Yobo 41

₁“Xana u nga phasa ngwenya

hi xinjovo,

ririmi ra yona u nga ri boha hi ngoti ke?

₂U nga yi hulela muhalo,

kumbe ku yi haka rhama hi mutwa xana?

₃Xana yi nga rila eka wena yi kombela ku tsetseleriwa,

kumbe yi nga vulavula na wena hi marito yo titsongahata xana?

₄Xana yi nga endla ntwanano na wena,

yi ku tirhela hilaha ku nga heriki ke?

₅U nga yi khoma kukota xinyanyana xana,

u yi nyiketa eka vana va wena va xisati, va tihuhela ha yona ke?

₆Lava yi phaseke, xana va nga yi xavisa,

van'wamabindzu va nga tsemelana yona ke?

₇Xana u nga yi tlhava hi tlhari,

kumbe ku yi haka nhloko hi xinjovo ke?

₈Loko u ringeta ku yi khoma kunene, u ta hatla u yi tshika,

u nge he engeti u lwa na yona!

₉La ehleketaka ku hlula ngwenya, wa tixisa,

ú ta wela hansi loko a yi vona.

₁₀Hambiloko munhu a kanya mbilu, a nge yi pfuxi!

Loko swi ri tano, emahlweni ka mina ku nga yima mani ke?

₁₁I mani la ndzi lombeke xanchumu lexi ndzi bohekaka ku n'wi tlherisela xona ke?

Hinkwaswo leswi nga hansi ka dyambu i swa mina!

₁₂“Ndza ha ta vula ta swirho swa ngwenya,

ni ta vunhenha bya yona, ni ku saseka ka xivumbeko xa yona.

₁₃I mani la nga yi ahlamisaka nomo,

kumbe ku yi tela ni matomu xana?

₁₄Xana i mani la nga tiyelaka ku yi anyula tinhlaya,

leswi meno ya yona ma chavisaka xana?

₁₅Mahakatimba enhlaneni wa yona i switlhangu swo tlhandlekelana,

ma khomana onge ma lemiwile kunene.

₁₆Leswi ma hlanganisiweke swinene,

moya a wu ngheni exikarhi ka wona.

₁₇Ma namarhelana ni ku khomana swin'we,

a ma namuleki nikutsongo.

₁₈Loko yi entshemula, ku vonaka swo vangama,

mahlo ya yona ma tshwukile kukota vurhonga.

₁₉Enon'weni wa yona, ku pfurha malangavi,

ku baleka ni tinhlahle ta ndzilo.

₂₀Etinhompfini ta yona ku mbuluka musi,

onge i wa mati layo virisiwa, kumbe wa tinhlanga leti tshwaka.

₂₁Ku hefemula ka yona ku pfurhisa makala,

malangavi ma huma enon'weni wa yona.

₂₂Ntamu wa yona wu le nhlaneni,

lava langutanaka na yona va rhurhumela.

₂₃Dzovo ra yona ri ni minkonya yo tala

leyi nga pfalekiki, onge i ya koporo leyi n'okisiweke.

₂₄Mbilu ya yona yi nonon'hwa kukotisa ribye,

yi fana ni ribye ro sila ha rona.

₂₅“Loko ngwenya yi huma ematini, hambi ti ri tinhenha, ta chava,

ti tsemeka nhlana, ti tlhelela ndzhaku.

₂₆Hambi ti ringeta ku yi tlhava hi fumu, a ti yi vavisi,

swi tsandza ni tlhari, kumbe khava, kumbe nseve.

₂₇Matlhari ya nsimbhi kumbe ya koporo, eka yona a hi nchumu,

i tinhlanga ntsena, kumbe mhandze leyi boleke.

₂₈Nseve wu nge yi tsutsumisi,

ni maribye ya xipelupelu ma hundzuka sava ntsena.

₂₉Xigombo xo va rihlanga eka yona,

yi hleka vuketleketle bya matlhari.

₃₀Ekhwirini ra yona, ku ni swirhengele leswi tlhavaka,

yi famba hi rona endzhopeni onge i xileyi.

₃₁Yi virisa xidziva kukota mbita,

lwandle yi ri phuphisa khuvi.

₃₂Laha yi hundzaka kona, ku sala ku hatima,

mati ya kona onge i timpfi.

₃₃Ku hava xo fana ni ngwenya laha misaveni,

xivumbiwa lexi a xi chavi nchumu!

₃₄Hi yona hosi ya swivandzana hinkwaswo,

hinkwaswo yi swi langutela hansi.”