Ezra 5

₁Muprofeta Hagayi na muprofeta Zakariya n'wana Ido va byela Vayuda lava akeke eYuda ni le Yerusalema marito ya Xikwembu xa Israele, xi nga Xikwembu lexi xi va fumaka. ₂Kutani Zerubabele n'wana Salatiele na Yexuwa n'wana Yosadaka, va sungula ku aka yindlu ya Xikwembu hi vuntshwa eYerusalema, va pfuniwa hi vaprofeta va Xikwembu.

₃Enkarhini wolowo, ku humelela Tatenayi ndhuna ya xifundzha xa le vupeladyambu bya nambu wa Yufrata, na Xetara-Bozenayi ni vanghana va vona, va fika va ku: “Mi nyikiwile hi mani mpfumelelo wo pfuxa yindlu leyi, ni ku aka rirhangu leri xana?” ₄Va tlhela va va vutisa va ku: “Mavito ya vanhu lava akaka yindlu leyi, i vamani xana?” ₅Kambe Xikwembu a xi sirhelela vakulukumba va Vayuda, kutani a va yimisiwanga entirhweni wo aka, loko mhaka ya ha yisiwa eka Dariyosi leswaku a ta yi hlamula hi papila.

₆Tatenayi ndhuna ya xifundzha xa le vupeladyambu bya nambu wa Yufrata, na Xetara-Bozenayi ni vanghana va yena ti nga tindhuna leti tshamaka kwale xifundzheni xexo, va tsalela hosi Dariyosi epapila, ₇va n'wi vikela mhaka ya kona hi ndlela leyi: “Eka hosi Dariyosi, xewani! ₈We hosi, hi ku tivisa leswaku hi yile exifundzheni xa Yuda, laha ku nga ni yindlu ya Xikwembu lexikulu; yindlu leyi yi le ku akiweni hi maribye lamakulu ni timhandze leti veketeriwaka exikarhi ka maribye lawa. Lava tirhaka va chivirika swinene, ntirho wa vona wu ya emahlweni. ₉Kutani hina hi vulavurile ni vakulukumba va kona, hi va vutisa hi ku: ‘Mi nyikiwile hi mani pfumelelo wo pfuxa yindlu leyi, ni ku aka rirhangu leri, xana?’ ₁₀Hi vutisile ni mavito ya vona leswaku hi ta ku tivisa wona, hi tsarile ni mavito ya lava va va fambisaka. ₁₁Kutani vona va hi hlamurile va ku: ‘Hina hi malandza ya Xikwembu xa matilo ni misava, kutani hi aka hi vuntshwa yindlu leyi a yi akiwile khale hi hosi leyikulu ya Israele. Yindlu ya kona a yi herile ku akiwa, ₁₂kambe yi mbundzumuxiwile hi Nebukadnetsara hosi ya Babilona lowa Mukalediya, kutani a teka ni Vayuda a va yisa evukhumbini eBabilona. Leswi swi humelerile hikuva vatata wa hina a va hlundzukisile Xikwembu xa matilo, kutani xi va nyiketile emavokweni ya Nebukadnetsara. ₁₃Hambiswiritano, hosi Korexe ú vekile nawu elembeni ro sungula ra ku fuma ka yena eBabilona, a lerisa leswaku yindlu ya Xikwembu yi tlhela yi akiwa hi vuntshwa. ₁₄Nebukadnetsara a a tekile swibya swa nsuku ni swa silivhere leswi a swi ri eTempeleni ya Xikwembu eYerusalema, a ya swi veka etempeleni ya le Babilona. Hosi Korexe ú humesile swibya leswi etempeleni ya le Babilona, a swi veka emavokweni ya Xexebasara loyi a a n'wi vekile ku va ndhuna ya yena, ₁₅a n'wi lerisa ku teka swibya leswi a ya swi veka eTempeleni leyi nga Yerusalema, a tlhela a vona leswaku yindlu ya Xikwembu yi akiwa hi vuntshwa endhawini ya yona ya khale. ₁₆Kutani Xexebasara loyi ú tile a ta sungula ku aka yindlu ya Xikwembu leyi nga Yerusalema; ku sukela enkarhini wolowo, yindlu ya ha ri eku akiweni, a yi si hela.’

₁₇“We hosi, loko u swi tsakela, lavisisa mhaka leyi etibukwini ta matimu ya tihosi eBabilona, kambisisa swinene, u vona loko hakunene hosi Korexe a tshama a veka nawu wa leswaku yindlu ya Xikwembu yi akiwa hi vuntshwa eYerusalema. Hi kombela leswaku u hi rhumela mavonele ya wena emhakeni leyi.”