Esaya 29

₁U ni khombo we Ariele, gandzelo ra Xikwembu,

we muti lowu hosi Davhida a goveke eka wona!

Ku ta hela lembe leri, ni leri taka,

ni minkhuvo ya kona yi ta dyiwa hinkwayo,

₂kutani mina HOSI, ndzi ta vangela muti wa Ariele emaxangu,

eka wona, ku ta twala nkosi ni swirilo ntsena,

muti lowu, ndzi ta wu endla “Ariele” hakunene.

₃N'wina va le Ariele, ndzi ta mi tela, ndzi fika ndzi gova,

ndzi mi rhendzela hi mavuthu,

ndzi aka ni rirhangu leri nga ta mi sivela ku baleka.

₄Mi ta va mi wele hansi,

loko mi vulavula, a mi nga twali;

swi ta endla wonge marito ya n'wina

ma huma hi le hansi ka misava,

mi ta n'unun'uta kunene ku fana ni munhu loyi a nga xivandleni xa vafi.

₅Kambe mitshungu-tshungu ya valala va n'wina, yi ta hlongoriwa kukota ritshuri leri hahaka;

lava va mi xanisaka, va ta hangalasiwa ku fana ni mavivi.

Hi xinkarhanyana,

₆HOSI ya matimba hinkwawo yi ta ta yi ta mi lwela;

tilo ri ta baleka, misava yi ninginika, ku va ni huwa leyikulu,

ni xidzedze, ni xihuhuri, ni ndzilo lowu pfurhaka.

₇Kutani mitshungu-tshungu ya vanhu va matiko hinkwawo lava lwaka na Ariele,

hinkwavo lava ringetaka ku hlasela muti ni makhokholo ya wona, va xanisa vaaki va wona,

va ta nyamalala kukota norho,

ku fana ni xivono xa vusiku.

₈Mitshungu-tshungu ya vanhu va matiko lava lwaka na muti wa Siyoni,

va ta fana ni munhu loyi a nga ni ndlala,

kutani a lorha a ri eku dyeni,

kambe loko a pfuka, a twa a ha ri ni ndlala;

va ta fana ni munhu loyi a twaka torha,

kutani a lorha a ri eku nweni ka mati,

kambe a pfuka a ha ri ni torha.

₉Dadavalani, mi tiendla madadada,

pfalani mahlo, mi tiendla lavo-fe-mahlo!

A mi nwanga vhinyo, kambe mi pyopyiwile,

ma dedeleka, kambe a mi nwanga byalwa!

₁₀HOSI Xikwembu xi mi huhuterile

moya wa vurhongo lebyikulu;

xi pfarile mahlo ya n'wina, va nga vaprofeta,

xi khubumeta ni tinhloko ta n'wina, va nga vamavonakule.

₁₃N'wini wa hinkwaswo ú ri:

“Vanhu lava vo vula hi milomo leswaku va le ku ndzi gandzeleni,

kambe marito ya vona yo ndzi dzunisa, a ma humi etimbilwini ta vona;

xichavo lexi va ndzi kombaka xona,

i ntolovelo lowu va nga lo dyondzisiwa hi van'wana.

₁₄Hikokwalaho, vanhu lava ndzi ta tlhela ndzi va hlamarisa,

va ta hlamala ku tlula mpimo;

vutlhari bya tintlhari ta vona byi ta nyamalala,

lavo twisisa exikarhi ka vona, va ta lahlekeriwa hi ku twisisa ka vona.”

₁₅Va ni khombo lava tumbetaka makungu ya vona, va tumbetela HOSI Xikwembu,

va nga vanhu lava endlaka swilo swa vona emunyameni, va ku:

“Xana ú kona loyi a hi vonaka?

I mani la tivaka lomu hi nga kona xana?”

₁₆N'wina mi pfilunganyisa swilo!

Xana muvumbi a nga fananisiwa ni vumba xana?

Xana xilo lexi munhu a xi endleke, xi nga vula xi ku:

“Mina a ndzi endliwanga hi yena” xana?

Kumbe loko munhu a tumbuluxe xilo, xana xi nga vula xi ku:

“A nga tivi nchumu” xana?

₁₇Ku nga ri khale, ntshava ya Lebanoni

yi ta hundzuka nsimu yo nona swinene,

nsimu leyi sweswi yi noneke,

yi ta hundzuka xihlahla.

₁₈Enkarhini wa kona, lava feke tindleve

va ta kota ku twa leswi hlayiwaka ebukwini,

ni lavo-fe-mahlo lava a va gugurhuteka exinyamini lexikulu,

va ta pfuleka mahlo, va vona.

₁₉HOSI Xikwembu xi ta tlhela xi nyika vapfumari ntsako lowu hetisekeke,

swisiwana swi ta kuma ku tsaka eka Muhlawuleki wa Israele.

₂₀Vanhu va tihanyi va ta nyamalala,

ni vasandzi a va nga ha vi kona,

lava va tshamaka va tiyimisele leswo biha,

va ta herisiwa hinkwavo, va ku bì!

₂₁Ku ta herisiwa hinkwavo lava lumbetaka van'wana,

ni lava yimelelaka swigevenga etihubyeni,

ni lava vulavulaka mavunwa

leswaku loyi a nga dyohangiki a dyiwa hi nandzu.

“Va ka Yakobo a va nga ha nyumi,

va nga ka va nga khomiwi hi tingana.

₂₃Loko vatukulu va Yakobo va vona leswi ndzi swi endleke exikarhi ka vona,

va ta twarisa vito ra mina,

Vaisraele va ta ndzi dzunisa

va ndzi komba xichavo, mina Xikwembu xa vona.

₂₄Vanhu vo oma tinhloko, va ta sungula ku twisisa,

lava a va tinonon'hwisa, va ta pfumela ku dyondzisiwa.”