Genesa 11

₁Khale vanhu hinkwavo emisaveni a va vulavula ririmi rin'we, leri a ri ri ni marito yo fana. ₂Loko va ri karhi va tsendzeleka evuxeni, va kumile rivala etikweni ra Xinara, kutani va aka kona. ₃Kutani va byelana va ku: “Tanani, a hi endleni switina, hi tlhela hi swi hisa swinene.” Kutani ematshan'weni ya maribye va tirhisa switina, va swi khomanisa hi ntita. ₄Kutani va ku: “A hi tiakeleni muti, hi aka ni xihondzo lexi nga ta dliva tilo, leswaku hi ta tiveka, hi ta ka hi nga hangalasiwi emisaveni.” ₅Hiloko HOSI Xikwembu xi rhelela xi ta vona muti ni xihondzo lexi vanhu va tiakeleke xona, ₆kutani HOSI Xikwembu xi ku: “Vanhu lava i van'we, naswona va vulavula ririmi rin'we; kutani lawa mo va masungulo ya leswi va nga ta swi endla. Xin'wana ni xin'wana lexi va nga ta lava ku xi endla, xi nge va tsandzi. ₇A hi rheleleni, hi ya pfilunganyisa ririmi ra vona, leswaku va ta ka va nga ha twanani loko va vulavula.” ₈Kutani HOSI Xikwembu xi va hangalasa va suka emutini lowu, va ya emisaveni hinkwayo, va tshika ku aka muti. ₉Hiloko muti wa kona wu thyiwa vito ra Babele, hikuva HOSI Xikwembu xi pfilunganyisele kona ririmi ra vanhu va misava hinkwayo, xi va hangalasa va ya emisaveni hinkwayo.

₁₀Lava i vatukulu va Xeme. Loko ku hundzile malembe mambirhi endzhaku ka ndhambi ya mati, Xeme a a ri ni malembe ya 100, kutani a veleka Aripakixada. ₁₁Endzhaku ka loko Xeme a velekile Aripakixada, ú hanyile malembe ya 500. Ú vile ni van'wana vana va xinuna ni va xisati.

₁₂Loko Aripakixada a ri ni malembe ya 35, a veleka Xela. ₁₃Endzhaku ka loko Aripakixada a velekile Xela, ú hanyile malembe ya 403. Ú vile ni van'wana vana va xinuna ni va xisati.

₁₄Loko Xela a ri ni malembe ya 30, a veleka Ebhere. ₁₅Endzhaku ka loko Xela a velekile Ebere, ú hanyile malembe ya 403. Ú vile ni van'wana vana va xinuna ni va xisati.

₁₆Loko Ebere a ri ni malembe ya 34, a veleka Pelege. ₁₇Endzhaku ka loko Ebere a velekile Pelege, ú hanyile malembe ya 430. Ú vile ni van'wana vana va xinuna ni va xisati.

₁₈Loko Pelege a ri ni malembe ya 30, a veleka Rhewu. ₁₉Endzhaku ka loko Pelege a velekile Rhewu, ú hanyile malembe ya 209. Ú vile ni van'wana vana va xinuna ni va xisati.

₂₀Loko Rhewu a ri ni malembe ya 32, a veleka Serugi. ₂₁Endzhaku ka loko Rhewu a velekile Serugi, ú hanyile malembe ya 207. Ú vile ni van'wana vana va xinuna ni va xisati.

₂₂Loko Serugi a ri ni malembe ya 30, a veleka Nahoro. ₂₃Endzhaku ka loko Serugi a velekile Nahoro, ú hanyile malembe ya 200. Ú vile ni van'wana vana va xinuna ni va xisati.

₂₄Loko Nahoro a ri ni malembe ya 29, a veleka Tera. ₂₅Endzhaku ka loko Nahoro a velekile Tera, ú hanyile malembe ya 119. Ú vile ni van'wana vana va xinuna ni va xisati.

₂₆Loko Tera a ri ni malembe ya 70, a veleka Abrama, na Nahoro, na Harana.

₂₇Lava hi vona va ka Tera. Tera a a ri tata wa Abrama, na Nahoro, na Harana; kutani Harana a veleka Lota. ₂₈Harana ú lovile tata wa yena Tera a ha hanya, a lovela emutini wa Uru, etikweni ra Vakalediya leri a velekeriweke eka rona. ₂₉Abrama na Nahoro va teka vasati; nsati wa Abrama a a ri Sarayi, nsati wa Nahoro yena a a ri Milika, N'wa-Harana; makwavo wa Milika N'wa-Harana a a ri Yisika. ₃₀Sarayi a a ri mhika, a nga kumi vana.

₃₁Kutani Tera a teka n'wana wa yena Abrama, ni ntukulu wa yena Lota n'wana Harana, ni n'wingi wa yena Sarayi nkata Abrama, va rhurha emutini wa Uru etikweni ra Vakalediya, va kongoma etikweni ra Kanana, kambe loko va fika emutini wa Harana, vo aka va tshama kona. ₃₂Tera ú hanyile malembe ya 205, kutani a lovela emutini wa Harana.