Yoxuwa 15

₁Va ka Yuda va averiwile tindhawu ta vona hi ku ya hi mindyangu ya vona. Tiko ra vona hi tlhelo ra le dzongeni a ri navile ku ya fika endzilekaneni wa tiko ra Edomu, ni ku ya fika emananga ya Sini kwale dzongeni. ₂Ndzilekana wa vona hi tlhelo leri ra dzonga a wu sukela laha Lwandle-ra-ku-fa ri helelaka kona, ensongeni lowu languteke edzongeni. ₃Ndzilekana lowu wu famba wu ya ta hi le dzongeni ra xiphandze xa Akrabimi, wu hundza wu ya fika eSini; wu tlhandluka wu ya ta hi le dzongeni ra Kadexe-Bariniya, wu lulama na Hesironi, wu ya fika le Adara, kutani wu jika wu kongoma eKaraka. ₄Kutani wu tsemakanya wu kongoma le Asimoni, wu hundza wu ya ta hi le ndzilekaneni wa Egipta, wu ya helela elwandle. Lowu hi wona ndzilekana wa va ka Yuda wa le dzongeni.

₅Lwandle-ra-ku-fa hi rona ri nga ndzilekana wa le vuxeni, ku ya fika laha nambu wa Yordani wu helelaka kona. Ndzilekana wa le n'walungwini wu sukela ensongeni wa laha nambu wa Yordani wu helelaka kona. ₆Wu famba wu kongoma eBeta-Hogila, wu hundza wu ya ta hi le n'walungwini wa Beta-Araba, wu ya fika eribyeni ra Bohani n'wana Rhuveni. ₇Kutani ndzilekana wu tlhandluka wu sukela eka Nkova wa Akora wu kongoma eDebiri, hi tlhelo ra n'walungu; wu jika wu kongoma eGiligala, ku langutana ni xiphandze xa Adumimi lexi nga tlhelo ra dzonga ra nkova, kutani wu hundza wu kongoma etiveni ra Eni-Xemexi, wu ya helela le Eni-Rogele. ₈Kutani wu tlhandluka wu ta hi le ka Nkova wa Bene-Hinomu, hi tlhelo ra le dzongeni ra swintshabyana swa Vayebusi (hileswaku swa Yerusalema), kutani wu kongoma enhlohlorhini ya ntshava leyi langutaneke ni Nkova wa Hinomu, hi tlhelo ra vupeladyambu, laha nkova wa Refayimi wu helelaka kona hi tlhelo ra n'walungu. ₉Ku suka enhlohlorhini ya ntshava, ndzilekana wu rhelela wu kongoma exihlobyeni xa Nefitowaka; wu suka kona wu kongoma emitini leyi yi nga entshaveni ya Efroni, kutani wu jikela etlhelo ra Baala (hileswaku, Kiriyata-Yeyarimi). ₁₀Kutani ndzilekana wu rhendzeleka wu ta hi le vupeladyambu bya Baala, wu kongoma entshaveni ya Seyira, wu tsemakanya wu kongoma eswintshabyaneni swa le n'walungwini swa Yeyarimi (hileswaku Kesaloni), wu rhelela wu kongoma eBeta-Xemexe, wu tsemakanya hi le Timina; ₁₁ndzilekana wu hundza wu ya ta hi le xintshabyaneni lexi xi nga en'walungwini wa Ekroni. Kutani wu jika wu kongoma eXikeroni, wu hundza wu ya entshaveni ya Baala, wu tsemakanya wu ya fika eYabinele, wu ya helela elwandle. ₁₂Ndzilekana hi tlhelo ra vupeladyambu i lwandle ra Mediteraniya ni tindhawu leti nga eribuweni ra rona. Leyi hi yona mindzilekana ya va ka Yuda hi ku ya hi mindyangu ya vona.

₁₃Yoxuwa ú endlile hilaha HOSI Xikwembu xi n'wi leriseke hakona: A nyika Kalebe n'wana Yefune xiphemu xa yena exikarhi ka tiko ra va ka Yuda, wu nga muti wa Kiriyata-Araba, hileswaku Hebroni. (Araba a a ri tata wa Anaka.) ₁₄Kutani Kalebe a hlongola Vaanaka vanharhu, Xexani, na Ahimani, na Talimayi, va nga vana va Anaka, a va humesa emutini lowu. ₁₅Kutani Kalebe a suka eHebroni a ya hlasela muti wa Debiri lowu khale a wu vuriwa muti wa Kiriyata-Sefere. ₁₆Kutani Kalebe a ku: “Loyi a nga ta hlasela muti wa Kiriyata-Sefere a wu hlula, ndzi ta n'wi nyika Akisa n'wana wa mina leswaku a va nsati wa yena.” ₁₇Hiloko Otiniele n'wana Kenazi makwavo wa Kalebe a teka muti lowu, kutani Kalebe a n'wi nyika Akisa n'wana wa yena leswaku a va nsati wa yena. ₁₈Loko Akisa a hloma, Otiniele a n'wi kucetela leswaku a kombela nsimu eka Kalebe tata wa yena. Hiloko Akisa a xika embhongolweni ya yena, kutani tata wa yena a ku: “U lava yini xana?” ₁₉Akisa a ku ka yena: “Ndzi nyike nyiko; leswi u ndzi yiseke etikweni ra le dzongeni, ndzi kombela leswaku u ndzi nyika ni swihlovo swa mati.” Kutani Kalebe a n'wi nyika swihlovo leswi nga egangeni ni leswi swi nga enkoveni.

₂₀Leyi i ndzhaka ya va ka Yuda hi ku ya hi mindyangu ya vona. ₂₁Miti ya va ka Yuda leyi a yi ri emakumu ka tiko hi tlhelo ra le dzongeni kusuhi ni ndzilekana wa tiko ra Edomu hi leyi: Kabiziele, na Edere, na Yaguru, ₂₂na Kina, na Dimona, na Adada; ₂₃na Kedexe, na Hasoro, na Yitinana; ₂₄na Zifi, na Teleme, na Beyaloto; ₂₅na Hasoro-Hadata, na Keriyoti-Hesironi (hileswaku Hasoro); ₂₆na Amama, na Xema, na Molada; ₂₇na Hasari-Gada, na Heximoni, na Beta-Pelete; ₂₈na Hasari-Xuwala, na Berexeba, na Biziyotiya; ₂₉na Baala, na Iyimi, na Esemu; ₃₀na Elitolada, na Kesili, na Horma; ₃₁na Sikilaga, na Madimana, na Sanisana; ₃₂na Lebawoto, na Xilehimi, na Ayini, na Rimoni: Miti hinkwayo ni swimitana swa yona i 29.

₃₃Miti yi leyi nga etimbaleni hi leyi: Exitawulu, na Sora, na Axina; ₃₄na Zanowaka, na Eni-Ganimi, na Tapuwaka, na Enama; ₃₅na Yaramutu, na Adulama, na Soko, na Azeka; ₃₆na Xaarayimi, na Aditayimi, na Gedera, na Gederotayimi: Miti ni swimitana swa yona i 14.

₃₇Miti yin'wana hi leyi: Sanani, na Hadaxa, na Migidali-Gadi; ₃₈na Dileyani, na Mispe, na Yokitele; ₃₉na Lakixi, na Bosikata, na Egiloni; ₄₀na Kaboni, na Lahimasi, na Kitilixi; ₄₁na Gederoti, na Beta-Dagoni, na Naama, na Makeda; Miti ni swimitana swa yona i 16.

₄₂Miti yin'wana hi leyi: Libina, na Etere, na Axani; ₄₃na Yifita, na Axina, na Nesibi; ₄₄na Keyila, na Akizibi, na Marexa: Miti ni swimitana swa yona i 9.

₄₅A ku ri ni muti wa Ekroni ni swimitana swa wona, ₄₆ni miti hinkwayo leyi nga kusuhi na Axidodo ni swimitana swa yona ku sukela le Ekroni, ku ya etlhelo ra lwandle.

₄₇A ku ri ni muti wa Axidodo ni wa Gaza, ni miti ni swimitana swa yona. Miti leyi a yi katsa tindhawu leti ti fikaka endzilekaneni wa Egipta ni le lwandle ra Mediteraniya ni tindhawu leti nga eribuweni ra lwandle leri.

₄₈Emagangeni a ku ri ni miti leyi: Xamiri, na Yatiri, na Soko; ₄₉na Dana, na Kiriyata-Sana (hileswaku Debiri); ₅₀na Anabu, na Exitemoka, na Animi; ₅₁na Goxeni, na Holoni, na Gilo: Miti ni swimitana swa yona i 11.

₅₂Miti yin'wana hi leyi: Araba, na Duma, na Exana; ₅₃na Yanimi, na Beta-Tapuwaka, na Afeka; ₅₄na Humuta, na Kiriyata-Araba (hileswaku Hebroni), na Siyori: Miti ni swimitana swa yona i 9.

₅₅Miti yin'wana hi leyi: Mawoni, na Karmele, na Zifi, na Yuta; ₅₆na Yizriele, na Yokideyama, na Zanowaka; ₅₇na Kayini, na Gibeya, na Timina: Miti ni swimitana swa yona i 10.

₅₈Miti yin'wana hi leyi: Halahula, na Beta-Suru, na Gedori; ₅₉na Marati, na Beta-Anoto, na Elitekona: Miti ni swimitana swa yona i 6.

₆₀Miti yin'wana hi leyi: Kiriyata-Baala (hileswaku Kiriyata-Yeyarimi), na Raba: Miti ni swimitana swa yona i 2.

₆₁Emananga a ku ri ni miti leyi: Beta-Araba, na Midini, na Sekaka; ₆₂na Nibixani, na Iri-Melaka (hileswaku Muti-wa-Munyu), na Eni-Gedi: Miti ni swimitana i 6.

₆₃Va ka Yuda a va swi kotanga ku hlongola Vayebusi lava a va tshama eYerusalema, kutani ni namuntlha Vayebusi va ha tshama swin'we ni va ka Yuda eYerusalema.