Esaya 5

₁Yingisani, ndzi yimbelela risimu

ra murhandziwa wanga,

hi tlhelo ra nsimu ya vhinya ya yena leyi a a yi rhandza.

Murhandziwa wanga a a ri ni nsimu ya vhinya

exintshabyanini xa misava yo nona swinene.

₂A a yi rimile a entisa, a susa maribye,

a byala swimila swo saseka ngopfu,

a aka xihondzo xa varindzi,

a kovotla ni khele ro pyanyela ka rona mihandzu;

a a langutele ku kuma mihandzu leyo nandziha,

kambe ku hume leyo bava.

₃Kutani nakulorhi ú ri:

“Sweswi ke, n'wina vaaki va Yerusalema,

na n'wina vanhu va Yuda,

tsemani mhaka ya mina

ni nsimu ya mina ya vhinya.

₄Xana a ka ha sele yini,

eka leswi a ndzi fanele ku swi endlela nsimu ya mina xana?

A ndzi languterile mihandzu leyo nandziha,

kutani hikwalaho ka yini yi humesile leyo bava xana?

₅“Hikokwalaho, yingisani ndzi mi byela

leswi ndzi nga ta swi endla ehenhla ka nsimu ya mina ya vhinya:

Ndzi ta ntlhantlha rihlampfu ra yona,

ndzi ri hahlulela kule,

leswaku swifuwo swi nghena swi dya,

swi tlhela swi etlela kona.

₆Ndzi ta yi tshika yi tlhumelana,

ndzi nga yi hlakuli,

ni vhinya ndzi nga yi tsheni,

ku ta mila mitwa ni swigatlu ntsena;

ndzi ta lerisa mapapa

leswaku ma nga ha nisi mpfula ensin'wini leyi!”

₇Vaisraele hi vona nsimu ya vhinya

ya HOSI ya matimba hinkwawo;

swimila swa yona leswi tsakisaka

i vanhu va Yuda;

HOSI Xikwembu a xi langutele ku lulama,

kambe ku vonaka ku dlayana ntsena,

a xi langutele leswinene,

kambe ko twala swirilo ntsena!

₈Mi ni khombo n'wina mi lavaka ku longoloxela tindlu,

n'wina mi tshamaka mi ri karhi mi engetelela masimu,

mi teketela tindhawu hinkwato ti va ta n'wina,

mi endlela ku tshama mi ri n'wexe etikweni.

₉HOSI ya matimba hinkwawo yi vurile

ndzi ri karhi ndzi swi twa, yi ku:

“Ndza hlambanya: Tindlu leto tala leti,

ti ta hundzuka marhumbi,

etindlwini letikulu leti to saseka,

ku ta sala ku nga ha ri na munhu.

₁₀Etindzimeni ta khume ta vhinya,

ku ta huma vhinyo yo tata khuwana rin'we ntsena;

saka ra mbewu ri ta humesa ntshovelo wa xirhundzu xin'we ntsena!”

₁₁Va ni khombo lava vindzukaka

va famba va hlota byalwa lebyo bava,

lava nwaka va tlhela va etlela kona,

byalwa byi kondza byi va hisa.

₁₂Eminkhubyeni ya vona va nwa vhinyo

va ri karhi va chaya switende hi tiharipa ni swingomana ni tinanga;

kambe mintirho ya HOSI Xikwembu a va na mhaka na yona,

ni leswi xi swi endleke, a va swi voni.

₁₃Hikwalaho, n'wina vanhu va ka hina,

mi ta yisiwa evuhlongeni hi mhaka yo pfumala vutivi,

vachaviseki va n'wina va ta fa hi ndlala,

ni ntshungu hinkwawo wu ta hela hi torha.

₁₄Xivandla xa vafi xi lote meno,

xi ahlamisa swinene nomo wa xona

leswaku xi ta mita varhangeri va Yerusalema ni ntshungu hinkwawo,

va nghena hinkwavo va ri karhi va ba huwa va tsakile.

₁₅Vanhu hinkwavo va ta wiseriwa ehansi va tsongahatiwa,

lava manyunyu vona va ta nyumisiwa.

₁₆Kambe HOSI Xikwembu xa matimba hinkwawo

xi ta dzunisiwa, hikuva xi avanyisa hi ku lulama;

hi xona Xikwembu lexo kwetsima

lexi kombaka ku hlawuleka ka xona hi ku endla leswi lulameke.

₁₇Kutani swinyimpfana swi ta dya emutini wa Yerusalema wonge hi le madyelweni ya swona,

marhumbi ma ta hundzuka madyelo ya swimbutana leswi noneke.

₁₈Va ni khombo vanhu lava rhambaka vubihi va byi koka hi tintambhu,

vona lava kokaka vudyoho ku fana ni loko va koka golonyi hi tinghole,

₁₉vona lava va nge: “Muhlawuleki wa Israele

a a hatlise a endla leswi a swi vulaka hi ta swi vona;

makungu ya yena a ma hatle ma humela rivaleni,

a ma humelele leswaku hi ta ma tiva.”

₂₀Va ni khombo lava tekaka swo biha va ku i swo saseka,

swo saseka, va ku i swo biha;

munyama va ku i ku vonakala,

ku vonakala va ku i munyama,

swo bava, va ku swa nandziha,

swo nandziha, va ku swa bava!

₂₁Va ni khombo lava tivonaka va tlharihile ngopfu

ni ku titshemba ku tlula mpimo.

₂₂Va ni khombo lava nga tinhenha eku nweni ka vhinyo,

ni lava nga ni matimba yo sweka byalwa byo bava.

₂₃Va ni khombo lava pfumelaka ku xaviwa, kutani va ntshunxa la nga ni nandzu,

kambe loyi a lulameke, va ala ku n'wi pfuna ehubyeni.

₂₄Leswi va fularheleke Nawu wa HOSI ya matimba hinkwawo,

va sola ni marito ya Muhlawuleki wa Israele,

va ta herisiwa kukota mavivi lama tshwaka,

va ta fana ni byanyi byo oma lebyi hisiwaka byi hela;

va ta kota murhi lowu boleke timitsu,

ku saseka ka vona ku ta haha kukota ritshuri.

₂₅Vukari bya HOSI Xikwembu bya pfurha ehenhla ka vanhu va xona;

xi tlakusile voko ra xona, xi ta va ba xi va dlaya;

tintshava ti ta ninginika,

mintsumbu ya vona yi ta ku, n'wálálálá, emagondzweni.

Hambiswiritano vukari bya xona a byi nga tlheli,

xa ha ta tlakusa voko ra xona, xi va ba.

₂₆HOSI Xikwembu xi ta tlakusa mujeko xi vitana vanhu va le kule,

xi ta va bela khwela, va ta va huma ematlhelweni hinkwawo ya misava;

vonani, hi lava va taka hi ku hatlisa, va ta hi ku tsutsuma.

₂₇Exikarhi ka vona, a ku na wo karhala

kumbe wo khuguka a wa;

ku hava wo twa vurhongo; a va etleli;

mabanti ya vona ni tintanghu, va bohile swi tiya.

₂₈Miseve ya vona yi tontswile swinene,

hinkwavo va tiyimisele ku copa,

tihanci ta vona ti ni swinyondzwana swo fana ni ribye lero nonon'hwa,

mavhilwa ya tigolonyi ta vona ma rhendzeleka wonge xo va xihuhuri.

₂₉Loko va bonga, wonge yo va nghala,

va vomba ku fana ni n'wana wa nghala,

va mpfhumpfha va bvanyangeta,

va rhwala lexi va xi khomeke, ku ri hava na loyi a nga xi vutlaka.

₃₀Hi siku ra kona, va ta mpfhumpfhela Vaisraele,

va ba huwa ku fana ni lwandle;

loko munhu a languta etikweni,

ú to vona munyama ni ku xaniseka ka vanhu ntsena,

munyama wu ta siva ku vonakala.