Matewu 3

₁Enkarhini wolowo ku humelela Yohane Mukhuvuri, a dyondzisa emananga ya Yudiya, ₂a ku: “Hundzukani, hikuva Mfumo wa matilo wu le kusuhi.” ₃Yohane hi yena munhu loyi a nga vuriwa hi muprofeta Esaya, loko a te:

₄Yohane yoloyi a a ambele nguvu yo lukiwa hi voya bya kamela, a tikhamile hi vamba ra dzovo, swakudya swa yena a swi ri tinjiya ni vulombe bya nhova. ₅Kutani vaaki va Yerusalema, ni vaaki hinkwavo va Yudiya ni va tiko hinkwaro leri nge kusuhi na Yordani, a va huma va ya ka yena; ₆kutani a a va khuvula enambyeni wa Yordani, va ri karhi va tivula swidyoho swa vona.

₇Kambe loko a vona Vafarisi ni Vasaduki lavo tala va ta ku ta khuvuriwa hi yena, a ku ka vona: “Rixaka ra timhiri, i mani la nga mi tsundzuxa ku baleka vukari bya Xikwembu lebyi taka xana? ₈Vekani mihandzu leyi fambelanaka ni ku hundzuka ka n'wina. ₉Naswona mi nga anakanyi, mi ku: ‘Hi na Abrahama, a nga yena tata wa hina.’ Hikuva ndza mi byela leswaku Xikwembu xi nga pfuxela Abrahama evana hi maribye lawa. ₁₀Nisweswi xihloka xi vekiwile etimitswini ta mirhi; murhi wun'wana ni wun'wana lowu nga vekiki mihandzu leyinene, wu ta tsemiwa wu hoxiwa endzilweni. ₁₁Loko ndzi ri mina, ndzi mi khuvula hi mati hi ku ya hi ku hundzuka ka n'wina, kambe loyi a taka endzhaku ka mina, wa ndzi tlula hi matimba; a swi ndzi fanelanga ku n'wi hluvula tintanghu; hi yena la nga ta mi khuvula hi Moya lowo Kwetsima ni ndzilo. ₁₂Rihlelo ri le vokweni ra yena; ú ta peperha hinkwaswo leswi nge xivuyeni xa yena, a heta; kutani mavele, ú ta ma chela enguleni ya yena; kambe mungu wona, ú ta wu hisa endzilweni lowu nga timekiki.”

₁₃Enkarhini wolowo Yesu a huma eGaleliya, a ya eYordani eka Yohane ku ya khuvuriwa hi yena. ₁₄Kambe Yohane a ala a ku: “Hi mina loyi a fanelaka ku khuvuriwa hi wena, kasi wena u ta eka mina!” ₁₅Yesu a n'wi hlamula, a ku: “Ndzi pfumelele sweswi, hikuva swa fanela leswaku hi hetisisa leswo lulama hinkwaswo hi ndlela leyi.” Kutani Yohane a n'wi pfumelela. ₁₆Kuteloko Yesu a khuvuriwile, a hatla a huma ematini; kutani hi nomu lo matilo ma pfuleka, a vona Moya wa Xikwembu wu xika tanihi tuva, wu ta ehenhla ka yena. ₁₇Kutani ku twakala rito leri humaka etilweni, ri ku: “Loyi i N'wananga la rhandzekaka, loyi ndzi n'wi tsakelaka.”