Matewu 20

₁“Mfumo wa matilo wu fana ni n'wini wa muti la humeke nimpundzu ku ya thola vatirhi, va ya tirha ensin'wini ya yena ya vhinya. ₂Kuteloko a twanene ni vatirhi lava leswaku va ta kuma denari yin'we, yi nga hakelo ya siku, a va rhuma va ya ensin'wini ya yena ya vhinya. ₃A tlhela a huma loko ku lava ku va nkarhi wa 9 nimixo, a vona van'wana lava a va ri erivaleni ra muti va nga tirhi nchumu; ₄a ku ka vona: ‘Na n'wina, yanani ensin'wini ya vhinya, ndzi ta mi nyika leswi nga swona.’ ₅Kutani va ya. A tlhela a huma loko ku lava ku va nkarhi wa 12 ni nhlekanhi ni nkarhi wa 3 nindzhenga, a endlisa sweswo. ₆Kuteloko a humile kambe kwalomu ka nkarhi wa 5 nimadyambu, a vona van'wana va lo yima, kutani a ku ka vona: ‘Mi tshamele yini siku hinkwaro mi nga tirhi nchumu xana?’ ₇Va n'wi hlamula va ku: ‘Hi tshamile, hikuva a hi thoriwanga.’ A ku ka vona: ‘Na n'wina, yanani ensin'wini ya vhinya.’

₈“Kutani nimadyambu n'wini wa nsimu ya vhinya a ku ka mulanguteri wa swilo swa yena: ‘Vitana vatirhi, u va nyika hakelo ya vona; u ta sungula hi lava nga ta endzhaku, u hetelela hi lava nga rhanga va ta.’ ₉Kutani lava nga thoriwa kwalomu ka nkarhi wa 5 nimadyambu, va ta, un'wana ni un'wana a kuma denari yin'we. ₁₀Kutani ku ta fika lavo rhanga, va ehleketa leswaku vona va ta hakeriwa ku tlula sweswo; kambe un'wana ni un'wana wa vona a kuma denari yin'we; ₁₁loko va yi kumile, va dzumadzumela n'wini wa muti, ₁₂va ku: ‘Va le ndzhaku va tirhile awara yin'we ntsena, kasi u va ringanisile na hina hi nga khukhumbana ni siku hinkwaro, hi ri karhi hi tirha hi tshwa hi mumu!’ ₁₃A hlamula un'wana wa vona, a ku: ‘Nakulorhi, a ndzi ku dyelelanga; xana a wu twanananga na mina ku hakeriwa denari yin'we ke? ₁₄Teka xilo xa wena lexi, u famba; munhu loyi a nga thoriwa endzhaku ka van'wana, ndzi rhandza ku n'wi hakela ku fana na wena. ₁₅Xana a ndzi pfumeleriwi ku endla leswi ndzi swi rhandzaka hi swilo swa mina xana? Kumbe vunene bya mina bya ku vilerisa xana?’ ” ₁₆Yesu a engeta a ku: “Hi mukhuva wolowo, va le ndzhaku va ta va va le mahlweni, ni va le mahlweni va ta va va le ndzhaku.”

₁₇Loko Yesu a ri karhi a tlhandlukela eYerusalema, a teka vadyondzisiwa lava khume na vambirhi hi tlhelo, a vulavula na vona loko va ha ri endleleni, a ku: ₁₈“Vonani, hi tlhandlukela eYerusalema, kutani N'wana-wa-Munhu ú ta nyiketiwa eka vaprista lavakulu ni ka vatsari; va ta n'wi avanyisela rifu; ₁₉va ta n'wi nyiketa eka vamatiko leswaku vona va tlanga hi yena, va n'wi ba hi minkhavi ni ku n'wi vamba exihambanweni; kutani, hi siku ra vunharhu, ú ta pfuka eku feni.”

₂₀Kutani nsati wa Zebediya a ta ni vana va yena vambirhi va xinuna, a nkhinsamela Yesu ku ta kombela xa nchumu eka yena. ₂₁Yesu a ku ka yena: “U lava yini xana?” Yoloye a ku ka yena: “Tshembisa leswaku vana lavambirhi va mina va ta tshama eMfun'weni wa wena, un'wana evokweni ra wena ra xinene, un'wana eka lera ximatsi.” ₂₂Yesu a hlamula a ku: “A mi tivi lexi mi xi kombelaka. Xana mi nga kota ku nwela exinwelweni lexi ndzi nga ta nwela ka xona ke?” Va ku ka yena: “Hi nga swi kota.” ₂₃A ku ka vona: “Kunene mi ta nwela exinwelweni xa mina, kambe loko ku ri ku tshama evokweni ra mina ra xinene hambi ka lera ximatsi, a hi mina ndzi nga mi nyikaka swona, kambe swi ta va swa lava swi nga lunghiseriwa vona hi Tata wa mina.”

₂₄Loko lava khume va twa mhaka leyi, va hlundzukela vamakwavo lavambirhi. ₂₅Kuteloko Yesu a va vitanile, a ku ka vona: “Ma swi tiva leswaku tihosi ta matiko ti ma fuma hi ntamu, na vona vakulukumba va ma fuma hi matimba; ₂₆swi nga tshuki swi va tano exikarhi ka n'wina, kambe un'wana ni un'wana la navelaka ku va lonkulu exikarhi ka n'wina, a a ve tanihi mutirheli wa n'wina; ₂₇naswona un'wana ni un'wana la navelaka ku va wa le mahlweni exikarhi ka n'wina, a a ve nandza wa n'wina; ₂₈hi mukhuva lowu, N'wana-wa-Munhu a nga telanga ku tirheriwa, kambe ku tirhela van'wana ni ku nyiketa vutomi bya yena ku kutsula lavo tala.”

₂₉Kakuloko va huma eYeriko, ntshungu lowukulu wu landzelela Yesu. ₃₀Kutani vanhu vambirhi lavo-fe-mahlo a va tshamile kusuhi ni ndlela; loko va twa leswaku i Yesu la hundzaka, va huwelela va ku: “Hosi, N'wana Davhida, hi twele vusiwana!” ₃₁Ntshungu wu va tshinya leswaku va miyela, kambe vona va engeta va huwelela va ku: “Hosi, N'wana Davhida, hi twele vusiwana!” ₃₂Yesu a yima, a va vitana, a ku: “Mi lava leswaku ndzi mi endlela yini xana?” ₃₃Va ku ka yena: “Hosi, hi pfule mahlo!” ₃₄Kavaloko Yesu a va twela vusiwana, a khumba mahlo ya vona; hi nomu lo va tlhela va vona, kutani va n'wi landza.