Luka 16

₁Yesu a ku ka vadyondzisiwa va yena: “A ku ri ni mufumi loyi a a ri ni mulanguteri. Kutani mulanguteri loyi, vanhu a va hamba va n'wi hleva eka n'wini wa yena, va ku: ‘Wa hangalasa xuma xa wena.’ ₂Mufumi a n'wi vitana a ku ka yena: ‘Timhaka ta wena leti ndzi ti twaka hi tihi ke? Hlamusela swa vulanguteri bya wena, hikuva a wu nga ha pfumeleriwi ku va mulanguteri.’ ₃Yena a anakanya embilwini ya yena, a ku: ‘Ndzi ta endla yini, leswi n'wini wa mina a ndzi tekelaka vulanguteri bya mina? Ku rima, a ndzi na ntamu. Ku kombela, swi khomisa tingana. ₄Ndzi tiva lexi ndzi nga ta endla xona, leswaku vanhu va ndzi amukela emakaya ya vona, loko ndzi ta va ndzi tekeriwile vulanguteri bya mina.’ ₅Kutani a vitana, ha un'we un'we, lava a va ri ni milandzu eka n'wini wa yena; eka lowo rhanga a ku: ‘Nandzu lowu u nga na wona eka n'wini wa mina wu fika kwihi xana?’ ₆Yoloye a ku: ‘I dzana ra mimpimo ya mafurha.’ Mulanguteri a ku ka yena: ‘Teka papila ra wena ra nandzu, u tshama hansi, u hatla u tsala 50.’ ₇Ka un'wana a ku: ‘Wena ke, nandzu wa wena wu fika kwihi ke?’ Yena a ku: ‘I dzana ra mimpimo ya mavele.’ Kutani a ku ka yena ‘Teka papila ra wena, u tsala 80.’ ₈Kutani n'wini a dzunisa mulanguteri wo kala a nga tshembekanga, hikuva a a endlile hi vutlhari.” Yesu a engeta a ku: “Vanhu va misava leyi va tlharihile eku tirhisaneni ni va ka vona ku tlula vanhu va ku vonakala.

₉“Hikokwalaho ke ndzi ri ka n'wina: Tiendleleni maxaka hi xuma xa misava leyi, leswaku loko mi tshuka mi pfumarile, va mi amukela emintsongeni leyi nga heriki. ₁₀Loyi a tshembekeke eka leswitsongo, ni ka leswikulu ú ta tshembeka; loyi a nga tshembekangiki eka leswitsongo, ni ka leswikulu a nga ka a nga tshembeki. ₁₁Kutani loko mi nga tshembekanga exumeni xa misava leyi, i mani la nga ta mi tshemba eka xuma lexi nga xa xiviri xana? ₁₂Naswona loko mi nga vanga lavo tshembeka eswilweni swa van'wana, i mani la nga ta mi nyika leswi nga swa n'wina xana?

₁₃“A ku na nandza loyi a nga kotaka ku tirhela tihosi timbirhi, hikuva ú ta venga yin'wana, a rhandza leyin'wana; kumbe ú ta namarhela yin'wana a fularhela leyin'wana. Mi nge koti ku tirhela Xikwembu ni rifuwo ra misava leyi.”

₁₄Vafarisi, va nga vanhu va makwanga ni mali, a va twa timhaka teto hinkwato, kutani va n'wi sola. ₁₅Yena a ku ka vona: “Loko mi ri n'wina, mi tiendla lava lulameke emahlweni ka vanhu; kambe Xikwembu xi tiva timbilu ta n'wina; hikuva leswi vanhu va swi tekaka swi ri swa le henhla, emahlweni ka Xikwembu a hi nchumu.

₁₆“Nawu ni Vaprofeta hi swona a swi tirha ku fika loko Yohane Mukhuvuri a humelela; ku sukela enkarhini wolowo, Evhangeli ya Mfumo wa Xikwembu ya karhi ya vuriwa, kutani un'wana ni un'wana ú nghena eka wona hi ku tirhisa matimba.

₁₇“Tilo ni misava swi nga nyamalala hi ku olova, ku ri na ku susa xirhatana xin'we ntsena eNawini.

₁₈“Un'wana ni un'wana la tshikaka nsati wa yena, a tlhela a teka un'wana, wa oswa; naswona loyi a tekaka la tshikiweke hi nuna wa yena, wa oswa.

₁₉“A ku ri ni mufuwi la ambaleke nguvu yo vangama ya xivunguvungu ni ya ntsembyani lowo saseka, a tshama eku tsakeni a tiphina hi masiku hinkwawo. ₂₀Naswona, a ku ri ni xisiwana lexi a va ku i Lazaro; a a hamba a ta vekiwa kwala nyangweni ya mufuwi, a tele swilondza. ₂₁A a navela ku xurha hi mahlanhla lama waka hi le tafuleni ra mufuwi; timbyana na tona a ti ta, ti ta n'wi lakatsela swilondza. ₂₂Siku rin'wana xisiwana lexi xi fa, kutani tintsumi ti xi rhwala ti xi yisa exifuveni xa Abrahama. Mufuwi na yena a fa, a lahliwa esirheni.

₂₃“Loko a ri exivandleni xa vafi, a ri karhi a xaniseka, a tlakusa mahlo, a vona Abrahama hi le kule, na Lazaro exifuveni xa yena. ₂₄Kutani a huwelela a ku: ‘Tatana Abrahama, ndzi twele vusiwana, u rhuma Lazaro leswaku a peta xintihwana xa yena ematini, a titimeta ririmi ra mina, hikuva ndzi vaviseka ngopfu emalangavini lawa!’ ₂₅Kambe Abrahama a ku: ‘N'wananga, tsundzuka leswaku u kumile rifuwo evutomini bya wena, kasi Lazaro yena a a vaviseka enkarhini wolowo; kambe sweswi wa chaveleriwa haleno, kasi wena u twisiwa ku vaviseka. ₂₆Ehandle ka leswi hinkwaswo, ku ni riwa lerikulu leri ahlameke exikarhi ka hina na n'wina, leswaku lava navelaka ku suka haleno, va ta kwaleyo ka n'wina, va nga swi koti; na vona lava nga kwaleyo ka n'wina, loko va navela ku ta haleno, va tsandzeka.’

₂₇“Kutani a ku: ‘Tatana, ndza ku khongela leswaku u rhuma Lazaro a ya emutini wa tatana, ₂₈hikuva ndzi ni vamakwerhu va ntlhanu. Ú ta ya va tsundzuxa, leswaku va nga tshuki va ta na vona exivandleni lexi xa ku xaniseka.’ ₂₉Abrahama a ku ka yena: ‘Va na Muxe ni Vaprofeta, a va yingise vona!’ ₃₀Mufuwi a ku: ‘Ee, tatana Abrahama, kambe loko un'wana wa lava feke a tlhelela eka vona, a va ta hundzuka.’ ₃₁Abrahama a ku ka yena: ‘Loko va nga yingisi Muxe ni Vaprofeta, va nga ka va nga kholwi, hambiloko un'wana wa vafi a pfuka.’ ”