Matewu 8

₁Loko Yesu a rhelerile hi le ntshaveni, mintshungu leyikulu yi n'wi landzelela. ₂Kutani ku ta munhu wa nhlokonho, a fika a n'wi nkhinsamela, a ku: “Hosi, loko u swi rhandza, u nga ndzi basisa.” ₃Yesu a tshambuluta voko, a n'wi khumba, a ku: “Ndza swi rhandza, hlantsweka u basa!” Hi nomu lo, a basisiwa enhlokonhweni ya yena. ₄Yesu a ku ka yena: “Tivonele, u nga tshuki u byela munhu swilo leswi; kambe famba, u ya tikomba eka muprista, u humesa mhamba leyi nga lerisiwa hi Muxe, swi ta va vumbhoni eka vona.”

₅Kakuloko a nghena eKapernawume, ndhuna ya dzana ra masocha yi ta ka yena, yi n'wi khongela, ₆yi ku: “Hosi, nandza wa mina ú lo lákáhlá endlwini, ú ome swirho, wa vaviseka ngopfu.” ₇Yesu a ku ka yena: “Ndzi ta ya, ndzi ya n'wi hanyisa.” ₈Ndhuna ya dzana yi hlamula yi ku: “Hosi, a swi ndzi fanelanga leswaku wena u ta nghena endlwini ya mina, kambe vula rito ntsena, kutani nandza wa mina ú ta hanya; ₉hikuva, mina ndzi nga munhu la fumiwaka hi van'wana, ndzi ni masocha ehansi ka mina; loko ndzi ku eka rin'wana ra wona: ‘Famba!’ ra famba; ni ka rin'wana: ‘Tana!’ ra ta; ni le ka nandza wa mina: ‘Endla leswo karhi!’ wa swi endla.” ₁₀Loko Yesu a swi twile, a hlamala, kutani a byela lava n'wi landzaka, a ku: “Ndzi tiyisile ndzi ri ka n'wina: Exikarhi ka Vaisraele, a ndzi kumanga munhu ni un'we la nga ni ku pfumela loko tano. ₁₁Ndza mi byela, ndzi ri: Lavo tala va ta huma evuxeni ni le vupeladyambu, kutani va ta tshama swakudyeni eMfun'weni wa matilo kun'we na va Abrahama, na Isaka, na Yakobo. ₁₂Kambe lava Mfumo a wu ri wa vona, va ta cukumetiwa handle emunyameni, laha ku nga ta va ni minkosi ni ku getsela ka meno.” ₁₃Kutani Yesu a ku ka ndhuna ya dzana: “Thelela ekaya! A ku endleke hilaha u pfumeleke hakona.” Kutani nandza wa ndhuna a hanyisiwa hi nkarhi wolowo.

₁₄Loko Yesu a fika emutini wa Petro, a vona mana wa nkata Petro a etlele a vabya, miri wa yena wu hisa. ₁₅Yesu a n'wi khumba voko, kutani ku hisa ka miri wa yena ku suka. Hiloko a pfuka, a tirhela Yesu.

₁₆Nimadyambu, va tisa lavo tala lava a va ri ni mademona; kutani a hlongola mimoya leyi hi rito ntsena, naswona a hanyisa hinkwavo lava vabyaka, ₁₇leswaku ku endleka leswi nga vuriwa hi muprofeta Esaya la nga te: “Ú titekele mahlomulo ya hina, a tirhwexa ni mavabyi ya hina.”

₁₈Loko Yesu a vona ntshungu lowu a wu n'wi rhendzerile, a lerisa vadyondzisiwa va yena ku pelela entsungeni. ₁₉Kutani mutsari un'wana a ta ka yena, a ta ku: “Mudyondzisi, ndzi ta ku landza hinkwako lomu u yaka kona.” ₂₀Yesu a n'wi hlamula a ku: “Vahlati va ni mincele, ni tinyanyana ti ni swisaka, kambe N'wana-wa-Munhu a nga na laha a nga seketelaka nhloko ya yena kona.” ₂₁Un'wana wa vadyondzisiwa va yena a ku ka yena: “Hosi, wa nga ndzi pfumelela ndzi rhanga hi ku ya lahla tatana.” ₂₂Yesu a ku ka yena. “Ndzi landze, kutani u tshika vafi, va lahla vafi va vona.”

₂₃Loko a nghene ebyatsweni, vadyondzisiwa va yena va n'wi landza. ₂₄Kutani ku pfuka xidzedze lexikulu elwandle, byatso byi ko byi funengetiwa hi mangandlati; kambe Yesu, yena, a a etlele. ₂₅Kutani va ya n'wi pfuxa, va ku: “Hosi, hi ponise, ha lova!” ₂₆A ku ka vona: “Hikwalaho ka yini mi ri ni vutoya ke, n'wina vanhu va ku pfumela lokutsongo?” Hiloko a yima, a tshinya mheho ni lwandle, kutani ku rhula lokukulu ku va kona. ₂₇Vanhu va hlamala va ku: “Munhu loyi i munhu muni xana, leswi mheho ni lwandle swi n'wi yingisaka ke?”

₂₈Loko a fikile entsungeni wa lwandle etikweni ra Vagadara, a hlanganisiwa hi vanhu vambirhi lava a va ri ni mademona, va huma hi le masirheni; a va ri lava chavisaka ngopfu, ku ri hava munhu ni un'we loyi a a tiyela ku hundza hi ndlela yoleyo. ₂₉Kutani va huwelela, va ku: “Mhaka ya wena na hina hi yihi ke, wena N'wana wa Xikwembu? Xana u tele ku ta hi xanisa nkarhi wu nga si fika ke?” ₃₀Kulenyana na vona, a ku ri ni ntlhambi lowukulu wa tinguluve, leti a ti ri eku dyeni. ₃₁Mademona ma n'wi kombela hi matimba ma ku: “Loko u hi hlongola, hi rhumele entlhambini wa tinguluve.” ₃₂A ku ka wona: “Yanani!” Hiloko ma huma ma ya nghena etingulubyeni; kutani ntlhambi hinkwawo wu tsutsumela eriweni wu ya tihoxa exidziveni, wu lovela ematini. ₃₃Varisi vona va baleka, va ya emutini, va ya rungula hinkwaswo, hambi swi ri leswi humeleleke eka lava a va ri ni mademona. ₃₄Kutani vanhu va muti hinkwawo va huma ku ya hlangana na Yesu; loko va n'wi vonile, va n'wi kombela hi matimba leswaku a suka etikweni ra vona.