Yobo 20

₂“We Yobo, ndzi tlhavekile ngopfu emoyeni,

hikokwalaho ndzi bohekaka ku hatla ndzi hlamula,

₃hikuva ndzi twa marito ya mitwa lama ndzi tlhavaka,

kambe vutlhari bya mina byi ta ndzi pfuna ku hlamula.

₄“Wa swi tiva leswaku ku sukela khale,

loko Xikwembu xa ha ku veka munhu emisaveni,

₅minkulungwana ya lowo homboloka a yi hlweli ku hela,

ntsako wa loyi a rivalaka Xikwembu, i wa nkarhinyana ntsena.

₆Hambiloko a lehile ngopfu,

nhloko ya yena yi khumba ni mapapa,

₇ú ta lova a nyamala, kukota vulongo bya yena;

lava a va n'wi tiva, va ta vutisa va ku: ‘Sweswi ú le kwihi ke?’

₈Ú ta tihahela ku fana ni norho, a nga ha vonaki,

a hlongorisiwa kukota xivono xa vusiku.

₉Lava a va n'wi toloverile, a va nga ha n'wi voni,

ekaya ka yena, a nge he kumeki.

₁₀Vana va yena va ta rihela swisiwana,

ú ta boheka ku phakela rifuwo ra yena hi mavoko ya yena n'wini.

₁₁Hambiloko miri wa yena wa ha tiyile,

matimba lawa a nga na wona, ma ta lahliwa na yena esirheni.

₁₂“Leswo biha i swakudya leswo nandziha enon'weni wa munhu wo homboloka,

swin'wana ú swi veka hansi ka ririmi ra yena,

₁₃a nga pfumeli ku hambana na swona,

swin'wana a swi fundza kunene.

₁₄Kambe loko swakudya leswi swi fika ekhwirini,

swi hundzuka vuxungu bya xivatlankombe.

₁₅Ú mita rifuwo, a tlhela a ri hlanta,

Xikwembu xi ri humesa endzeni ka yena.

₁₆Leswi a swi nwaka i vuxungu bya xivatlankombe,

swa n'wi dlaya onge ú lo lumiwa hi mhiri.

₁₇Mati ya swinambyana a nge ma nwi,

milambu leyi khulukaka ntswamba ni vulombe, a nge yi voni.

₁₈Mihandzu ya ku tikarhata ka yena, a nge yi dyi.

a nge tiphini hi ntswalo wa bindzu ra yena,

₁₉hikuva ú xanisa swisiwana, a swi siya erivaleni;

ematshan'wini yo tiakela yindlu, ú teka va van'wana!

₂₀“Leswi a nga ni makolo, ni ku xurha a nga xurhiki,

a nge koti ku hlayisa leswi a swi tsakelaka.

₂₁Loko a dya, a nga siyeli mundzuku,

rifuwo ra yena ri ta hatla ri dzudzeka.

₂₂Hambiloko minkateko yi n'wi talerile, yi ta hela;

ú ta wela hi makhombo lamakulu.

₂₃Loko a ha ri eku dyeni, Xikwembu xi ta n'wi ba hi vukari bya xona lebyi hisaka;

swi ta va swakudya leswi xi n'wi phamelaka swona!

₂₄Ú ta balekela tlhari ra nsimbhi,

a ya tlhaviwa hi nseve wa koporo;

₂₅wu ta hlomuriwa enhlaneni wa yena,

wu huma wu ri karhi wu hatima hi nyongwa,

kutani a khomiwa hi ku chava.

₂₆Leswi a nga hlayiseriwa swona i xinyami ntsena,

ndzilo lowu tipfurhelaka hi woxe wu ta n'wi herisa;

leswi saleke emutini wa yena swi ta tshwa hinkwaswo.

₂₇Matilo ma ta paluxa ku dyoha ka yena,

misava yi n'wi pfukela yi lwa na yena.

₂₈Siku leri Xikwembu xi hlundzukaka ha rona,

nhundzu ya yena hinkwayo yi ta khukhuriwa.

₂₉Xikwembu xi ta herisisa sweswo munhu lowo homboloka,

hi yona ndzhaka leyi xi n'wi aveleke yona.”