Yobo 37

na swona swifuwo swi tiva ku ta ka rona.

₁Tilo leri ra ndzi rhurhumerisa,

ri tshukisa ngopfu mbilu ya mina.

₂Yingisani Xikwembu loko xi dzindza,

twanani ku duma ka nomo wa xona,

₃loko xi balekisa tilo matlhelo hinkwawo!

Rihati ra xona ri ba ni le vugimamusi,

₄ri landziwa hi mpfumawulo wa ku baleka,

xi nga Xikwembu loko xi dzindzisa rito ra xona ro chavisa,

xi ba hi rihati xi nga tsetseleli, xi ri karhi xi twakarisa swa nomo wa xona.

₅Ku dzindza ka kona ka hlamarisa:

Mintirho ya Xikwembu i yikulu, a yi twisiseki.

₆Xi byela gamboko xi ku: ‘Wela emisaveni!’

Xi lerisa ni timpfula ku na hi matimba ti halaka kunene,

₇xi endlela ku komba mintirho ya xona eka vanhu hinkwavo.

Emasin'wini, a ka ha yi na un'we,

₈swiharhi na swona swa tumbela,

a swa ha humi emiceleni ya swona,

₉loko moya wa xidzedze wu ta hi le dzongeni.

Lowo titimela wona wu huma en'walungwini;

₁₀loko Xikwembu xi hungisa wona, wu vanga xirhami,

mati ma tiya hi gwitsi emaqhivini.

₁₁Kutani xi rhwala mapapa lawa ya ntima,

xi ma hangalasa ni rihati ra wona,

₁₂xi ma rhendzelekisa-rhendzelekisa hi ku ya hi makungu ya xona,

ma yingisa swileriso swa xona hinkwaswo, ematlhelweni hinkwawo ya ntumbuluko.

₁₃Xikwembu xi tirhisa wona ku tshinya tiko ra xona,

kumbe ku ri komba rirhandzu.

₁₄“We Yobo, yingisa mhaka leyi,

u ringeta ku anakanya mintirho yo hlamarisa ya Xikwembu:

₁₅Xana u tiva mafumele ya xona ehenhla ka ntumbuluko,

ni hilaha xi voningelaka mapapa hakona ke?

₁₆Xana wa xi twisisa loko xi ma hayeka empfhukeni,

hi vutivi lebyo hetiseka byo hlamarisa xana?

₁₇Wena u dlawaka hi dyambu,

siku tiko ri tshwaka hi moya wa le mananga,

₁₈xana u nga vamba lwangu ra tilo ku fana na xona ke,

ri tiya kukota nsimbhi yo vangama?

₁₉Hi pfune, xana hi nga xi byela yini ke?

Swo hlamula xona, hi nge swi kumi, hi le xinyamini!

₂₀Xana xi lo tivisiwa leswi ndzi swi vulaka xana,

xi lo byeriwa hi munhu un'wana leswaku xi ta swi tiva ke?

₂₁“Ku vonakala a ku nga ha vonaki,

a ku fihliwa hi mapapa,

kambe moya wu hungile wu ma kukula.

₂₂En'walungwini ku huma xilo xo vangama xo fana ni nsuku,

ku nga ku dzuneka loku chavisaka, loku rhendzelaka Xikwembu.

₂₃Xi ni matimba hinkwawo, hi nge tshineli kusuhi na xona;

xi fuma hi ntamu ni ku lulama,

xi tele ku tshembeka, xi nge xanisi munhu.

₂₄Hikokwalaho, vanhu va xi chava,

kambe a xi na mhaka ni lava titwaka va ri lavo tlhariha.”