Matewu 23

₁Kavaloko Yesu a byela mintshungu ni vadyondzisiwa va yena, a ku: ₂“Vatsari ni Vafarisi va dyondzisa leswi Muxe a nga dyondzisa swona; ₃hikokwalaho, endlani hinkwaswo leswi va mi byelaka swona, mi swi hlayisa, kambe mi nga endli leswi va swi endlaka, hikuva va vula, kambe a va endli. ₄Va boha mindzhwalo leyo tika, va yi rhwexa emakatleni ya vanhu, kasi vona a va lavi ni ku yi ninginisa hi ritiho. ₅Mintirho ya vona hinkwayo, va yi tirha leswaku va ta voniwa hi vanhu; hikuva va kurisa swibokisana swa vona leswi nga ni tindzimana endzeni, va lehisa ni makumu ya tinguvu ta vona; ₆va rhandza ku tshama lomu ko chaviseka eminkhubyeni, va hlawula ni switshamu leswinene emasinagogeni; ₇va tsakela ku xewetiwa hi mafundzha emintsendzeleni, ni ku vitaniwa hi vito ra ‘Mudyondzisi’ hi vanhu.

₈“Loko mi ri n'wina, mi nga tshuki mi vitaniwa hi vito ra ‘Mudyondzisi’, hikuva Mudyondzisi wa n'wina i un'we ntsena; n'wina hinkwenu mi vamakwavo. ₉Mi nga tshuki mi khongela munhu wa laha misaveni, mi ku, i ‘Tata wa n'wina’, hikuva Tata wa n'wina i un'we ntsena, loyi a nge tilweni. ₁₀Naswona mi nga tshuki mi tsakela ku vuriwa ‘Varhangeri’, hikuva Murhangeri wa n'wina i un'we ntsena, a nga yena Mesiya. ₁₁Lonkulu eka n'wina ú ta va nandza wa n'wina, ₁₂hikuva un'wana ni un'wana loyi a tikurisaka, ú ta tsongahatiwa; kutani un'wana ni un'wana la titsongahataka, ú ta kurisiwa.

₁₃“Mi ni khombo n'wina vatsari ni Vafarisi, hikuva mi vakanganyisi: Mi alela vanhu ku nghena eMfun'weni wa matilo. N'wina a mi ngheni eka wona, naswona lava ringetaka ku nghena ma va sivela. [ ₁₄Mi ni khombo n'wina vatsari ni Vafarisi, hikuva mi vakanganyisi: Mi dyelela tinoni ni mindyangu ya tona, mi endla ni swikhongelo leswo leha leswaku mi ta voniwa; hikokwalaho mi ta avanyisiwa hi ku avanyisa loku tlurisaka.]

₁₅“Mi ni khombo n'wina vatsari ni Vafarisi, hikuva mi vakanganyisi: Mi rhendzeleka ni malwandle ni matiko, leswaku mi ta kuma mudyondzisiwa un'we ntsena; kutani loko mi n'wi kumile, mi n'wi endla loyi a fanelaka hi Tihele ku tlula n'wina kambirhi.

₁₆“Mi ni khombo n'wina vafambisi lavo-fe-mahlo, hikuva mi ri: ‘Loko munhu a hlambanya hi Tempele, a swi na mhaka; kambe loko a hlambanya hi nsuku wa Tempele, ú tibohile.’ ₁₇N'wina swihunguki ni lavo-fe-mahlo, lexikulu hi xihi, xana i nsuku, kumbe i Tempele, leyi nga yona yi hlawulekisaka nsuku ke? ₁₈Naswona mi ri: ‘Loko munhu a hlambanya hi alitari, a swi na mhaka, kambe loko a hlambanya hi nyiko leyi nge henhla ka alitari, ú tibohile.’ ₁₉N'wina lavo-fe-mahlo, lexikulu hi xihi, xana i nyiko, kumbe i alitari, leyi nga yona yi hlawulekisaka nyiko ke? ₂₀Loko swi ri tano, loyi a hlambanyaka hi alitari, ú hlambanya ha yona kun'we ni swilo hinkwaswo leswi nge henhla ka yona; ₂₁la hlambanyaka hi Tempele, ú hlambanya hi yona kun'we ni Loyi a tshamaka eka yona; ₂₂naswona la hlambanyaka hi tilo, ú hlambanya hi xiluvelo xa Xikwembu kun'we ni Loyi a tshameke ehenhla ka xona.

₂₃“Mi ni khombo n'wina vatsari ni Vafarisi, hikuva mi vakanganyisi: Mi humesa vukhume bya ximbowa-mbowani, ni bya aneta, ni bya kumini, kambe a mi na mhaka ni leswikulu swa Nawu, ku nga ku lulama, ni tintswalo, ni ku pfumela; kasi a mi fanerile ku endla swilo leswi, loko mi ri karhi mi endla ni leswiya swin'wana. ₂₄N'wina vafambisi lavo-fe-mahlo, mi ungula nsuna, kambe mi mita kamela!

₂₅“Mi ni khombo n'wina vatsari ni Vafarisi, hikuva mi vakanganyisi: Mi hlantswa ndzheko ni nkambana ehandle, kasi endzeni ku tele makwanga ni ku tsandzeka ku tikhoma. ₂₆We Mufarisi wo-fe-mahlo, rhanga u hlantswa ndzheko endzeni wu basa, hikona wu nga ta hlantsweka wu basa ni le handle.

₂₇“Mi ni khombo n'wina vatsari ni Vafarisi, hikuva mi vakanganyisi: Mi fana ni masirha lama basisiweke, lama vonakaka ma sasekile ehandle, kasi endzeni ku tele marhambu ya vafi ni hinkwaswo leswa thyaka. ₂₈Hi mukhuva wolowo vanhu va mi vona mi ri lavo lulama ehandle, kasi endzeni, mi tele ku kanganyisa ni ku homboloka.

₂₉“Mi ni khombo n'wina vatsari ni Vafarisi, hikuva mi vakanganyisi: Mi akela masirha ya vaprofeta, mi khavisa ni maribye yo tsundzuka lavo lulama, kutani mi ri: ₃₀‘Loko onge hi hanyile eminkarhini ya vatata wa hina, ingi hi nga twanananga na vona ku dlaya vaprofeta.’ ₃₁Hi mukhuva wolowo, mi tivula mi ri n'wina leswaku mi vana va lava va nga dlaya vaprofeta. ₃₂Hiswona ke, hetisani leswi vatata wa n'wina va swi sunguleke. ₃₃N'wina tinyoka, vana va timhiri, xana mi ta ponisa ku yini ku avanyiseriwa Tihele xana?

₃₄“Hikwalaho, maswivo, ndza ha mi rhumela vaprofeta, ni tintlhari, ni vatsari; mi ta dlaya van'wana va vona, van'wana mi ta va vamba eswihambanweni; mi ta ba van'wana va vona emasinagogeni ya n'wina, mi va hlongorisa va suka emutini wun'wana, va ya eka wun'wana; ₃₅sweswo swi ta endla leswaku mi va ni nandzu wa ku dlawa ka lavo lulama hinkwavo, ku sukela eku dlaweni ka Abele la lulameke, ku ya fika eku dlaweni ka Zakariya n'wana Barakiya, loyi mi n'wi dlayeke exikarhi ka Tempele ni alitari. ₃₆Ndzi tiyisile ndzi ri ka n'wina, sweswo hinkwaswo swi ta wela rixaka leri.

₃₇“Yerusalema, Yerusalema, wena la dlayaka vaprofeta, la khandlaka hi maribye lava rhumiweke ka wena, kangani ndzi naverile ku hlengeleta vana va wena, kukotisa huku loko yi hlengeleta swiciwana swa yona ehansi ka timpapa ta yona, kambe a wu swi lavanga. ₃₈Vonani, muti wa n'wina wu ta sala wu nga ri na munhu; ₃₉naswona ndza mi tivisa leswaku ku sukela sweswi, a mi nga ha ndzi voni, ku ko ku fika siku leri mi nga ta ku: ‘A ku dzunisiwe la taka hi vito ra Hosi.’ ”