Risimu ra Debora
1Hi siku rero, Debora na Baraka n'wana Abinowama va yimbelela risimu, va ku:
2“A ku dzunisiwe HOSI Xikwembu,
hikuva varhangeri va kotile ku fambisa Vaisraele,
na rona tiko ri tirhile hi ku tinyiketa.
3N'wina tihosi, yingisani,
rhiyani ndleve n'wina tindhuna!
Ndzi ta dzunisa HOSI Xikwembu hi ku yimbelela,
ndzi ta twarisa HOSI Xikwembu xa Israele hi tinsimu.
4We HOSI, siku u sukeke eSeyira,
u huma exifundzheni xa Edomu,
misava a yi tsekatseka,
matilo ma nisa mpfula,
mapapa ma chulula mati;
5tintshava a ti ninginika
emahlweni ka wena HOSI Xikwembu xa le Sinayi,
emahlweni ka wena HOSI Xikwembu xa Vaisraele.
6“Enkarhini wa Xamgari n'wana Anati, ni wa Yaele,
va mabindzu a va nga ha famba-fambi,
lava tekaka tiendzo a va famba hi tindlela to rhendzeleka.
7Vaisraele a va pfumala varhangeri,
na un'we a ku ri hava,
ku kondza mina Debora ndzi humelela
ndzi va manana eka Vaisraele.
8Loko Vaisraele va hlawula swikwembu swin'wana,
nyimpi a yi pfurha etinyangweni ta vona.
Exikarhi ka vavanuna va Israele va 40 000,
a ku ri hava ni un'we loyi a a khome xitlhangu kumbe tlhari.
9Mbilu ya mina yi tlangela varhangeri va Israele
lava tinyiketeke ku tirhela tiko.
A ku dzunisiwe HOSI Xikwembu!
10“N'wina mi gadaka timbhongolo ta mantswele leto basa,
na n'wina mi tshamaka emasangwini layo saseka,
na n'wina mi endzaka, hangalasani timhaka leti.
11Twanani! Hambi lava kelelaka mati eswihlobyeni,
va huwelela va dzunisa mintirho yo lulama ya HOSI Xikwembu,
ni ya varhangeri va tiko ra Israele.
“Enkarhini wolowo, vanhu va HOSI Xikwembu
va tshirimukile va ya etinyangweni ta miti.
12“Khindlimuka, we Debora, pfuka!
Ndzi ri pfuka, pfuka u suma risimu!
Pfuka, we Baraka, u rhangela lava u va khomeke,
we n'wana Abinowama!
13Enkarhini wolowo, vanhu lava a va sele,
va rhelela va ya hlangana ni tindhuna ta vona;
vanhu va HOSI Xikwembu,
va rhelela hi vito ra xona kukota tinhenha.
14Lava hluleke Vaamaleke, i va ka Efrayimi;
va ka Benjamini va famba na n'wina va ka Efrayimi, va tihlanganisa ni varikwenu;
vafambisi va mavuthu va rhelela va huma eka Makiri,
va huma eka Zebuloni, lava tameleke nhonga ya vuhosi.
15Varhangeri va ka Isakara va ta na Debora,
kutani va ka Isakara va famba swin'we na Baraka,
va tshirimukela etimbaleni va ri karhi va n'wi landza hi le ndzhaku.
“Kasi exikarhi ka mintlawa ya va ka Rhuveni,
ku ni ku kanetana lokukulu, va ku:
16‘Xana mi salela yini emakaya,
mi yingisela yini varisi, loko va ri karhi va ba makhwela, va byisa mintlhambi, xana?’
Exikarhi ka mintlawa ya va ka Rhuveni,
ku ni ku kanetana lokukulu.
17Va ka Gadi va titshamerile entsungeni wa nambu wa Yordani.
Xana va ka Dani va tinamarhetela yini eka vatluti va tingalava, xana?
Va ka Asere va lo mbàà, eribuweni ra lwandle,
va tiakerile ehlalukweni ra vona.
18Va ka Zebuloni ni va ka Neftali,
hi vona va nga nyiketa vutomi bya vona va ya lwa nyimpi kwale magangeni.
19“Emutini wa Taanaka, kusuhi ni xihlovo xa Megido,
tihosi ti ta eku lweni,
hakunene, ta lwa tihosi ta Vakanana,
kambe a ti phanghanga nchumu xa silivhere.
20Tinyeleti ti lwa na Sisera, ti ri etilweni,
ti lwa na yena, ti ri emitileni ya tona.
21Va dyiwile hi mati ya xinambyana xa Kixoni,
xi nga xinambyana lexi hingakanyeke ndlela ya vona,
xona xinambyana xa Kixoni.
Wena, moya wanga, yana emahlweni,
u nga heli matimba!
22“Enkarhini wolowo, tihanci ta Sisera
ti baleka, ti ri karhi ti jaha swinene,
ti ba hansi hi swinondzwana.
23“Ntsumi ya HOSI Xikwembu yi ku:
‘Rhuketelani muti wa Merozo,
vaaki va wona, va rhuketeleni swinene,
hikuva a va tanga ku ta yima na HOSI Xikwembu,
a va xi lwelanga kukota tinhenha.’
24“Yena Yaele nkata Hebere lowa Mukeni
a a nkhensiwe exikarhi ka vavasati;
exikarhi ka vavasati lava tshamaka emintsongeni,
a ku nkhensiwe yena ngopfu!
25Loko Sisera a kombela mati,
Yaele a n'wi nyika ntswamba,
a n'wi tisela phehlwa
hi jomela ra vachaviseki.
26A teka mhingu ya ntsonga hi voko rin'wana,
hi lerin'wana a tamela nyundzu ya vatirhi;
a ba Sisera, a n'wi boxa nhloko,
a n'wi tlhava xipalapala, a xi cakanyetela.
27Sisera a nkhinsama hi matsolo, a wela hansi,
a ku nhàvàtàtà, emilengeni ya Yaele,
a fisa sweswo kwala a weleke kona.
28“Mana wa Sisera a hlometela a ri karhi a vilela,
a yimile efasitereni, a ku:
‘Kalichi ya yena yi hlwelela yini ku vuya,
hikwalaho ka yini mpfumawulo wa swinondzwana swa tihanci ta yena wu nga twakali, xana?’
29Vatswatsi lavo tlhariha va le ntsindza va n'wi hlamula;
na yena n'wini a tihlamula, a ku:
30‘Va ta va va ri eku phakelaneni ka leswi va swi phangheke:
Wanuna un'we a phakeriwa nsati un'we kumbe vambirhi,
nguvu leyi phanghiweke ya mavalavala yi ya eka Sisera,
nguvu leyi phanghiweke yo rhungeleriwa mavalavala hala ni hala, yi ta sasekisa nhamu ya nkosikazi!’
31“Wena HOSI Xikwembu,
valala va wena a va lovise sweswo,
kambe lava va ku rhandzaka a va ve ni ntamu
ku fana ni dyambu loko ri tlhava.”
Kutani ku va ni ku rhula etikweni ku ringana malembe ya 40.
