula ngopfu, ú tivangela khombo.

₂₀Munhu wa miehleketo yo gombonyoka, a nge humeleli,

ni loyi a vulavulaka swo huma endleleni, ú wela ekhombyeni.

₂₁N'wana la tiarisaka, ú dyisa mutswari embitsi,

tata wa kwe a nga dyi byi rhelela.

₂₂Ku tsaka ka mbilu, swi tshungula miri,

ku khunguvanyeka, swi heta matimba.

₂₃Munhu wo homboloka, ú pfumela ku xaviwa exihundleni,

kutani a nga ha avanyisi hi ku lulama.

₂₄Munhu loyi a twisisaka, ú tikarhatela ku yingisa swa vutlhari ntsena,

kasi miehleketo ya xiphunta yi hangalaka ni misava hinkwayo.

₂₅N'wana la tiarisaka i nhlomulo eka tata wa yena,

ú dyisa mana wa yena embitsi.

₂₆Ku rihisa munhu loyi a lulameke, swi bihile,

ku ba munhu wa ndzhuti, a swi lulamanga.

₂₇Loyi a pimaka marito ya yena loko a vulavula, ú ni vutivi,

munhu wo twisisa, ú kota ku tikhoma.

₂₈Hambi xiphukuphuku xinene, loko xi te whíí, munhu a nga ku, xi tlharihile;

loko xi pfale nomo, u ngo, xi na yona miehleketo.