Genesa 4

₁Adamu a tiva nsati wa yena Evha, hiloko Evha a tika, a veleka Kayini, kutani a ku: “Hi ku pfuniwa hi HOSI, ndzi kumile n'wana wa mufana.” ₂Evha a tlhela a veleka n'wana wa mufana, a nga Avele. Avele a a ri mufuwi wa tinyimpfu, Kayini yena a a ri murimi. ₃Siku rin'wana, Kayini a humesela HOSI Xikwembu gandzelo hi mihandzu ya masimu ya yena, ₄kasi Avele yena ú lo pambula swinyimpfana leswi noneke swa mativula exikarhi ka ntlhambi wa yena, a humesela HOSI Xikwembu. Kutani xona xi amukela Avele ni gandzelo ra yena, ₅kambe a xi vulanga nchumu hi Kayini ni gandzelo ra yena. Kutani Kayini a hlundzuka swinene, a visingarisa ni xikandza. ₆Kutani HOSI Xikwembu xi ku ka Kayini: “Xana u hlundzukela yini xana? Hikwalaho ka yini u visingarisa xikandza xana? ₇Xana loko wo endla leswinene, u nge tsakeriwi xana? Loko u nga endli leswinene, xidyoho xi ta ku bvutamela enyangweni, xi navela ku ku bvanyangeta, kambe u fanele ku xi hlula.”

₈Kayini a ku ka makwavo Avele: “A hi ye hala masin'wini.” Loko va ri kwale masin'wini, Kayini a hundzukela makwavo Avele, a n'wi dlaya. ₉Kutani HOSI Xikwembu xi vutisa Kayini xi ku: “Makwenu Avele ú kwihi xana?” Kayini a hlamula a ku: “A ndzi tivi; xana mina ndzi murisi wa makwerhu xana?” ₁₀Kutani HOSI Xikwembu xi ku: “Xana u endle yini xana? Ngati ya makwenu yi huwelela eka mina yi ri emisaveni! ₁₁Kutani sweswi u ta rhuketeriwa hi misava leyi yi ahlamiseke nomo yi amukela ngati ya makwenu loyi u n'wi dlayeke. ₁₂Loko u rima misava, a yi nga ha ku humeseli ntshovelo lowu ringaneke. Emisaveni a wu nga vi na kaya, u ta va mutsendzeleki.”

₁₃Kayini a ku ka HOSI Xikwembu: “Ku biwa ka mina i kukulu, a ku ndzi ringananga! ₁₄Vona, namuntlha u ndzi hlongorile laha tikweni, kutani ndzi ta va kule na wena. A ndzi nga ha vi na kaya, ndzi ta va mutsendzeleki laha misaveni. Un'wana ni un'wana loyi a nga ta ndzi kuma, ú ta ndzi dlaya.” ₁₅Kutani HOSI Xikwembu xi ku ka yena: “E-e, a swi nga vi tano! Loko un'wana a nga tshuka a ku dlele, ú ta riha ka 7.” Kutani HOSI Xikwembu xi fungha Kayini, hikuva loko a swi nga ri tano, munhu un'wana ni un'wana loyi a a ta hlangana na Kayini, a a ta n'wi dlaya. ₁₆Hiloko Kayini a suka emahlweni ka HOSI Xikwembu, a ya tshama etikweni ra Nodo, evuxeni bya Edeni.

₁₇Kutani Kayini a tiva nsati wa yena; hiloko nsati wa yena a tika, a veleka Enoko; kutani Kayini a aka muti, a wu thya vito ra n'wana wa yena Enoko. ₁₈Kutani Enoko a veleka Irada, Irada a veleka Mehuyaele; Mehuyaele a veleka Metuxaele; Metuxaele a veleka Lameke. ₁₉Kutani Lameke a teka vasati vambirhi. Mavito ya vona i Ada na Sila. ₂₀Kutani Ada a veleka Yabala, tata wa vafuwi lava tshamaka emintsongeni. ₂₁Makwavo wa Yabala a a ri Yubala, tata wa hinkwavo lava chayaka switende ni tinanga. ₂₂Sila a veleka Tubala-Kayini, mufuri wa switirho hinkwaswo swa koporo ni swa nsimbhi. Makwavo wa xisati wa Tubala-Kayini a a ri Naama.

₂₃Lameke a ku ka vasati va yena:

₂₅Kutani Adamu a tlhela a tiva nsati wa yena, kutani nsati wa yena a veleka n'wana wa mufana, a n'wi thya vito ra Seta, hikuva a a ku: “Xikwembu xi ndzi nyikile n'wana un'wana ku siva Avele loyi a dlayeke hi Kayini.” ₂₆Seta na yena a kuma n'wana wa mufana, kutani a n'wi thya vito ra Enosi. Enkarhini wa kona, vanhu va sungula ku khongela HOSI Xikwembu hi vito ra xona.