Yohane 19

₁Kutani Pilato a teka Yesu, a n'wi nyiketa leswaku va n'wi ba. ₂Kutani masocha ma luka harhi ya mitwa, ma yi tlhandleka enhlokweni ya yena, ma n'wi ambexa nguvu yo vangama ya xivunguvungu; ₃a ma tshamela ku ta, ma ku ka yena: “Xewani, hosi ya Vayuda!” Kutani a ma n'wi ba hi timpama.

₄Pilato a engeta a huma, a ku ka Vayuda: “Vonani, ndzi mi humesela yena, mi ta tiva leswaku a ndzi kumi nandzu ni wun'we eka yena.” ₅Yesu a huma, a tlhandlekiwile harhi ya mitwa enhlokweni, a ambarile nguvu yo vangama ya xivunguvungu. Pilato a ku ka vona: “Vonani, hi yoloye munhu wa n'wina!” ₆Loko vaprista lavakulu ni malandza va n'wi vona, va huwelela, va ku: “N'wi vambe! N'wi vambe!” Pilato a ku ka vona: “N'wi tekeni, n'wina hi n'wexe, mi ya n'wi vamba; hikuva mina a ndzi kumi nandzu eka yena.” ₇Vayuda va n'wi hlamula, va ku: “Hi ni nawu, kutani hi nawu wa hina ú fanele ku fa, hikuva ú tiendlile N'wana wa Xikwembu.” ₈Loko Pilato a twa sweswo, a chava ngopfu, ₉a tlhelela endlwini ya vuhosi, a ku ka Yesu: “U huma kwihi?” Yesu a nga n'wi hlamuli. ₁₀Pilato a ku ka yena: “Xana wa ala ku vulavula na mina xana? A wu swi tivi xana leswaku ndzi ni matimba ya ku ku ntshunxa, ni matimba ya ku ku vamba ke?” ₁₁Yesu a hlamula, a ku: “A wu nga ta va ni matimba ehenhla ka mina ni kutsongo, loko a wu nga nyikiwanga hi Tilo. Hikokwalaho, loyi a nga ndzi nyiketa eka wena, ú ni nandzu lowukulu ngopfu.” ₁₂Loko a twa sweswo, Pilato a lava ndlela yo n'wi ntshunxa; kambe Vayuda va huwelela, va ku: “Loko u ntshunxa munhu loyi, a wu munghana wa hosi Khezari; un'wana ni un'wana la tiendlaka hosi, ú lwa na Khezari.”

₁₃Loko Pilato a twa marito walawo, a humesela Yesu ehandle, kutani a tshama exitshan'wini xa ku avanyisa, endhawini leyi va nge i “Xiandlala-hi-maribye” (hi ririmi ra Xiheveru i “Gavata”). ₁₄A ri ri siku leri rhangelaka Paseka, kutani a wu lava ku va nkarhi wa nhlekanhi. Kutani Pilato a ku ka Vayuda: “Vonani, hi leyi hosi ya n'wina!” ₁₅Vona va huwelela, va ku: “N'wi suse! N'wi suse! N'wi vambe!” Pilato a ku ka vona: “Xana ndzi ta vamba hosi ya n'wina ke?” Vaprista lavakulu va hlamula, va ku: “A hi na hosi loko a nga ri Khezari ntsena.” ₁₆Hiloko Pilato a va nyiketa Yesu, leswaku a vambiwa.

Va teka Yesu, ₁₇kutani a huma a byarhile xihambano xa yena n'wini, a ya endhawini leyi a va ku i “Ndhawu ya Pala”, leyi hi Xiheveru va nge i “Gologota”. ₁₈Va n'wi vamba kwalaho, a ri ni van'wana vambirhi, un'wana hi tlhelo rin'wana, un'wana hi tlhelo lerin'wana, Yesu a ri xikarhi.

₁₉Pilato a tsala ni papila ra xitiviso, a ri nameka ehenhla ka xihambano. Leswi a swi tsariwile hi leswi: “Yesu wa Nazareta, hosi ya Vayuda.” ₂₀Vayuda lavo tala va hlaya xitiviso xexo, hikuva ndhawu leyi Yesu a nga vambiwela ka yona, a yi ri kusuhi ni muti; naswona, papila a ri tsariwile hi Xiheveru, ni Xilatini, ni Xigriki. ₂₁Hikokwalaho vaprista lavakulu va Vayuda va ku ka Pilato: “U nga tsali leswo: ‘Hosi ya Vayuda’, kambe tsala u ku: ‘Hi yena la nga te: Ndzi hosi ya Vayuda’.” ₂₂Pilato a hlamula, a ku: “Lexi ndzi nga tsala, ndzi tsarile!”

₂₃Loko masocha ma vambile Yesu, va teka tinguvu ta yena, va ti avanyisa hi swiputsa swa mune, va avelana swona; va teka ni nkhancu, kambe nkhancu wa kona a wu nga rhungiwanga, a wu lukiwile wu ri nguvu yin'we ku sukela ehenhla ku fikela ehansi. ₂₄Kutani va byelana, va ku: “Hi nga wu handzuleni, kambe a hi hoxeni vuhlolotwana, hi ta tiva leswaku wu ta va wa mani.” Leswi a ku ri ku hetisa Tsalwa leri nge:

₂₈Yesu, hi ku tiva leswaku swilo hinkwaswo swi hetisekile, a ku: “Ndzi ni torha”, ku ri ku hetisa Matsalwa. ₂₉Mbita leyi a yi tele hi ntsuvi a yi vekiwile kwalaho, kutani va peta xiponji xi tala hi ntsuvi, va xi tlhoma erihlangeni ra hisopa, va yisa enon'weni wa yena. ₃₀Loko Yesu a kumile ntsuvi lowu, a ku: “Swi hetisekile.” Kutani a korhamisa nhloko, a fa.

₃₁A ri ri siku leri rhangelaka Savata. Hikokwalaho, Vayuda va kombela Pilato leswaku milenge ya lava vambiweke yi tshoviwa, ni leswaku mintsumbu yi hawuriwa; leswi a ku ri ku endlela leswaku yi nga sali exihambanweni hi Savata, hikuva siku ra kona ra Savata a ri ri lerikulu. ₃₂Kavaloko masocha ma ta, ma tshova milenge ya lowo rhanga wa lava a va vambiwile na Yesu, ni ya loyi un'wana. ₃₃Kutani va ta eka Yesu, kambe loko va vona leswaku ú file, a va n'wi tshovanga milenge. ₃₄Hambiswiritano, un'wana wa masocha a n'wi tlhava tsheve hi tlhari, kutani kan'we-kan'we ku huma ngati ni mati. ₃₅Loyi a swi voneke, ú vula vumbhoni leswaku na n'wina mi ta kota ku pfumela. Vumbhoni bya yena byi tiyile, kutani wa swi tiva leswaku ú vula ntiyiso. ₃₆Hakunene timhaka leti ti humelerile leswaku Tsalwa ri hetiseka, leri nge: “A ku na rhambu na rin'we ra yena leri nga ta tshoviwa.” ₃₇Nakambe Tsalwa rin'wana ri ri: “Va ta hlalela loyi va n'wi tlhaveke.”

₃₈Endzhaku ka sweswo, Yosefa wa Arimatiya a kombela eka Pilato mpfumelelo wa ku ya hawula ntsumbu wa Yesu. Yosefa loyi a a ri mudyondzisiwa wa Yesu, kambe exihundleni, hi ku chava Vayuda. Kutani Pilato a n'wi pfumelela. Hiloko a ya hawula ntsumbu wa Yesu. ₃₉Nikodema, loyi a tshamaka a ta nivusiku eka Yesu, na yena a fika a tisa mafurha ya “mirha” lama pfanganyisiweke ni mhangani, lama lavaka ku ringana 30 kg, ku tika ka swona. ₄₀Kutani va teka ntsumbu wa Yesu, va wu phutsela hi minceka ni mirhi yo nun'hwela, hi mukhuva lowu Vayuda va lahlaka ha wona. ₄₁A ku ri ni ntanga endhawini leyi a nga vambiwa ka yona, kutani laha ntangeni a ku ri ni sirha lerintshwa, leri a ku nga si lahliwa munhu eka rona. ₄₂Va lata Yesu kona, hikokwalaho ka leswi Vayuda a va tilunghisela Savata, hikuva sirha a ro va kwala kusuhi.