Mikiya 3

₁N'wina mi rhangelaka va ka Yakobo, yingisani,

ndzi vula n'wina mi fumaka Vaisraele:

Xana a hi n'wina mi fanelaka ku tiva leswo lulama xana?

₂Kambe mi venga leswinene, mi tsakela leswo biha,

mi yevulela vanhu va mina,

mi va hlurhulela tinyama, ku sala marhambu ntsena.

₃Mi hanya hi ku dya nyama ya vanhu va mina

lava mi va yevulaka;

mi fayetela marhambu ya vona, mi ma cakanyetela,

wonge mi lava ku ma hoxa embiteni kumbe epotweni.

₄Nkarhi wa ta lowu mi nga ta huwelela eka HOSI Xikwembu,

kambe a xi nga mi hlamuli;

enkarhini wolowo xi ta mi fularhela,

hikuva leswi mi swi endlaka swi bihile ngopfu.

₅Ku ni vaprofeta lava lahlekisaka vanhu va ka hina:

Loko va nyikiwa swakudya va dya, va ri hinkwaswo swi lulamile,

kambe loko va nga nyikiwi xo hoxa enon'weni,

va pfuxa nyimpi.

Eka vaprofeta lava, HOSI Xikwembu

xi vurisa sweswo xi ri:

₆“Nivusiku, a mi nga ha vi na swivono,

ni ku vhumbha a mi nga ha vhumbhi;

mi ta gugurhuteka ninhlekanhi,

wonge hiloko dyambu ri perile khale.

₇Vamavonakule va ta nyuma,

vavhumbhi va khomiwa hi tingana;

hinkwavo va ta languta hansi,

hikuva a ndzi nga va hlamuli mina Xikwembu.”

₈Loko ndzi ri mina, ndzi tiyile swinene,

hikuva HOSI Xikwembu xi ndzi nyika Moya wa xona,

ndzi vula leswi lulameke ndzi nga chavi nchumu,

ndzi komba Vaisraele, va nga va ka Yakobo,

leswaku va dyohile hi ku tiarisa ka vona.

₉N'wina mi rhangelaka va ka Yakobo, yingisani,

ndzi vula n'wina mi fumaka Vaisraele:

Mi venga leswi lulameke,

mi gombonyokisa hinkwaswo leswi swi nga swona,

₁₀mi ri mi le ku akeni ka Siyoni, wu nga muti wa Yerusalema,

kasi mi halata ngati, mi endla leswo biha.

₁₁Varhangeri va muti va pfumela ku xaviwa ehubyeni,

vaprista va dyondzisela muholo ntsena,

na vona vaprofeta va vhumbhela ku hakeriwa;

hinkwavo va tisirhelela hi ku vula leswaku va nge humeleriwi hi nchumu xo biha,

hikuva Xikwembu xi na vona.

₁₂Kasi, hikwalaho ka vona,

muti wa Siyoni wu ta rimiwa kukota nsimu.

Yerusalema ú ta hundzuka rhumbi,

exintshabyanini xa Tempele, ku ta va swihlahla ntsena.