Esaya 12

“Ndza ku tlangela, we HOSI,

hikuva hambileswi a wu ndzi hlundzukerile,

sweswi vukari bya wena byi rhelerile,

u tlhela u ndzi khongotela.

₂“Xikwembu i muponisi wa mina wa xiviri,

ndzi ta xi tshemba, a ndzi nga ha chavi nchumu;

HOSI Xikwembu i ntamu wa mina,

ndzi ta yimbelela ndzi dzunisa xona,

hikuva hi xona xi ndzi ponisaka.”

₃Mi ta hamba mi ka mati mi tsakile,

exihlobyeni lexi mi kumaka ku ponisiwa eka xona,

₄kutani eminkarhini yoleyo, mi ta ku:

“Tlangelani HOSI, mi khongela yona.

Byelani matiko leswi yi swi endleke,

ma tiviseni vukulu bya vito ra yona.

₅“Yimbelelani mi dzunisa HOSI,

hikuva yi tirhile leswikulu ngopfu,

vanhu hinkwavo va misava a va tivisiwe swona.

₆Banani minkulungwana, mi tsaka,

n'wina vaaki va Siyoni,

hikuva Xikwembu lexikulu, xona Muhlawuleki wa Israele,

xi tshama exikarhi ka n'wina.”