Matewu 24

₁Loko Yesu a ri karhi a huma hi le Tempeleni a famba, vadyondzisiwa va ta ka yena va n'wi komba tindlu ta Tempele. ₂Kambe Yesu a va hlamula, a ku: “Xana ma swi vona swilo leswi hinkwaswo? Ndzi tiyisile ndzi ri ka n'wina, a ku nga sali ribye ehenhla ka ribye rin'wana kwala; hinkwawo ma ta hindzimuxiwa.”

₃Kuteloko a tshamile eNtshaveni ya Mitlhwari, vadyondzisiwa va ta ka yena etlhelweni, va ku: “Hi byele, xana timhaka leti ti ta humelela rini xana? Xana xikombiso xa ku vuya ka wena ni xa ku hela ka minkarhi xi ta va xihi ke?” ₄Yesu a va hlamula a ku: “Tivoneleni leswaku mi nga tshuki mi xisiwa hi munhu. ₅Hikuva lavo tala va ta ta hi vito ra mina, un'wana ni un'wana a ku: ‘Hi mina Mesiya’, kutani va ta xisa lavo tala. ₆Mi ta twa huwa ya tinyimpi ni mahungundlela ya tinyimpi; tivoneleni leswaku mi nga tshukisiwi, hikuva sweswo swi fanele ku humelela, kambe a hi wona makumu. ₇Tiko rin'wana ri ta pfukela tiko rin'wanyana, mfumo wun'wana wu ta lwa ni mfumo wun'wanyana; ku ta va ni tindlala, ni ku tsekatseka ka misava ematlhelweni layo tala. ₈Swilo leswi hinkwaswo i ku sungula ka mahlomulo.

₉“Enkarhini wolowo va ta mi nyiketa eku xanisiweni, va mi dlaya; mi ta vengiwa hi vanhu va matiko hinkwawo hikwalaho ka vito ra mina. ₁₀Kutani lavo tala va ta khunguvanyeka; va ta hehlana, va vengana. ₁₁Ku ta humelela vaprofeta va mavunwa lavo tala, va ta xisa vanhu lavo tala. ₁₂Kutani rirhandzu ra lavo tala ri ta sungula ku titimela, hikuva ku homboloka ku ta va ku andzile. ₁₃Kambe loyi a tiyiselaka ku fika makumu, hi yena loyi a nga ta ponisiwa. ₁₄Kutani Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.

₁₅“Kutaku loko mi vona xilo xa manyala lexi onhetelaka lexi vuriweke hi muprofeta Daniele, xi ri exivandleni lexo hlawuleka (la hlayaka a a twisise), ₁₆lava nge Yudiya a va tsutsumele etintshaveni; ₁₇loyi a nge henhla ka lwangu, a nga tshuki a xika ku ya teka leswi nge ndlwini ya yena; ₁₈la nge masin'wini, a nga tshuki a tlhelela ekaya ku ya teka xiambalo xa yena. ₁₉Va ta va ni khombo vavasati lava tikeke ni lava mamisaka eminkarhini yoleyo. ₂₀Khongelani leswaku ku tsutsuma ka n'wina ku nga humeleri hi vuxika, hambi ku ri hi siku ra Savata, ₂₁hikuva nhlomulo wu ta va lowukulu enkarhini wolowo; nhlomulo lowo tano a wu si va kona hi mpfhuka misava yi tumbulukile ku fikela namuntlha, naswona a wu nga ha vi kona ni siku ni rin'we. ₂₂Loko masiku walawo a ma nga hungutiwanga, a ku nga ta pona munhu, kambe hikwalaho ka vahlawuriwa va Xikwembu, masiku ya kona ma ta hungutiwa.

₂₃“Enkarhini wolowo, loko munhu a mi byela a ku: ‘Vonani, Mesiya hi loyi!’ kumbe: ‘Hi luya!’ mi nga tshuki mi pfumela. ₂₄Hikuva ku ta humelela Vamesiya va mavunwa, ni vaprofeta va mavunwa, va ta endla mahlori lamakulu ni swihlamariso, ku xisa hambi va ri vona vahlawuriwa va Xikwembu, loko swi endleka. ₂₅Maswivo, ndzi mi byerile timhaka leti, ti nga si humelela; ₂₆hikokwalaho, loko va ku ka n'wina; ‘Vonani, ú le mananga le!’ mi nga yi kona; kumbe loko va ku: ‘Vonani, ú tumbela laha ndlwini!’ mi nga swi pfumeli sweswo. ₂₇Hikuva kukotisa rihati loko ri hatima ku sukela evuxeni ku ya fika evupeladyambu, N'wana-wa-Munhu ú ta endlisa sweswo eku vuyeni ka yena. ₂₈Laha ntsumbu wu nga kona, hi laha makoti ma nga ta hlengeletana kona.

₂₉“Kan'we-kan'we loko nhlomulo wa minkarhi yoleyo wu ta va wu herile,

₃₀“Hi kona xikombiso xa N'wana-wa-Munhu xi nga ta vonaka etilweni; vanhu va tinxaka hinkwato ta misava va ta ba nkosi, kutani va ta vona N'wana-wa-Munhu a ta emapapeni ya le tilweni, hi matimba ni ku kwetsima lokukulu. ₃₁Hi mpfumawulo lowukulu wa mhalamhala, ú ta rhuma tintsumi ta yena; ti ta hlengeleta vahlawuriwa va yena, va huma ematlhelweni ya mune ya misava, ku sungula emakun'wini man'wana ya tilo ku ya fika eka laman'wanyana.

₃₂“Dyondzani leswi hi murhi wa nkuwa: Loko marhavi ya wona ma sungula ku olova, ni loko matluka ya wona ma hluka, mi tiva leswaku ximumu xi le kusuhi. ₃₃Hi mukhuva wolowo, loko mi vona swilo sweswo hinkwaswo, tivani leswaku nkarhi wu le kusuhi, wu le nyangweni. ₃₄Ndzi tiyisile ndzi ri ka n'wina: Rixaka leri ri nga ka ri nga hundzi, ku nga si humelela swilo leswi hinkwaswo. ₃₅Tilo ni misava swi ta hundza, kambe marito ya mina ma nga ka ma nga hundzi.

₃₆“Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le matilweni, hambi a ri N'wana; swi tiviwa hi Tatana ntsena. ₃₇Ku vuya ka N'wana-wa-Munhu ku ta fana ni leswi humeleleke emasikwini ya Nowa. ₃₈Hikuva emasikwini walawo, loko ndhambi ya mati yi nga si ta, vanhu a va ri eku dyeni, va nwa, va hlomisa ni ku hlomiselana, ku ko ku fika siku leri Nowa a ngheneke engalaveni ha rona; ₃₉a va nga anakanyi nchumu ku kondza loko ndhambi leyi ya mati yi ta, kutani yi va kukula hinkwavo; swi ta va tano ni le ku vuyeni ka N'wana-wa-Munhu.

₄₀“Enkarhini wolowo, eka vanhu vambirhi lava nga ta va emasin'wini, ku ta tekiwa un'wana, un'wana a siyiwa; ₄₁eka vavasati vambirhi lava nga ta va eku sileni, ku ta tekiwa un'wana, un'wana a siyiwa. ₄₂Hitekani ke, hikuva a mi tivi siku leri Hosi ya n'wina yi nga ta ta ha rona.

₄₃“Swi tiveni ke: Loko onge n'wini wa yindlu ú tivile nkarhi lowu khamba ri nga ta ta ha wona, ingi a hitekile, a nga tshikanga yindlu ya yena yi tshoviwa. ₄₄Hikokwalaho na n'wina, tshamani mi tilunghisile, hikuva N'wana-wa-Munhu ú ta ta enkarhini lowu mi nga wu ehleketiki.

₄₅“Xana nandza la tshembekaka, wo tlhariha, hi wihi xana? Hi loyi n'wini wa yena a n'wi vekeke ku hlayisa malandza laman'wana la mutini, a ma phamela swakudya hi nkarhi wa kona. ₄₆Ku katekile nandza loyi a nga ta kumiwa a ri karhi a endlisa sweswo, siku n'wini wa yena a vuyaka. ₄₇Ndzi tiyisile ndzi ri ka n'wina, ú ta vekiwa ku va mulanguteri wa rifuwo hinkwaro ra n'wini wa yena. ₄₈Kambe loko nandza yoloyi a ri lowo biha, ú ta ehleketa embilwini ya yena a ku: ‘N'wini wa mina wa hlwela ku vuya’, ₄₉kutani a sungula ku ba malandza-kulobye, a dya, a nwa ni swidakwa. ₅₀Kasi n'wini wa yena a nga tshuka a fika, hi siku leri nandza loyi a nga n'wi langutelangiki ku vuya ha rona, ni le nkarhini lowu a nga wu tiviki; ₅₁kutani n'wini wa nandza loyi ú ta n'wi ba swinene, a n'wi cukumeta kun'we ni vakanganyisi, laha ku nga ta va ni minkosi, ni ku getsela ka meno.