Yobo 38

₂“U mani wena u solaka makungu ya mina

hi marito yo kala vutivi ke?

₃Tilulamise, u yima kukota wanuna,

ndzi ta ku vutisa timhaka, wena u ndzi hlamusela tona!

₄“Xana a wu ri kwihi, loko ndzi sungula ku vumba misava ke?

Leswi u twisisaka leswo tala, ndzi byele!

₅Misava yi vekeriwe hi mani mimpimo,

i mani la nga yi pima hi ngoti xana?

Ndza tshemba, wa swi tiva!

₆Xana tiphuphu ta yona ti dzimiwe ka yini,

ni ribye ra yona ra masungulo, ri simekiwile hi mani ke?

₇Esikwini rero, tinyeleti ta mixo a ti yimbelela hi nomo wun'we;

swivumbiwa swa le tilweni, a swi ba minkulungwana hinkwaswo.

₈“I mani la nga hingakanya timbanti,

a sivela lwandle siku ri velekiwaka xana?

₉Hi mina ndzi ri ambexeke mapapa,

ndzi ri phutsela hi munyama.

₁₀Ndzi ri vekele ndzilekana,

ndzi pfala timbanti ta rona, ndzi goga!

₁₁Ndzi te ka rona: ‘U ta tlhela kwala, a wu nga hundzi,

magandlati ya wena layo chavisa, ma ta yima kwala!’

₁₂“We Yobo, himpfhuka u velekiwa, u tshama u vitana vurhonga,

kumbe ku byi komba ndhawu ya byona ke?

₁₃Byi voninga misava ku ya fika evugimamusi,

byi hlongola vadyohi, va nga ha tumbeli.

₁₄Vurhonga lebyi bya tshwuka kukota xibya xa vumba endzilweni,

byi ambexa misava swa mavalavala.

₁₅Vadyohi va tlunya hi ku vonakala,

matimba ya vona ma herisiwa.

₁₆“Xana u tshama u fika laha ku nga ni xihlovo xa lwandle,

kumbe u ya valanga emakorhweni ya rona ke?

₁₇Xana u kombiwile tinyangwa ta xivandla xa vafi xana?

Ndhawu ya xinyami xo chavisa u yi vonile ke?

₁₈Xana ku anama ka misava, wa ku fanisa ke?

Leswi u tivaka hinkwaswo, ndzi byele!

₁₉“Xana ku vonakala ku tshama kwihi,

munyama wona wu kumeka kwihi ke?

₂₀U nga wu tlherisela endhawini ya wona ke,

ni tindlela leti kongomaka emutini wa wona, wa ti tiva xana?

₂₁Ina, wa ti tiva, hikuva u velekiwile khale,

malembe ya wena, a hi ku tala ka wona!

₂₂“Xana u tshama u nghena evuhlayiselweni bya gamboko,

kumbe ku vona laha xihangu xi hlengeletiwaka kona ke?

₂₃Swilo leswi ndzi swi hlayisela nkarhi wa maxangu,

wu nga nkarhi wo hlaseriwa hi valala.

₂₄Xana laha ku vonakala ku sukelaka kona, wa ku tiva xana?

Xana u tiva laha moya wa le vuxeni wu sukelaka kona loko wu ya ba emisaveni ke?

₂₅“I mani la nga boxela ndhambi endlela,

kumbe loyi a balekisaka tilo ke?

₂₆La nisaka mpfula emananga,

ri nga tiko ro pfumala vanhu,

₂₇la cheletaka ndhawu yo oma,

a hlukisela kona byanyi bya rihlaza, wa n'wi tiva ke?

₂₈“Xana mpfula yi na tatana ke,

i mani la tumbuluxeke mberha xana?

₂₉La nga veleka gwitsi,

a vangaka ni xirhami, i mani ke?

₃₀Enkarhini wa kona, mati ma hundzuka ribye,

swidziva swi tiya kukota xihangu.

₃₁“Xana u nga hlanganisa Xirimela ni tinyeleti ta xona,

kumbe ku hangalasa leti vandzakanaka na Mahlahle, xana?

₃₂Tinyeleti ta le vuxeni, xana u nga ti vitana hi nguva ya tona,

u nga lawula Gongomela ni vana va yena xana?

₃₃Milawu leyi fambisaka swivumbiwa swa le tilweni, wa yi tiva ke,

xana u nga yi tirhisa ku fuma misava xana?

₃₄“Xana u nga huwelela, u lerisa mapapa,

ma ku funengeta hi ndhambi ya mati ke?

₃₅Xana u nga rhuma rihati ku ya ba endhawini yo karhi,

ri hlamula ri ku: ‘Hi swona!’ xana?

₃₆I mani la byelaka magumba leswaku nambu wu ta tala,

ni mimfukwana leswaku mpfula ya ximun'wana ya ta xana?

₃₇Vutlhari byo hlaya ntsengo wa mapapa byi na mani ke?

Xana i mani la nga voyamisaka makhuwana ya le tilweni ma chulula mpfula,

₃₈leswaku ritshuri ri hundzuka ndzhope,

ni mabuwu ma tsakama ma namarhelana xana?”

₃₉“Xana nghala, u nga yi lavela nyama,

kumbe ku phamela vana va yona, va dya va xurha,

₄₀vona lava etlelaka emabakweni,

lava tumbelelaka swiharhi eswihlahleni xana?

₄₁I mani la tiselaka mawukuwuku swakudya swa wona;

loko mavondlo ya wona ma hela matimba hi ku twa ndlala,

ma rila eka mani ke?”