Yohane 20

₁Nimpundzu wa siku ra Sonto, loko ka ha phumile, Mariya wa Magadala a ya esirheni, kutani a ya kuma leswaku ribye ri susiwile enon'weni wa sirha. ₂Kavaloko a tsutsuma, a ya ka Simoni Petro, ni ka mudyondzisiwa loyi un'wana loyi a a rhandziwa hi Yesu, kutani a ku ka vona: “Va susile Hosi esirheni, kutani a hi tivi lomu va nga n'wi lata kona.”

₃Hiloko Petro ni mudyondzisiwa loyi un'wana va suka va kongoma esirheni. ₄Va tsutsuma swin'we havambirhi; kambe mudyondzisiwa loyi un'wana a siya Petro hi ku tsutsuma, a rhanga a ya fika esirheni. ₅A korhama a hlometela, kutani a vona minceka yi ri ehansi; kambe a nga nghenanga. ₆Simoni Petro la n'wi saleke hi le ndzhaku, na yena a ta fika, kutani a nghena esirheni, a vona minceka yi ri ehansi; ₇kambe duku leri a ri tsondzerile nhloko ya Yesu a ri nga ri ni minceka leyi yin'wana, kambe a ri petsiwile, ri vekiwile hi tlhelo. ₈Endzhaku ka sweswo mudyondzisiwa loyi un'wana, la nga rhanga a fika esirheni, na yena a nghena a swi vona, kutani a pfumela. ₉(Hikuva a va nga si twisisa Tsalwa leri vulaka leswaku Yesu a a fanele ku pfuka eku feni.) ₁₀Kavaloko vadyondzisiwa va tlhelela emakaya.

₁₁Mariya a a yimile kusuhi ni sirha ehandle, a rila. Loko a korhama ku hlometela esirheni a ri karhi a rila, ₁₂a vona tintsumi timbirhi leti ambaleke swo basa, ti tshamile, yin'wana hi le tinhlokweni, yin'wana hi le milengeni, laha ntsumbu wa Yesu a wu latiwile kona. ₁₃Ti ku ka yena: “Manana, u rilela yini?” A ku ka tona: “Va susile Hosi yanga, kutani a ndzi tivi laha va n'wi lateke kona.” ₁₄Loko a vurise sweswo, a hundzuluka, kutani a vona Yesu a yimile, kambe a nga swi tivanga leswaku i Yesu. ₁₅Yesu a ku ka yena: “Manana, u rilele yini? U lava mani xana?” Yena, hi ku ehleketa leswaku i mutirhi wa laha ntangeni, a ku ka yena: “Hosi yanga, loko u n'wi susile, ndzi byele laha u n'wi lateke kona, kutani ndzi ta ya, ndzi ya n'wi teka.” ₁₆Yesu a ku ka yena: “Mariya!” Yena a hundzuluka, a ku ka Yesu, hi ririmi ra Xiheveru: “Rabuni!” (hileswaku “Mudyondzisi”). ₁₇Yesu a ku ka yena: “U nga ndzi khumbi, hikuva a ndzi si tlhandlukela eka Tatana; kambe yana eka vamakwerhu, u ya va tivisa leswaku ndzi tlhandlukela eka Tata wa mina, a nga Tata wa n'wina, eka Xikwembu xa mina, xi nga Xikwembu xa n'wina.” ₁₈Mariya wa Magadala a ya byela vadyondzisiwa leswaku ú vonile Hosi, ni leswaku yi n'wi byerile timhaka teto.

₁₉Madyambu ya siku rero ra Sonto, tinyangwa ta laha vadyondzisiwa va hlengeletaneke kona a ti pfariwile, hikwalaho ka ku chava Vayuda. Yesu a fika, a yima exikarhi ka vona, kutani a ku ka vona: “Ku rhula a ku ve na n'wina!” ₂₀Loko a vurise sweswo, a va komba swandla swa yena ni tsheve ra yena. Vadyondzisiwa va tsaka ngopfu loko va vona Hosi. ₂₁Yesu a engeta a ku ka vona: “Ku rhula a ku ve na n'wina! Tanihi leswi Tatana a ndzi rhumeke, na mina ndza mi rhuma.” ₂₂Loko a vurise sweswo, a va huhutela, a ku: “Amukelani Moya lowo Kwetsima. ₂₃Loko mi rivalela vanhu swidyoho swa vona, va ta rivaleriwa hakunene; loko mi nga rivaleli vanhu swidyoho swa vona, a va nga rivaleriwi.”

₂₄Tomasi, loyi va nge i “Hahla”, un'wana wa lava khume na vambirhi, a a nga ri na vona loko Yesu a tile. ₂₅Kutani vadyondzisiwa lava van'wana va ku ka yena: “Hi vonile Hosi.” Yena a ku ka vona: “Loko ndzi nga voni timbanga ta timhingu eswandleni swa yena, ni loko ndzi nga nghenisi ritiho ra mina etimbangeni ta timhingu, ndzi nghenisa ni xandla etsheveni ra yena, ndzi nga ka ndzi nga pfumeri.”

₂₆Loko ku hundzile masiku ya 8, vadyondzisiwa va tlhela va va kona endlwini. Tomasi na yena a a ri na vona. Yesu a ta, tinyangwa ti pfariwile, a yima exikarhi ka vona, a ku: “Ku rhula a ku ve na n'wina!” ₂₇Kutani a ku ka Tomasi: “Tisa ritiho ra wena la, u languta ni, swandla swa mina; tshambuluta xandla xa wena, u xi nghenisa etsheveni ra mina; u nga ha kanakani, kambe pfumela!” ₂₈Tomasi a n'wi hlamula, a ku: “Hosi yanga ni Xikwembu xanga!” ₂₉Yesu a ku ka yena: “Xana u pfumela hi leswi u nga ndzi vona xana? Va katekile lava pfumelaka, hambiloko va nga vonanga.”

₃₀Yesu ú endlile mahlori man'wana layo tala emahlweni ka vadyondzisiwa va yena, lama nga tsariwangiki ebukwini leyi. ₃₁Kambe timhaka leti ti tsaleriwile n'wina, mi ta ka mi pfumela leswaku Yesu i Mesiya, N'wana wa Xikwembu, ni leswaku, hi mhaka ya ku pfumela, mi va ni vutomi evitweni ra yena.