Risimu ra Yuditi
1Kavaloko Yuditi a sungula ku yimbelela risimu ro nkhensa ni ku dzunisa emahlweni ka Vaisraele hinkwavo, kutani vanhu hinkwavo na vona va ri yimbelela. 2Risimu ra Yuditi hi leri:
“Sumani risimu ro dzunisa Xikwembu mi ba swingomana;
tlangelani HOSI yanga hi swiphambati swa tinsimbhi.
Yimbelelani risimu lerintshwa, mi dzunisa HOSI Xikwembu;
xi twariseni, mi vitana vito ra xona.
3Xikwembu i HOSI leyi herisaka tinyimpi;
xi ndzi kutsurile emavokweni ya lava a va ndzi hlongorisa,
xi ndzi tisa emixaxeni ya vanhu va yona.
4“Vaasiriya va rhelerile hi le tintshaveni ta le n'walungwini,
va ta ni tinhenha ta vona leto tala.
Masocha ya vona yo famba hi milenge ma tata minkova,
masocha ya vona yo gada tihanci ma funengeta ni swintshabyana.
5A va tinyungubyisa va ku va ta hisa tiko ra hina,
va dlaya majaha ya hina hi banga,
va fayetela ni swihlangi swa hina ehansi,
va khoma vana va hina va famba na vona,
va vutla ni vanhwana va hina hinkwavo.
6“Kambe HOSI Xikwembu xa matimba hinkwawo
xi va hlurile hi voko ra wansati.
7Nhenha ya vona a yi dlayiwanga hi majaha,
hambi swi ri swihontlovila a swi yi tlhavanga.
Yuditi n'wana wa xisati wa Merari, ú yi hlurile
hi vumbhurhi bya yena.
8Yuditi ú hluvurile swiambalo swa yena swa nkosi
ku dzunisa Vaisraele lava a va tshikileriwa.
A tota xikandza xa yena hi mafurha layo nun'hwela,
a boha misisi ya yena hi ngoti yo saseka,
a ambala xiambalo xo saseka ku xisa Holofani.
9Tintangu ta yena ti koka mahlo ya Holofani,
vumbhurhi bya yena byi khoma miehleketo ya yena,
banga ri tsema nhamu ya yena.
10Vaperesi va rhurhumela hikwalaho ka vunhenha bya Yuditi,
Vameda va hlamala ku tiya ka yena.
11Kutani vanhu va hina lava a va tshikileriwa va ba minkulungwana;
lava tsaneke va huwelela, kutani valala va vona va rhurhumela hi ku chava,
va tlakusa marito, valala va baleka.
12Vana va xinuna va malandza ya xisati va va tlhavile,
va va dlaya tanihi vana va mahlonga lava balekaka,
valala lava va herisiwa hi mavuthu ya HOSI Xikwembu xanga.
13“We Xikwembu xanga, ndzi ta yimbelela risimu lerintshwa, ndzi ku dzunisa.
We HOSI, u nkulukumba, naswona wa dzuneka,
u ni matimba yo hlamarisa, a wu hluriwi hi nchumu.
14Swivumbiwa hinkwaswo swa wena a swi ku tirhele,
hikuva wena u vulavurile, kutani swi va kona.
U swi huhutele moya, kutani swi tumbuluka;
ku hava la nga alelaka rito ra wena.
15Tintshava na lwandle swi ta ninginika emasungulweni ya swona ya le swidziveni;
maribye ma ta n'oka kukota mafurha emahlweni ka wena,
kambe lava va ku chavaka,
u ta va tsetselela minkarhi hinkwayo.
16Ku humeseriwa magandzelo hinkwawo lama nun'hwelaka, i mhaka leyitsongo eka wena,
hambi mafurha hinkwawo ya magandzelo lama hisiwaka, a hi nchumu eka wena.
Kambe la chavaka HOSI Xikwembu ú ta va nkulukumba hilaha ku nga heriki.
17“Khombo eka tinxaka leti pfukelaka vanhu va mina.
HOSI Xikwembu xa matimba hinkwawo xi ta tirihisela esikwini ra ku avanyisiwa ka vanhu;
xi ta rhumela ndzilo ni swivungu ku kavatlula miri wa vona;
va ta rila hi ku twa ku vava hilaha ku nga heriki.”
Ndhuma ya Yuditi
18Loko Vaisraele va fika eYerusalema, va gandzela Xikwembu. Xikan'we-kan'we loko vanhu va tibasisile, va humesa magandzelo lama hisiwaka ni magandzelo lawa va ngo ma humesa hi ku titwa ni tinyiko ta vona. 19Yuditi na yena a nyiketa eka Xikwembu swibya hinkwaswo swa Holofani leswi vanhu a va n'wi nyikile swona; xifunengeto lexi a a xi tekile emubedweni wa Holofani a xi humesela HOSI Xikwembu tanihi gandzelo leri a tiboheke hi ku hlambanya leswaku ú ta ri humesa. 20Vaisraele va endla nkhuvo wa tin'hweti tinharhu eXivandleni lexo hlawuleka, kutani Yuditi a a ri na vona.
21Endzhaku ka leswi, un'wana ni un'wana a timukela. Yuditi yena a tlhelela eBetuli, kutani a tshama endhawini leyi a siyeriweke yona hi nuna wa yena, a fundzhiwa evutomini bya yena hinkwabyo etikweni hinkwaro. 22Vo tala va naverile ku n'wi teka, kambe a tshama a ri noni evutomini bya yena hinkwabyo. 23Ndhuma ya yena yi engeteleka minkarhi hinkwayo, a dyuhalela endlwini ya nuna wa yena ku kondza a va ni malembe ya 105. A ntshunxa nandza wa yena wa xisati. A fela eBetuli, kutani va n'wi lahla kusuhi ni sirha ra nuna wa yena Manase. 24Vaisraele va n'wi rila masiku ya 7. Loko a nga si fa, a a averile rifuwo ra yena eka maxaka hinkwawo ya Manase ni le ka maxaka ya yena. 25Kutani a ku vanga na un'we la nga chavisa Vaisraele enkarhini hinkwawo wa ku hanya ka Yuditi, ni le malembeni yo tala endzhaku ka loko a khalutile.
