Nehemiya 11

₁Emutini wa Yerusalema a ku tshama varhangeri; kutani ntshungu wu hoxa vuhlolotwana leswaku exikarhi ka mindyangu yin'wana na yin'wana ya khume, ku hlawuriwa ndyangu wun'we wu ya tshama emutini lowo hlawuleka wa Yerusalema, kasi mindyangu leyi salaka ya 9 yona yi tshama emitini yin'wana. ₂Kutani ntshungu wu dzunisa vanhu hinkwavo lava tinyiketeke ku ya tshama eYerusalema.

₃EYerusalema a ku akile varhangeri va xifundzha, kasi emitini ya Yuda a ku tshama Vaisraele, ni vaprista, ni Valevhi, ni vatirhi va le Tempeleni, ni lava nga ntlaweni wa malandza ya Solomoni; un'wana na un'wana a a tshama endhawini ya yena. ₄Van'wana va ka Yuda ni va ka Benjamini a va tshama eYerusalema; eka va ka Yuda a ku ri na Ataya n'wana Uziya, wa Zakariya, wa Amariya, wa Xefatiya, wa Mehalele, wa Perese; ₅na Maaseya n'wana Baruku, wa Kolo-Hoze, wa Hazaya, wa Adaya, wa Yoyaribi, wa Zakariya, wa Xela. ₆Hinkwavo va ka Perese lava akeke eYerusalema a ti ri tinhenha ta 468.

₇Eka va ka Benjamini eYerusalema a ku ri na Salu n'wana Mexulama, wa Yowede, wa Pedaya, wa Kolaya, wa Maaseya, wa Itiele, wa Yexaya. ₈Ehandle ka Salu, a ku ri na Gabayi na Salayi, kutani va ka Benjamini hinkwavo va va 928. ₉Murhangeri wa va ka Benjamini a a ri Yuwele n'wana Zikri, a pfuniwa hi Yuda n'wana Hasenuwa.

₁₀Eka vaprista lava a va tshama eYerusalema a ku ri na Yedaya n'wana Yoyaribi, na Yakini, ₁₁na Seraya n'wana Hilkiya wa Mexulama, wa Sadoki, wa Merayoto, wa Ahituba, yena mulanguteri wa yindlu ya Xikwembu, ₁₂ni van'wana va ka vona lava a va tirha endlwini ya Xikwembu, kutani hinkwavo va va 822. Naswona a ku ri na Adaya n'wana Yerobama wa Pelaliya, wa Amisi, wa Zakariya, wa Paxahuru, wa Malakiya, ₁₃ni van'wana va ka vona lava a va ri tinhloko ta mindyangu, kutani hinkwavo va va 242. Nakambe a ku ri na Amaxayi n'wana Azarele wa Ahazayi, wa Mexilemoto, wa Imere, ₁₄ni van'wana va ka vona lava a va ri tinhenha ta matimba, kutani hinkwavo va va 128. Mulanguteri wa vona a a ri Zabadiele n'wana Hagedolimi.

₁₅Eka Valevhi lava a va tshama eYerusalema a ku ri na Xemaya n'wana Haxuba wa Azirikama, wa Haxabiya, wa Buni; ₁₆na Xabetayi, na Yozabadi, un'wana wa varhangeri va Valevhi; vona a va langutela ntirho wa le handle ka yindlu ya Xikwembu. ₁₇Naswona a ku ri na Mataniya n'wana Mika wa Zabidi, wa Asafu yena murhangeri loyi a sunguleke xikhongelo xa minkhenso, na Bakibukiya loyi a a ri museketeri wa murhangeri wa va ka vona, na Abida n'wana Xamuwa wa Galala, wa Yedutuni. ₁₈Valevhi hinkwavo lava a va tshama emutini lowo hlawuleka wa Yerusalema a va ri 284.

₁₉Varindzi va le tinyangweni a ku ri Akubu na Talimoni ni vamakwavo, hinkwavo a va ri 172. ₂₀Vaisraele lavan'wana hinkwavo, ni vaprista, ni Valevhi lava saleke a va tshama emitini ya le Yuda, un'wana ni un'wana a tshama endhawini ya yena. ₂₁Vatirhi va le Tempeleni vona a va tshama exivandleni lexi vuriwaka Ofele; valanguteri va vona a a ri Siha na Gixipa.

₂₂Mulanguteri wa Valevhi lava a va tshama eYerusalema a a ri Usi n'wana Bani wa Haxabiya, wa Mataniya, wa Mika, un'wana wa va ka Asafa lava a va yimbelela ni ku langutela ntirho wa le ndlwini ya Xikwembu. ₂₃Hosi ya tiko a yi vekile nawu hi tlhelo ra vayimbeleri, kutani a va boheka ku yimbelela siku rin'wana na rin'wana. ₂₄Xandla xa hosi etimhakeni hinkwato leti khumbaka vanhu a a ri Petahiya n'wana Mexezabele un'wana wa va ka Zera, n'wana Yuda.

₂₅Vanhu van'wana a va tshama emitini ya vona leyi nga ni masimu. Hi tlhelo ra va ka Yuda, van'wana a va tshama emutini wa Kiriyata-Araba ni le swimitaneni swa vona, ni le mutini wa Diboni ni le swimitaneni swa wona, ni le mutini wa Yekabiele ni le swimitaneni swa wona, ₂₆ni le mutini wa Yexuwa, ni wa Molada, ni wa Beta-Pelete, ₂₇ni wa Hasari-Xuwala, ni le mutini wa Berexeba ni le swimitaneni swa wona, ₂₈ni le mutini wa Sikilaga, ni le mutini wa Mekona ni le swimitaneni swa wona, ₂₉ni le mutini wa Eni-Rimoni, ni wa Sora, ni wa Yaramutu, ₃₀ni wa Zanowaka, ni wa Adulama, ni le swimitaneni swa yona, ni le mutini wa Lakixi ni le tindhawini leti nga kusuhi na wona, ni le mutini wa Azeka ni le swimitaneni swa wona. Va ka Yuda a va tshama endhawini leyi sukelaka eBerexeba ku ya fika eka Nkova wa Hinomu. ₃₁Va ka Benjamini vona a va tshama emutini wa Geba, ni wa Mikamasa, ni wa Ayi, ni le mutini wa Betele ni le swimitaneni swa wona, ₃₂ni le mutini wa Anatoto, ni wa Nobo, ni wa Ananiya, ₃₃ni wa Hasoro, ni wa Rhama, ni wa Gitayimi, ₃₄ni wa Hadidi, ni wa Seboyimi, ni wa Nebalata, ₃₅ni wa Lodo, ni wa Ono, ni le ka Nkova wa Vavatli. ₃₆Valevhi van'wana va le Yuda va akisiwile swin'we ni va ka Benjamini.