Tinhlayo 10

₁HOSI Xikwembu xi ku ka Muxe: ₂“Endla timhalamhala timbirhi hi silivhere leyi furiweke, leti nga ta tirhisiwa ku vitana nhlengeletano, ni ku tivisa loko mixaxa yi fanele ku suka. ₃Loko timhalamhala leti ti biwa hatimbirhi ka tona, ntshungu hinkwawo wu ta hlangana na wena enyangweni ya Ntsonga lowo Hlawuleka. ₄Kambe loko ku biwa yin'we, ku ta ta ntsena varhangeri, vona lava nga tinhloko ta tinyimba ta Vaisraele, va ta hlangana na wena. ₅Kasi loko mhalamhala yi mbvungunya kunene, vanhu va mixaxa leyi nga etlhelo ra le vuxeni va ta suka. ₆Kutani loko yi mbvungunya ra vumbirhi, vanhu va mixaxa leyi nga etlhelo ra le dzongeni va ta suka. Minkarhi hinkwayo, loko mixaxa yi fanele ku suka, mhalamhala yi ta mbvungunyisiwa. ₇Loko ntshungu wu fanele ku hlengeletana endhawini yin'we, mi ta ba mhalamhala, kambe mi nga yi mbvungunyisi. ₈Vana va Aroni, va nga vaprista, hi vona lava nga ta ba timhalamhala.

“Nawu wa mi boha ku va ni timhalamhala, n'wina ni vatukulu va n'wina hilaha ku nga heriki. ₉Loko mi tshuka mi hloma matlhari ku ya lwa ni valala va n'wina lava va mi pfukaka etikweni ra n'wina, mi fanele ku mbvungunyisa timhalamhala, leswaku mina HOSI Xikwembu xa n'wina ndzi ta mi anakanya, ndzi mi lamulela emavokweni ya valala va n'wina. ₁₀Timhalamhala leti, mi ta ti ba ni le masikwini lawa mi tsakeke, ni le minkhubyeni ya n'wina ya lembe, ni le ku sunguleni ka tin'hweti, mi ti ba mi ri karhi mi humesa magandzelo lama hisiwaka ni magandzelo ya xinakulobye; timhalamhala leti hi tona leti nga ta endla leswaku mina Xikwembu ndzi mi anakanya. Hi mina HOSI Xikwembu xa n'wina.”

₁₁Eka lembe ra vumbirhi, hi siku ra vu-20 ra n'hweti ya vumbirhi, papa ri suka ehenhla ka Ntsonga lowu nga ni Areka ya Ntwanano. ₁₂Kutani na vona Vaisraele va suka emananga ya Sinayi, va famba mimpfhuka leyi va pimeriweke ku famba yona hi siku. Papa ri yile ri ya yima emananga ya Parani. ₁₃Loko Vaisraele va suka eSinayi, a ku ri kona va sungulaka ku suka ni ku landza leswi HOSI Xikwembu xi swi leriseke hi nomo wa Muxe.

₁₄Va mixaxa ya vandla leri vuriwaka “ra ka Yuda”, hi vona va nga rhanga ku suka, hi ku ya hi mavuthu ya vona. Murhangeri wa mavuthu ya va ka Yuda a a ri Nahaxoni n'wana Aminadaba; ₁₅murhangeri wa mavuthu ya va ka Isakara a a ri Netanele n'wana Suwara, ₁₆kasi murhangeri wa mavuthu ya va ka Zebuloni a a ri Eliyabu n'wana Heloni.

₁₇Loko Ntsonga wu simuriwile, va ka Gerixoni ni va ka Merari, va nga vona varhwari va wona, va suka na wona va famba. ₁₈Va mixaxa ya vandla leri vuriwaka “ra ka Rhuveni”, va suka hi ku ya hi mavuthu ya vona. Murhangeri wa mavuthu ya va ka Rhuveni a a ri Elizuri n'wana Xedewuru; ₁₉murhangeri wa mavuthu ya va ka Simiyoni a a ri Xelumiele n'wana Suri-Xadayi, ₂₀kasi murhangeri wa mavuthu ya va ka Gadi a a ri Eliyasafa n'wana Duwele.

₂₁Kutani va ka Kohata va suka va rhwele swilo leswo hlawuleka; loko va fika emixaxeni, va kuma Ntsonga wu dzimiwile. ₂₂Va mixaxa ya vandla leri vuriwaka “ra ka Efrayimi”, na vona va suka hi ku ya hi mavuthu ya vona. Murhangeri wa mavuthu ya va ka Efrayimi a a ri Elixama n'wana Amihudi; ₂₃murhangeri wa mavuthu ya va ka Manase a a ri Gamaliele n'wana Pedasuru, ₂₄kasi murhangeri wa mavuthu ya va ka Benjamini a a ri Abidana n'wana Gidiyoni.

₂₅Kutani ku suka va mixaxa ya vandla leri vuriwaka “ra ka Dani”, va nga vona vaseleteri va minkondzo, va suka hi ku ya hi mavuthu ya vona. Murhangeri wa mavuthu ya va ka Dani a a ri Ahiezere n'wana Amixadayi; ₂₆murhangeri wa mavuthu ya va ka Asere a a ri Pagiele n'wana Okirani, ₂₇kasi murhangeri wa mavuthu ya va ka Neftali a a ri Ahira n'wana Enana. ₂₈Leyi hi yona ndlela leyi Vaisraele a va fanele ku suka ha yona, hi ku ya hi mavuthu ya vona.

₂₉Kutani Muxe a byela Hobabu n'wana wa mukon'wana wa yena Rhuwele wa le Midiyani, a ku: “Hi ya endhawini leyi HOSI Xikwembu xi nga tshembisa ku hi nyika yona; tana hi famba swin'we, hi ta ya ku endlela leswinene, hikuva HOSI Xikwembu xi tshembisile Vaisraele ku va endlela leswinene.” ₃₀Kambe Hobabu a hlamula a ku: “A ndzi nga fambi na n'wina; ndzi ta ya etikweni ra rikwerhu laha va ka hina va nga kona.” ₃₁Kutani Muxe a ku: “Ndzi kombela leswaku u nga tshuki u famba u hi siya hi ri hexe, hikuva wena u tiva tindhawu ta le mananga, kutani u ta hi pfuna hi ku languta lomu hi nga ta dzima mixaxa kona. ₃₂Loko wo famba na hina, hinkwaswo leswinene leswi HOSI Xikwembu xi nga ta hi nyika swona, hi ta avelana na wena.”

₃₃Ku suka entshaveni ya HOSI Xikwembu, Vaisraele va famba riendzo ra masiku manharhu, Areka ya Ntwanano yi rhangile emahlweni ka vona eriendzweni leri ra masiku manharhu, yi va lavela laha va nga ta fika va wisa kona. ₃₄Loko va suka emixaxeni, papa ra HOSI Xikwembu a ri va ehenhla ka vona nhlekanhi hinkwawo. ₃₅Minkarhi hinkwayo loko Areka yi suka, Muxe a a ku:

₃₆Kutani loko Areka yi vekiwa ehansi, Muxe a a ku: