Esaya 4

₁Eminkarhini yoleyo, vavasati va 7 va ta namarhela wanuna un'we, va ku: “Swakudya ni swiambalo, hi ta tilavela; hi kombela ntsena ku va vasati va wena, hi susiwa tingana.”

₂Ri ta ta siku leri ximila xa HOSI xi nga ta hluka, xi saseka ni ku dzuneka; Vaisraele lava nga ta va va ponile, va ta tinyungubyisa, va tidzunisa hi leswi swi mileke etikweni. ₃Hinkwavo lava va nga ta va va ha hanya emutini wa Siyoni, lava nga ta va va ha kumeka eYerusalema, va ta vuriwa lava hlawulekeke, hikuva mavito ya vona ma ta va ma tsariwile eYerusalema, leswaku va hanya. ₄N'wini wa hinkwaswo ú ta avanyisa muti hi moya wa yena lowu hisaka, a susa vubihi bya vaaki va Siyoni, a hlantswa ni ngati leyi a yi halatiwile eYerusalema. ₅Muti hinkwawo lowu nga ntshaveni ya Siyoni, ni hinkwako laha vanhu va hlengeletanaka kona, HOSI Xikwembu xi ta swi funengeta hi papa ninhlekanhi, nivusiku xi ta swi funengeta hi musi ni ndzilo lowu pfurhaka. Ku kwetsima ka HOSI Xikwembu ku ta va xisirhelelo lexi khubumetaka muti matlhelo hinkwawo. ₆Loko ku hisa ninhlekanhi, vanhu va ta kuma ndzhuti lowu va nga ta wisa eka wona; ni loko ku ta swidzedze ni timpfula, va ta kuma ko tsutsumela kona, va ya tumbela.