Ezekiele 5

₁Xikwembu xi ku ka mina: “Wena munhu, tiendlele rikari hi banga ro kariha, u ri tirhisa ku byewula misisi ni malebvu, misisi ya kona u yi pima exikalwini, u yi avanyisa hi swiputsa swinharhu. ₂Xiputsa lexo rhanga, u ta xi hisa exikarhi ka muti, loko valala va ta va va sukile va nga ha wu rhendzeli; xiputsa xa vumbirhi, u ta xi tsemelela hi banga u ri karhi u famba-famba ehandle ka muti; xiputsa lexo hetelela, u ta xi tshika xi haha emoyeni, kutani mina ndzi ta hlomula fumu ra mina ndzi xi sala ndzhaku. ₃Kutani u ta teka misisinyana leyi saleke, u yi phutsela u yi hoxa exikhwameni; ₄eka yona, u ta pambula yin'wana, u yi hoxa endzilweni yi tshwa; ndzilo wa kona wu ta hangalaka wu hisa Vaisraele hinkwavo!

₅“Mina HOSI N'wini wa hinkwaswo ndzi vurisa sweswo ndzi ri: Muti wa Yerusalema, ma wu vona. Ndzi wu vekile exikarhi ka matiko, kutani wona ma wu rhendzerile. ₆Vaaki va muti lowu va arile ku yingisa swiletelo swa mina ni milawu ya mina; va endlile leswo homboloka ku tlula vamatiko hinkwavo lava va akelaneke na vona; hakunene Vaisraele va cukumetile swiletelo swa mina ni milawu ya mina, va ala ku swi yingisa. ₇Hikokwalaho mina HOSI N'wini wa hinkwaswo ndzi vulavula na n'wina va le Yerusalema, ndzi ri: Mi vanhu vo karhata ku tlula vamatiko lava akelaneke na n'wina. Mi arile ku yingisa milawu ni swiletelo swa mina; a mi swi hlayisanga, mi tsandzeka ni ku hlayisa milawu leyinene ya vamatiko. ₈Leswi timhaka ti nga yimisa leswi, mina HOSI N'wini wa hinkwaswo ndzi tiyisa leswaku ndzi ta lwa na n'wina, mina hi ndzexe; ndzi ta mi ba vamatiko hinkwavo va ri karhi va swi vona. ₉Ndzi ta mi endla leswi ndzi nga si tshamaka ndzi swi endla eka vanhu van'wana, naswona a ndzi nga ha tlheli ndzi swi endla; ndzi ta mi ba hikwalaho ka manyala hinkwawo lawa mi ma endleke: ₁₀Exikarhi ka n'wina, ku ta va ni vatatana van'wana lava nga ta dlaya vana va vona va va dya; naswona ku ta va ni vana van'wana lava nga ta dlaya vatata wa vona va va dya. Kutani lava nga ta pona exikarhi ka n'wina, ndzi ta va hangalasa va ya ematlhelweni hinkwawo ya misava. ₁₁Mina HOSI N'wini wa hinkwaswo, ndza tiboha hi ku hlambanya ndzi ri: Leswi mi nyamiseke Tempele ya mina hi swilo swa n'wina leswo nyangatsa ni manyala ya n'wina, ndzi ta mi byewula tinhloko, ndzi nga ha mi tsetseleli kumbe ku mi twela vusiwana. ₁₂Ndzi ta mi avanyisa hi mintlawa minharhu: Vanhu va ntlawa wo sungula va ta fa hi mintungu, va dlayiwa hi tindlala exikarhi ka n'wina. Va ntlawa wa vumbirhi va ta dlayiwa etinyimpini loko valala va hlasela muti wa n'wina. Kutani va ntlawa wo hetelela, ndzi ta va hangalasa va ya ematlhelweni hinkwawo ya misava, kutani ndzi ta hlomula fumu ra mina ndzi va hlongorisa.

₁₃“Vukari bya mina byi ta pfurha byi ya emahlweni; ndzi ta mi ba ndzi vuyelela, kutani loko swilo leswi swi humelela, mi ta swi tiva leswaku loyi a vulavulaka, hi mina HOSI ya rilaveta. ₁₄We Yerusalema, ndzi ta ku hundzula rhumbi ni xihlekiso eka vaakelani va wena ni ka vahundzi va ndlela hinkwavo. ₁₅Vanhu lava akelaneke na wena va ta ku hlekula va ku rhuketela, kutani u ta hundzuka xikombiso xo chavisa exikarhi ka vanhu, hikuva va ta vona ndlela leyi ndzi ku avanyisaka ni ku ku ba ha yona, eku hlundzukeni ka mina lokukulu. Ndzi vula sweswo mina HOSI. ₁₆Loko ndzi mi copa hi miseve ya mina leyi dlayaka, mi ta fa mi hela, mi herisiwa hi ndlala leyi ndzi nga ta mi vangela yona; ndlala ya kona yi ta ya yi kula swakudya swi ko swi nga ha kumeki emutini wa n'wina. ₁₇Ndzi ta vanga ndlala ndzi tisa ni swiharhi swa nhova, kutani swilo leswi swi ta dlaya vana va n'wina. Mi ta wela hi mintungu, mi hlaseriwa hi tinyimpi leti ndzi nga ta mi rhambela tona. Ndzi vula sweswo mina HOSI.”