Matewu 26

₁Kuteloko Yesu a hetile ku vulavula timhaka teto hinkwato, a ku ka vadyondzisiwa va yena: ₂“Ma swi tiva leswaku, loko ku ta va ku hundzile masiku mambirhi, nkhuvo wa Paseka wu ta va kona; kutani N'wana-wa-Munhu ú ta nyiketiwa leswaku a vambiwa exihambanweni.”

₃Enkarhini wolowo vaprista lavakulu, ni vakulukumba, va hlengeletana ehubyeni ya Muprista lonkulu loyi a va ku i Kayafasi, ₄kutani va kanela makungu ya ku khoma Yesu hi vutlhari, va ta n'wi dlaya. ₅Kambe a va ku: “Swi nga endliwi enkhubyeni, hikuva ku nga tshuka ku pfuka dzolonga exikarhi ka vanhu.”

₆Yesu a a ri eBetaniya, emutini wa Simoni lowa nhlokonho. ₇Kutani ku ta wansati la tameleke ximbitana lexi teleke hi mafurha layo nun'hwela yo durha ngopfu, a ma chela enhlokweni ya Yesu va ri eswakudyeni. ₈Loko vadyondzisiwa va vona sweswo, va vilela swinene, va ku: “Swilo leswi swi halateriwa yini ke? ₉A swi ta xavisiwa hi mali leyo tala, kutani yona yi nyikiwa swisiwana.” ₁₀Yesu a tiva ku vilela ka vona, kutani a ku ka vona: “Xana wansati loyi mi n'wi karhatela yini xana? U ndzi endlele ntirho lowo saseka. ₁₁Hikuva, loko swi ri swisiwana, mi ta va na swona hi masiku hinkwawo, kambe mina, ndzi nga ka ndzi nga vi na n'wina hi masiku hinkwawo. ₁₂Loko a tota miri wa mina hi mafurha lawa, ú endlela siku ra ku lahliwa ka mina. ₁₃Ndzi tiyisile ndzi ri ka n'wina: Emisaveni hinkwayo laha Evhangeli leyi yi nga ta twarisiwa kona, leswi a swi endleke swi ta vuriwa na swona, a anakanyiwa ha swona.”

₁₄Kutani un'wana wa lava khume na vambirhi loyi a va ku i Yudasi Iskariyota, a ya eka vaprista lavakulu, ₁₅a ku: “Mi ta ndzi nyika yini, loko ndzi mi nyiketa yena ke?” Kutani va n'wi humesela mali yo ringana tisilivhere ta 30. ₁₆Kavaloko Yudasi a sungula ku lava nkarhi lowunene wo va nyiketa Yesu ha wona.

₁₇Hi siku ro rhanga ra nkhuvo wa Xinkwa lexo-ke-comela, vadyondzisiwa va ta ka Yesu, va ku: “Xana u lava leswaku hi ya ku lunghisela kwihi, laha u nga ta dyela kona Paseka xana?” ₁₈Yesu a va lerisa ku ya emutini eka munhu wo karhi, va fika va ku ka yena: “Mudyondzisi ú ri: ‘Nkarhi wa mina wu kusuhi; ndzi ta dya nkhuvo wa Paseka laha ka wena, kun'we ni vadyondzisiwa va mina.’ ” ₁₉Vadyondzisiwa va endla hilaha Yesu a va leriseke hakona, kutani va lunghisa Paseka.

₂₀Loko dyambu ri perile, Yesu a tshama eswakudyeni ni lava khume na vambirhi. ₂₁Va ku va ha dya, a ku ka vona: “Ndzi tiyisile ndzi ri ka n'wina: Un'wana wa n'wina ú ta ndzi xenga.” ₂₂Va khomiwa hi gome ngopfu, kutani va sungula ku n'wi vutisa ha un'we-un'we, va ku: “A ndzi ri, a wu vuli mina, Hosi!” ₂₃A hlamula, a ku: “La nga ta ndzi xenga, hi loyi a xevaka na mina enkambaneni. ₂₄Loko a ri N'wana-wa-Munhu, ú ta tifambela hilaha ku tsariweke hakona ehenhla ka yena, kambe ú ni khombo munhu loyi N'wana-wa-Munhu a xengiwaka ha yena! A swi ta antswa eka munhu loyi loko onge a nga velekiwanga.”

₂₅Na yena Yudasi la n'wi xengaka a ku: “A ndzi ri, a wu vuli mina, Mufundhisi!” Yesu a ku ka yena: “Ku vula wena sweswo!”

₂₆Loko va ha ri eku dyeni, Yesu a teka xinkwa, kutani loko a nkhensile, a xi phema, a nyika vadyondzisiwa, a ku: “Tekani mi dya, leswi i miri wa mina.” ₂₇Kutani a teka xinwelo, a nkhensa, a va nyika xona a ku: “Nwelani ka xona hinkwenu; ₂₈hikuva leswi i ngati ya mina, ngati ya ntwanano leyi halateriwaka lavo tala leswaku va rivaleriwa swidyoho. ₂₉Kambe ndzi ri ka n'wina: Ku sukela sweswi, a ndzi nga ha nwi kambe swa mihandzu ya vhinya, ku ko ku fika siku leri ndzi nga ta swi nwa na n'wina swi ri leswintshwa, eMfun'weni wa Tata wa mina.” ₃₀Kuteloko va yimbelerile risimu, va ya eNtshaveni ya Mitlhwari.

₃₁Kutani Yesu a ku ka vona: “Vusiku byebyi, mi ta khunguvanyeka hinkwenu hikwalaho ka mina, hikuva ku tsariwile leswaku:

₃₂“Kambe loko ndzi ta va ndzi pfukile eku feni, ndzi ta mi rhangela ku ya eGaleliya.” ₃₃Kambe Petro a ku ka yena: “Hambiloko va nga khunguvanyeka hinkwavo hikwalaho ka wena, mina ndzi nga ka ndzi nga khunguvanyeki, ni siku ni rin'we.” ₃₄Yesu a ku ka yena: “Ndzi tiyisile ndzi ri ka wena, vusiku byebyi, nkuku wu nga si ringa, u ta va u ndzi landzurile kanharhu.” ₃₅Petro a ku ka yena: “Hambiloko ndzi fanele ku fa na wena, ndzi nga ka ndzi nga ku landzuri!” Vadyondzisiwa hinkwavo na vona va vurisa sweswo.

₃₆Hiloko Yesu a ya ni vadyondzisiwa exivandleni lexi vuriwaka Getsemani, kutani a ku ka vona: “Tshamani kwala, ndza ha ya lahaya, ndzi ya khongela.” ₃₇A famba na Petro ni vana lavambirhi va Zebediya; kavaloko a sungula ku khomiwa hi gome ni ku kanakana lokukulu. ₃₈Kutani a ku ka vona: “Moya wa mina wu khomiwa hi gome lerikulu, gome ra ku fa; salani kwala, mi hiteka na mina.” ₃₉Kutani a ya kulenyana, a wa hi mombo, a ri karhi a khongela a ku: “Tatana, loko swi nga endleka, xinwelo lexi a xi fambele kule na mina! Ntsena ku nga endliwi ku rhandza ka mina, kambe a ku endliwe ku rhandza ka wena!”

₄₀A tlhelela ka vadyondzisiwa, a va kuma va etlele; a ku ka Petro: “Xana mi tsandzekise ku yini ku hiteka na mina hambi yi ri awara yin'we ntsena xana? ₄₁Hitekani mi khongela, leswaku mi nga weli emiringweni, hikuva moya wa swi lava, kambe nyama yi tsanile.”

₄₂Kutani a tlhela a ya ra vumbirhi etlhelweni, a khongela a ku: “Tatana, loko swi nga endleki leswaku xinwelo lexi xi fambela kule na mina, ni loko ndzi boheka ku nwela eka xona, a ku endliwe ku rhandza ka wena!” ₄₃Kuteloko a tlhelele ka vona kambe, a va kuma va etlele, hikuva mahlo ya vona a ma tika.

₄₄A va siya, a tlhela a ya khongela ra vunharhu etlhelweni, kukotisa eku sunguleni. ₄₅Kutani a vuyela ka vadyondzisiwa, a ku ka vona: “Xana ma ha etlela ni ku wisa xana? Vonani, nkarhi wu fikile, N'wana-wa-Munhu ú nyiketiwa emavokweni ya vadyohi. ₄₆Sukani mi yima, a hi yeni! Langutani, la ndzi xengaka ú le kusuhi.”

₄₇A ku a ha vulavula, ku humelela Yudasi, un'wana wa lava khume na vambirhi, a ta ni ntshungu wa vanhu lava hlomeke mabanga ni tinhonga, va rhumiwile hi vaprista lavakulu ni vakulukumba. ₄₈Loyi a n'wi xengaka a a va nyikile xikombiso, a ku: “Loyi ndzi nga ta n'wi ntswontswa, hi yena, n'wi khomeni!” ₄₉Hiloko Yudasi a ta, a hatla a kongoma Yesu, a ku: “Xewani Mufundhisi!” kutani a n'wi ntswontswa. ₅₀Yesu a ku ka yena: “Nakulorhi, leswi u nga tela swona, swi endle.” Hiloko va tshinelela Yesu, va tshambuluta mavoko va n'wi khoma.

₅₁Hi nomu lo un'wana wa lava a va ri na Yesu, a hlomula banga ra yena, a ba nandza wa Muprista lonkulu, a n'wi tsema ndleve. ₅₂Yesu a ku ka yena: “Tlherisela banga ra wena enkotlotweni wa rona, hikuva hinkwavo lava tirhisaka mabanga, va ta dlawa hi mabanga. ₅₃Xana u ehleketa leswaku ndzi nga tsandzeka ku khongela Tata wa mina, a ndzi pfuna sweswi-sweswi hi mavandla ya tintsumi lama tlulaka 12 xana? ₅₄Kambe loko swi nga va tano, Matsalwa ma ta endlekisa ku yini, leswi ma vulaka leswaku swi fanekele ku famba hi ndlela yoleyo ke?”

₅₅Enkarhini wolowo, Yesu a ku ka ntshungu: “Leswi mi humeke mi ri ni mabanga ni tinhonga ku ta ndzi khoma, ndzo va xigevenga xana? Masiku hinkwawo a ndzi tshama eTempeleni, ndzi karhi ndzi dyondzisa: A mi ndzi khomanga. ₅₆Hambiswiritano, swilo leswi hinkwaswo swi humelerile leswaku ku hetiseka leswi tsariweke hi vaprofeta.” Hiloko vadyondzisiwa hinkwavo va n'wi siya, va tsutsuma.

₅₇Lava nga khoma Yesu va n'wi yisa eka Kayafasi Muprista lonkulu, laha vatsari ni vakulukumba a va hlengeletanile kona. ₅₈Petro a n'wi landza hi le kule, a ko a fika exivaveni xa Muprista lonkulu; loko a nghenile, a tshamisa ni malandza, leswaku a ta vona ku hela ka swona. ₅₉Kutani vaprista lavakulu, ni huvo hinkwayo ya Sanedri, a va lava vumbhoni bya mavunwa byo hehla Yesu ha byona leswaku va ta n'wi dlaya; ₆₀kambe a va byi kumanga, hambiloko ku humelerile timbhoni ta mavunwa leto tala. Eku heteleleni, ku humelela timbhoni timbirhi ti ku: ₆₁“Munhu loyi ú te: ‘Ndzi ni matimba ya ku nhlanhla Tempele ya Xikwembu, ni ku tlhela ndzi yi pfuxa endzhaku ka masiku manharhu.’ ” ₆₂Hiloko Muprista lonkulu a yima, a ku ka Yesu: “Xana a wu hlamuri nchumu xana? Hi yihi mhaka leyi va ku hehlaka ha yona xana?”

₆₃Kambe Yesu a miyela. Muprista lonkulu a engeta, a ku ka yena: “Ndzi ri ka wena: Hlambanya hi Xikwembu lexi hanyaka, u hi byela loko u ri Mesiya, N'wana wa Xikwembu.” ₆₄Yesu a n'wi hlamula a ku: “Leswi u vulaku ke! Ntsena ndza mi byela ndzi ku:

₆₅Kavaloko Muprista lonkulu a handzula tinguvu ta yena, a ku: “Ú sandzile Xikwembu; ha ha lavela yini timbhoni ke? Ma ha ku twa ku sandza ka yena sweswi. N'wina mi ri yini?” ₆₆Va hlamula, va ku: “Ú fanekele ku fa.” ₆₇Kutani va n'wi tshwutela marha exikandzeni, va n'wi ba hi swibakela, van'wana va n'wi ba hi timpama, va ku: ₆₈“Vhumbha loyi a ku beke, wena Mesiya!”

₆₉Petro a a tshamile ehandle exivaveni; kutani nandza un'wana wa wansati a ta ka yena, a ku: “Na wena, a wu ri na Yesu wa Galeliya.” ₇₀Kambe Petro a kaneta emahlweni ka hinkwavo, a ku: “Leswi u swi vulaka, a ndzi swi tivi.” ₇₁Hiloko a huma, a ya yima enyangweni; kutani wansati un'wana a n'wi vona, a ku ka lava a va ri kwalaho: “Wanuna loyi a a ri na Yesu wa Nazareta.” ₇₂Petro a engeta a kaneta a ku: “Mina ndza hlambanya leswaku munhu loyi, a ndzi n'wi tivi.” ₇₃Endzhakunyana, lava a va ri kwalaho va tshinela, va ku ka Petro: “Hakunene, na wena, u un'wana wa vona, hikuva u tikomba hi mavulavulele ya wena.” ₇₄Hiloko a sungula ku hlambanya hi matimba a ku: “Ndzi tiyisile leswaku munhu loyi, mina a ndzi n'wi tivi!” Hi nomu lo, nkuku wu ringa. ₇₅Kutani Petro a tsundzuka rito leri vuriweke hi Yesu, loko a te: “Nkuku wu nga si ringa, u ta va u ndzi landzurile kanharhu.” Kavaloko a humela ehandle, a ya rila hi xiviti.