Esaya 20

₁Lembe rin'wana, Sargoni hosi ya Asiriya a lerisa mufambisi wa mavuthu ku ya hlasela muti wa Axidodo, kutani a fika a wu hlula, a wu teka. ₂Loko timhaka leti ti nga si humelela, HOSI Xikwembu a xi vulavurile na Esaya n'wana Amotsi, xi ku: “Hluvula saka leri u ri ambaleke, u hluvula ni tintanghu.” Kutani Esaya a endlisa sweswo, a famba-famba a nga ambalanga nchumu emilengeni ni le mirini. ₃Kutani HOSI Xikwembu xi ku: “Esaya nandza wa mina ú famba-fambile malembe manharhu a nga ambalanga nchumu emilengeni ni le mirini, kutani a va xikombiso lexi hlamarisaka xo komba khombo leri nga ta wela Egipta na Etiyopiya. ₄Hi mukhuva wolowo, hosi ya Vaasiriya yi ta khoma Vaegipta ni Vaetiyopiya, lavakulu ni lavatsongo, va yisiwa evukhumbini va nga ambalanga nchumu emilengeni ni le mirini; va ta famba va lo dlú, va khomisa tiko ra Egipta tingana. ₅Hikokwalaho, vanhu lava a va tshemba Vaetiyopiya, lava a va tinyungubyisa hi Vaegipta, va ta tshuka ngopfu, va hlangana nhloko. ₆Kutani esikwini rero, vanhu lava vo tshama eribuweni ra lwandle, va ta ku: ‘Langutani leswi swi humeleleke vanhu lava a hi tshemba vona, lava a hi tsutsumela eka vona leswaku va hi ponisa eka hosi ya Asiriya! Xana hi ta ya kwihi sweswi ke?’ ”