Yobo 30

₁“Namuntlha ndzi hlekuriwa hi vanhu lava nga vatsongo eka mina.

Vatata wa vona a va ri swikamba,

va tluriwa hi timbyana leti risaka swifuwo swa mina.

₂Xana vanhu lava a va ta ndzi endlela yini,

leswi ntamu wa vona wu heleke, xana?

₃Va dlawa hi vusiwana ni tindlala,

va ko va lava swo phorha enhoveni, emunyameni wa mananga layo chavisa.

₄Va kha mihandzu ni matluka ya swimidyana,

timitsu ta kona i swakudya swa vona.

₅Va hlongoriwa va suka exikarhi ka vanhu,

va rhukaniwa kukota makhamba.

₆Va lava vutshamo emabakweni ya le nkoveni,

emakheleni lama ceriweke emisaveni, ni le maribyeni.

₇Emakhwatini, va rila kukota timangwa,

va tumbela swin'we eswihlahleni.

₈Vanhu lava vo pfumala ku twisisa, vo kala ndzhuti,

va hlongoriwile va suka etikweni.

₉“Namuntlha va ndzi hlekula hi tinsimu,

ndzi hundzukile xihlambanyiso eka vona.

₁₀Va ndzi monya, va ndzi fularhela,

a va chavi, va ndzi tshwutela marha.

₁₁Leswi Xikwembu xi ndzi heteke ntamu, ni ku ndzi tsongahata,

vanhu a va ha ndzi kombi xichavo.

₁₂Ntshungu wu ndzi tela hi le vokweni ra xinene,

wu ndzi hlongorisa,

wu tilulamisela ku ndzi herisa.

₁₃Va hingakanya vutomi bya mina,

va tikarhatela ku ndzi lovisa,

va nga siveriwi hi munhu.

₁₄Va boxile mbhovo leyikulu erirhangwini,

va hundza exikarhi ka marhumbi, va ndzi tela.

₁₅Ndzi wele hi makhombo layo chavisa,

ku chaviseka ka mina ku hahile ni moya,

ntsako wa mina wu dzudzekile kukotisa mberha.

₁₆“Namuntlha, vutomi bya mina bya ndzi sukela,

minkarhi ya maxangu yi ndzi fikerile.

₁₇Nivusiku, marhambu ya mina ma pandza,

switlhavi leswi swi ndzi dlayaka a swi miyeli.

₁₈Xikwembu xi handzulela xiambalo xa mina hi ntamu wa xona lowukulu,

xi ndzi tlimba nkolo kukota hembe.

₁₉Xi ndzi cukumetile endzhopeni,

ndzi languteka ndzi ri nkuma ni ritshuri.

₂₀“We Xikwembu, ndzi huwelela eka wena kambe a wu hlamuli;

loko ndzi yima emahlweni ka wena, wo ndzi languta kunene.

₂₁U hundzukile la nga ni nsele eka mina,

u ndzi ba ku tlula mpimo.

₂₂U ndzi tlakula hi xidzedze, xi famba na mina,

xi ndzi yisa hala ni hala hi huwa leyikulu.

₂₃Ndza swi tiva, u ndzi kongomisa esirheni,

exivandleni lexi vanhu hinkwavo va hlengeletiwaka eka xona.

₂₄“Hakunene, munhu la nga marhumbini, Xikwembu a xi n'wi khomi hi voko,

hambiloko a huwelela ekhombyeni ra yena!

₂₅Xana mina a ndzi nga rileli lava tikeriwaka,

vapfumari, a ndzi nga va tweli vusiwana xana?

₂₆Ndzi languterile leswinene, kambe ku humelerile leswo biha;

ndzi yimerile ku vonakala, kambe ku nghenile munyama.

₂₇Mbilu ya mina yi twa ku vava, a yi rhuli,

masiku ya maxangu ma ndzi kongomile.

₂₈Ndzi rhendzeleka ni nghohe yo tshwa, yi nga hisiwanga hi dyambu;

ndzi yima entshungwini, ndzi kombela ku pfuniwa.

₂₉Ndzi hundzuke makwavo wa timhungubye,

tiyimbhu i vanghana va mina.

₃₀Nhlonge ya mina yi tshwile, ya kwamuka,

marhambu ya mina ma pandza hi ku hisa.

₃₁Xitende xa mina xi suma swirilo,

ndzi chaya ta nkosi hi xitiringo.”