Ta ku herisiwa ka muti wa Yeriko
1Muti wa Yeriko a wu gogiwile endzeni ni le handle hikuva vaaki va wona a va chava Vaisraele. A ku nga ri na munhu loyi a a huma emutini kumbe loyi a a nghena kona. 2Kutani HOSI Xikwembu xi ku ka Yoxuwa: “Vona, ndzi ku nyiketa muti wa Yeriko ni hosi ya wona ni tinhenha ta wona ta matimba. 3Wena ni masocha hinkwawo mi fanele ku famba mi rhendzeleka muti wa Yeriko kan'we hi siku, ku ringana masiku ya 6. 4Vaprista va 7 va ta rhwala timhalamhala, va famba emahlweni ka Areka. Kutani hi siku ra vu-7 mi ta rhendzeleka muti wa Yeriko ka 7, vaprista va ri karhi va ba timhalamhala. 5Loko mi twa va ba mhalamhala nkarhi wo leha, vanhu hinkwavo va fanele ku huwelela swinene, kutani rirhangu ra muti ri ta wela hansi, masocha ma nghena emutini, un'wana ni un'wana a kongoma laha a langutaneke na kona.” 6Kutani Yoxuwa n'wana Nuni a vitana vaprista a ku ka vona: “Rhwalani Areka ya Ntwanano, kutani vaprista va 7 va khoma timhalamhala ta 7, va famba emahlweni ka Areka ya HOSI Xikwembu.” 7Kutani a byela Vaisraele hinkwavo a ku: “Kongomani emahlweni, mi rhendzeleka muti wa Yeriko; rhangisani masocha emahlweni ka Areka ya HOSI Xikwembu.”
8Vaprista va 7 lava khomeke timhalamhala va famba emahlweni ka Areka ya HOSI Xikwembu, va ri karhi va ba timhalamhala, Areka ya Ntwanano wa HOSI Xikwembu yi ri karhi yi va landza hi le ndzhaku, hilaha Yoxuwa a leriseke vanhu hakona. 9Masocha wona a ma rhangile emahlweni ka vaprista lava a va ba timhalamhala, kasi varindzi vona a va ta hi le ndzhaku ka Areka, timhalamhala ti ri karhi ti biwa ti nga wisi. 10Kambe Yoxuwa a lerisa Vaisraele a ku: “Mi nga tshuki mi huwelela kumbe ku ba huwa, hambi ku ri ku vulavula kunene mi nga tshuki mi vulavurile, ku kondza ku fika siku leri ndzi nga ta mi lerisa leswaku mi huwelela; hi siku leri hi kona mi nga ta huwelela.” 11Kutani Yoxuwa a lerisa leswaku va rhendzeleka kan'we hi muti wa Yeriko va ri ni Areka ya HOSI Xikwembu, kutani va vuya va ta etlela emixaxeni.
12Yoxuwa a pfuka nimpundzu swinene, kutani vaprista va rhwala Areka ya HOSI Xikwembu. 13Vaprista lava va 7 lava khomeke timhalamhala ta 7, va rhanga emahlweni ka Areka ya HOSI Xikwembu va ri karhi va ba timhalamhala va nga wisi; masocha wona ma rhangile emahlweni, varindzi vona va ta hi le ndzhaku ka Areka ya HOSI Xikwembu, timhalamhala ti ri karhi ti biwa ti nga wisi. 14Hi siku ra vumbirhi va tlhela va rhendzeleka muti wa Yeriko kan'we, kutani va tlhelela emixaxeni. Va endlisa sweswo ku ringana masiku ya 6.
15Hi siku ra vu-7, Vaisraele va pfuka loko vurhonga byi tsuvuka va rhendzeleka muti wa Yeriko ka 7 hi mukhuva wun'we. Leri hi rona ntsena siku leri va nga rhendzeleka muti ka 7. 16Kuteloko va wu rhendzeleka ra vu-7, vaprista va ba timhalamhala, kutani Yoxuwa a ku ka Vaisraele: “Huwelelani, hikuva HOSI Xikwembu xi mi nyikile muti wa Yeriko. 17Muti lowu ni swilo hinkwaswo leswi nga ka wona swi ta nyiketiwa eka HOSI Xikwembu leswaku xi swi herisa; ku ta pona ntsena Rahava loyi wa nghwavava ni hinkwavo lava a nga na vona endlwini ya yena, hikuva yena ú tumbetile vanhu lava a hi va rhumile. 18Kambe n'wina mi nga tshuki mi tshinela kusuhi ni swilo leswi nyiketiweke leswaku swi herisiwa, hikuva mi nga tshuka mi swi navela, mi pambula swin'wana swa swona, kutani mi vangela mixaxa ya Vaisraele khombo ni ku herisiwa. 19Silivhere hinkwayo ni nsuku, ni swibya swa koporo ni swa nsimbhi swi hlawulekile eka HOSI Xikwembu; swona swi ta vekiwa evuhlayiselweni bya xuma xa HOSI Xikwembu.” 20Kutani Vaisraele va huwelela, timhalamhala na tona ti ri karhi ti biwa. Kuteloko Vaisraele va twa mpfumawulo wa mhalamhala, va huwelela swinene, kutani rirhangu ra muti ri wela hansi, Vaisraele va nghena emutini, un'wana ni un'wana a kongoma kwala a langutaneke na kona, kutani va teka muti wa Yeriko, 21va herisa hinkwaswo leswi a swi ri emutini hi fumu. Va dlayetela vavanuna ni vavasati, lavatsongo ni lavakulu, tihomu, ni tinyimpfu, ni timbhongolo.
22Kutani Yoxuwa a byela vavanuna vambirhi lava va nga ya va ya valanga tiko a ku ka vona: “Yanani endlwini ya wansati lowa nghwavava, mi fika mi n'wi humesa ni va ka vona hinkwavo hilaha mi nga n'wi tshembisa hakona hi ku hlambanya.” 23Kutani majaha lawa a ma ri tinhlori ma ya ma ya nghena endlwini ya Rahava, ma fika ma n'wi humesa, yena ni tata wa yena, ni mana wa yena, ni vamakwavo, ni va ka vona hinkwavo; kutani ma n'wi teka ni vanhu lava va ka vona hinkwavo ma ya va tshamisa ehandle ka mixaxa ya Vaisraele. 24Kutani va hisa muti wa Yeriko ni swilo hinkwaswo leswi a swi ri ka wona, kambe va teka silivhere ni nsuku ni swibya swa koporo ni swa nsimbhi va ya swi veka evuhlayiselweni bya xuma xa yindlu ya HOSI Xikwembu. 25Loko a ri Rahava lowa nghwavava ni ndyangu wa ka vona, ni va ka vona hinkwavo, Yoxuwa ú ponisile vutomi bya vona, kutani ku fikela ni namuntlha Rahava wa ha tshama etikweni ra Israele hi mhaka ya leswi a tumbeteke vanhu lava Yoxuwa a a va rhumile ku ya valanga muti wa Yeriko.
26Kutani enkarhini wolowu Yoxuwa a hlambanya, a ku: “Munhu loyi a nga ta tshuka a pfuxile muti wa Yeriko, ú ta rhuketeriwa emahlweni ka HOSI Xikwembu:
“Loko a aka masungulo ya wona,
ku ta fa n'wana wa yena wa mativula;
loko a yimisa tinyangwa ta wona,
ku ta fa n'wana wa yena wa rikotse.”
27HOSI Xikwembu a xi ri na Yoxuwa, kutani ku duma ka yena ku hangalaka ni tiko hinkwaro.
