Hosiya 10

₁Vanhu va tiko ra Israele i murhi wa vhinya

lowu tswalaka ngopfu.

Kambe loko ntshovelo wa vona wu andza,

na tona tialitari, va aka ti andza;

loko tiko ra vona ri ya ri saseka,

na wona maribye ya vona ya vukhongeri bya hava va ma sasekisa.

₂Timbilu ta vona ti tele vukanganyisi,

kutani va ta dlawela milandzu ya vona.

Xikwembu xi ta mbindzimuxa tialitari ta vona,

xi fayetela ni maribye ya vona ya vukhongeri bya hava.

₃Sweswi vanhu lava va ri:

“A hi na hosi,

hikuva a hi yingisanga Xikwembu;

hambi a ho va na yona, a yi ta hi pfuna yini xana?”

₄Leswi va swi vulaka a swi humi etimbilwini ta vona;

loko va endla mintwanano, va tshembisa swilo leswi va nga ta ka va nga swi endli.

Hikokwalaho, maavanyisele ya vona ya timhaka ma bihile,

ma fana ni nhova leyi dlayaka swimilana emasin'wini.

₅Vaaki va Samariya va khomile hi gome,

va vilelela rhole ra le Beta-Avene;

va le ku rileni ka nkosi wa rona,

ni swiphukuphuku leswa vaprista va rona swi le ku kalakaleni,

hikuva ku dzuneka ka rona ku dzudzekile.

₆Rhole ra kona ri ta rhwariwa ri ya le Asiriya,

ri ta ya va ndzuvo eka hosi leyikulu.

Va ka Efrayimi va ta khomisiwa tingana,

vanhu va tiko ra Israele va ta nyuma hikwalaho ka xifaniso lexi xa vona.

₇Hosi ya Samariya yi ta lova,

yi fana ni makhukhuri ematini.

₈Switsunga leswo hlawuleka swa le Avene swi ta herisiwa,

kona exivindzini xa vudyoho bya Israele.

Etialitarini ta vona

ku ta mila mitwa ni mahlwehlwe.

Va ta byela tintshava va ku: “Hi funengeteni!”

ni le ka swintshabyana va ta ku: “Hi weleni henhla!”

₉N'wina vanhu va tiko ra Israele, mi dyohile, ku sukela enkarhini wa timhaka ta le Gibeya;

ni sweswi ma ha ya emahlweni na swona.

Xana nyimpi a yi nga mi teli

kwale mutini wa Gibeya xana?

₁₀Ndzi ta ta ndzi ta tshinya vanhu lava vo kala tindleve,

matiko ma ta hlengeletana ma lwa na vona

enkarhini lowu va nga ta tshinyeriwa milandzu ya vona mimbirhi.

₁₁Va ka Efrayimi a va fana ni mathokazi

lama thambisiweke, lama tsakelaka ku rima,

kutani a ndzi tsetselela tinhamu ta vona leto saseka;

kambe sweswi ndzi ta va tlhandleka joko,

va ka Yuda va ta fanela ku rima,

va ka Yakobo va ta tihlakulela.

₁₂Tibyaleleni ku lulama hi n'wexe,

kutani mi ta tshovela mihandzu ya tintswalo ta n'wina;

rimani masimu lawa mi ma tshetsheke,

hikuva hi wona nkarhi wa ku lava HOSI Xikwembu

leswaku xi ta ta xi ta mi nisela minkateko.

₁₃Manyala wona mi byarile,

ntshovelo wa n'wina i ku homboloka,

swakudya swa n'wina i mihandzu ya mavunwa,

hikuva mi tshemba makalichi ya n'wina ya nyimpi,

ni mavuthu ya n'wina layo tala.

₁₄Hikokwalaho ku ta humelela nyimpi exikarhi ka n'wina,

makhokholo ya n'wina hinkwawo ma ta mbundzumuxiwa,

ku fana ni loko Xalimani a mbundzumuxa muti wa Beta-Arabele

lowu vavasati ni vana va vona va phyandlaseriweke eka wona, hi siku leriya ra nyimpi.

₁₅Ni le ka n'wina va le Betele, swi ta endlisa sweswo,

hikuva vubihi bya n'wina bya chavisa.

Loko nyimpi ya ha ku sungula,

hosi ya tiko ra Israele yi ta dlayiwa.