Vaavanyisi 16

₁Siku rin'wana, Samsoni a ya emutini wa Gaza, a fika a vona nghwavava, kutani a nghena endyangwini wa yona, a etlela kona. ₂Vaaki va muti wa Gaza va twa leswaku Samsoni ú kwala mutini wa vona. Hiloko va n'wi sivelela, va n'wi tumbelela vusiku hinkwabyo enyangweni ya muti va miyerile, va ehleketa leswaku va ta n'wi yimela ri kondza ri xa, va ta n'wi dlaya. ₃Kasi Samsoni a etlela ku fikela exikarhi ka vusiku ntsena, kutani a pfuka a ya enyangweni ya muti, a khoma timbanti ta kona, a ti kwamula swin'we ni marimba ya tona ni timhandze to goga ha tona, a rhwala hi makatla, a ya na swona enhlohlorhini ya xintshabyana lexi langutaneke ni muti wa Hebroni.

₄Endzhaku ka timhaka leti, Samsoni a rhandzana ni wansati loyi a va ku i Delila, loyi a a tshama kusuhi ni xinkobyana xa Soreke. ₅Tihosi ta Vafilista ti tlhandlukela eka yena, ti fika ti ku: “Ringeta ku xavelela Samsoni, a ku byela laha matimba ya yena lamakulu ma nga kona, leswaku hi ta tiva leswi hi nga n'wi khomisaka swona, hi n'wi boha, hi n'wi heta matimba. Un'wana ni un'wana wa hina ú ta ku nyika mali ya tisilivhere ta 1 100.” ₆Kutani Delila a ku ka Samsoni: “Ndzi kombela leswaku u ndzi byela laha matimba ya wena lamakulu ma nga kona. Xana loko munhu a lava ku ku heta matimba, ú fanele ku ku boha ha yini xana?” ₇Samsoni a n'wi hlamula a ku: “Loko vo ndzi boha hi tingoti ta vurha ta 7 leta ha tsakamaka, ndzi ta hela matimba, ndzi fana na vanhu van'wana.” ₈Hiloko tihosi ta Vafilista ti tisela Delila tingoti ta vurha ta 7 leta ha tsakamaka, kutani a boha Samsoni ha tona. ₉Delila a a tumbetile vavanuna va Vafilista endlwini ya le xikarhi; kutani a huwelela a ku: “Samsoni, pfuka, Vafilista hi lava!” Kutani yena a tsema tingoti leti, ti tsemeka ku fana ni tingoti ta ntsembyani loko ti tshwa hi ndzilo. Hikokwalaho, a ku vanga na loyi a tiveke xihundla xa matimba ya yena.

₁₀Kutani Delila a ku ka Samsoni: “Vona, u tlanga hi mina, u ndzi xisa. Ndzi kombela ntsena leswaku u ndzi byela hilaha u nga bohiwaka hakona.” ₁₁Kutani Samsoni a ku ka Delila: “Loko vo ndzi boha hi tintambhu letintshwa leti nga si tirhisiwaka, ndzi ta hela matimba, ndzi fana ni vanhu van'wana.” ₁₂Hiloko Delila a teka tintambhu letintshwa, a boha Samsoni ha tona, kutani a huwelela a ku: “Samsoni, pfuka, Vafilista hi lava!” Vavanuna lava n'wi tumbeleleke a va ri endlwini ya le xikarhi. Kambe Samsoni a tsema tintambhu emavokweni ya yena, ku fana ni loko a tsema xingotana xinene.

₁₃Kutani Delila a ku ka Samsoni: “Ku fika sweswi, wo ho tlanga hi mina, u ndzi xisa, ndzi byele hilaha u nga bohiwaka hakona.” Kutani Samsoni a ku ka yena: “Loko wo luka swijumba leswa 7 swa misisi ya mina hi tingoti, [u swi khomanisa hi ku swi belela ehansi hi mhingu, ndzi ta hela matimba, ndzi fana ni vanhu van'wana.” ₁₄Kuteloko a ha etlele, Delila a luka swijumba leswa 7 swa misisi ya Samsoni hi tingoti,] a swi khomanisa hi mhingu, kutani a ku ka Samsoni: “Samsoni, pfuka, Vafilista hi lava!” Kutani Samsoni a pfuka, a hlomula mhingu, ni xo lukela eka xona, a tsema ni tingoti.

₁₅Kutani Delila a ku ka Samsoni: “U ri wa ndzi rhandza, kasi mbilu ya wena a yi le ka mina. Sweswi i ra vunharhu ú ala ku ndzi byela laha matimba ya wena lamakulu ma nga kona.” ₁₆Delila a sindzisa Samsoni siku rin'wana ni rin'wana, a n'wi heta matimba hi marito ya yena, a nga ha koti ku tiyisela. ₁₇Kutani a boxela Delila xihundla xa yena, a ku ka yena: “A ndzi si tshama ndzi byewuriwa nhloko, hikuva ku sukela siku ndzi velekiweke, ndzi hlawuleriwile Xikwembu. Loko ndzo byewula nhloko, matimba ya mina ma ta hela, ndzi fana ni vanhu van'wana.”

₁₈Kuteloko Delila a vona leswaku Samsoni ú boxile xihundla xa yena, a rhuma vanhu va ya vitana tihosi ta Vafilista, va fika va ku: “Tlhandlukani mi ta haleno, hikuva Samsoni ú ndzi boxerile xihundla xa yena.” Kutani tihosi ta Vafilista ti suka ti ya eka Delila ti khomile mali. ₁₉Delila a etlerisa Samsoni ematsolweni ya yena, kutani a vitana wanuna un'wana a ta n'wi byewula swijumba leswa 7 swa misisi enhlokweni ya yena. Delila a sungula ku tlanga hi Samsoni, hikuva a a heleriwile hi matimba. ₂₀Kutani Delila a ku ka yena: “Samsoni, pfuka, Vafilista hi lava!” Kutani Samsoni a pfuka, a ku: “Ndzi ta huma ndzi famba ku fana ni leswi ndzi tshamaka ndzi endlisa swona. Ndzi ta tilwela!” Samsoni a a nga swi tivi leswaku HOSI Xikwembu a xi nga ha ri na yena. ₂₁Kutani Vafilista va n'wi khoma, va n'wi xokola mahlo, va rhelela na yena emutini wa Gaza, va fika va n'wi boha hi tinketani ta koporo, a hamba a sila mavele ekhotsweni. ₂₂Misisi ya Samsoni leyi a yi byewuriwile a yi ri karhi yi hluka.

₂₃Kutani tihosi ta Vafilista ti hlengeletana, ti endla nkhuvo lowukulu wo humesela xikwembu xa Vafilista lexi va nge i Dagona emagandzelo, ti cina, hikuva a ti ku:

₂₅Loko va pyopyiwile, va ku: “Vitanani Samsoni, a ta tlanga emahlweni ka hina.” Hiloko va ya teka Samsoni ekhotsweni, a fika a tlanga emahlweni ka vona, kutani va n'wi yimisa exikarhi ka tiphuphu. ₂₆Kutani Samsoni a byela jaha leri a ri n'wi khoma hi voko ri n'wi komba ndlela, a ku: “Ndzi tshinete kusuhi ni tiphuphu leti nga yimisa yindlu, leswaku ndzi ta tiseketela ha tona.” ₂₇Yindlu leyi a yi tele hi vavanuna ni vavasati. Tihosi hinkwato ta Vafilista a ti ri kona, hambi elwangwini ra yindlu leyi a ku ri ni vavanuna ni vavasati va kwalomu ka 3 000, lava a va hlalela Samsoni loko a ri karhi a tlanga.

₂₈Hiloko Samsoni a khongela eka HOSI Xikwembu, a ku: “We HOSI N'wini wanga, ndzi tsundzuke; ndzi kombela leswaku u ndzi nyika matimba ro hetelela, we Xikwembu, leswaku ndzi ta rihisela mahlo ya mina kan'we ntsena eka Vafilista.” ₂₉Kutani Samsoni a khoma tiphuphu timbirhi ta le xikarhi leti yimiseke yindlu, a tiseketela ha tona, voko ra xinene ri khoma yin'wana, lera ximatsi leyin'wana. ₃₀Kutani a ku: “Swa antswa ndzi fa ni Vafilista.” Hiloko a susumeta hi matimba, kutani yindlu yi wela tihosi ta Vafilista, ni vanhu hinkwavo lava a va ri endzeni ka yona. Vanhu lava Samsoni a va dlayeke siku a faka, va tlula lava a va dlayeke enkarhini wa ku hanya ka yena. ₃₁Kutani vamakwavo wa Samsoni ni va ka vona hinkwavo va rhelela va ya teka ntsumbu wa yena, va tlhela na wona va ya wu lahla esirheni ra Manowaka tata wa yena, exikarhi ka muti wa Sora ni wa Exitawulu. Samsoni ú vile murhangeri wa Vaisraele ku ringana malembe ya 20.