Ezekiele 47

₁Mupimi a ndzi tlherisela enyangweni ya Tempele, kutani ndzi vona mati lama humaka ehansi ka xihukuva xa Tempele hi tlhelo ra le vuxeni (hikuva Tempele a yi languta evuxeni). Mati ya kona a ma huma enyangweni ya Tempele, evokweni ra xinene ra yona loko munhu a languta evuxeni, kutani ma hundza hi le vokweni ra xinene ra alitari. ₂Kutani mupimi a ndzi humesela handle ka Tempele hi nyangwa ya le n'walungwini, a ndzi rhendzelekisa hi kondza hi fika enyangweni ya xivava xa le handle leyi langutaka evuxeni; hiloko ndzi vona mati nakambe, ma khuluka ma huma evokweni ra xinene ra nyangwa.

₃Mupimi a famba a kongoma evuxeni a ri ni ngoti yo pima ha yona. Ku sukela enyangweni ya le vuxeni, a pima 500 m, kutani a ndzi lerisa ku pela; mati ya kona a ma fika emahlakaleni. ₄A tlhela a pima 500 m, a ndzi lerisa ku pela; mati ya kona a ma fika ematsolweni ya mina. A tlhela a pima 500 m, a ndzi lerisa ku pela; mati a ma fika exisutini. ₅A tlhela a pima 500 m, kutani ndzi kuma leswaku mati a ma hundzukile nambu lowu ndzi tsandzekaka ku wu pela, hikuva a wu tele ngopfu; munhu loyi a lavaka ku wu pela, a a fanele ku hlambela kunene! ₆Kutani mupimi a ku ka mina: “We Ezekiele, xana swilo leswi, wa swi vona xana?”

Kutani mupimi a ndzi tlherisela eTempeleni hi ku lulama ni ribuwu ra nambu. ₇Loko ndzi ri karhi ndzi tlhela, ndzi vona leswaku emagangeni ya nambu hala ni hala, a ku ri ni mirhi leyo tala. ₈Kutani mupimi a ku ka mina: “Mati lawa, ma khuluka ma kongoma etlhelweni ra le vuxeni ma kondza ma ya fika enkoveni wa Yordani, kutani ma ya nghena eLwandle-ra-ku-fa. Loko ma nghena elwandle leri, ma hundzula mati ya rona layo dzunga ma va layo nandziha. ₉Laha nambu lowu wu hundzaka kona, swivumbiwa leswo tala leswi hanyaka emisaveni swa tsaka, ku hanya ni tinhlampfi leto tala eka wona. Loko nambu lowu wu nghena eLwandle-ra-ku-fa, mati ya kona ma hundzuka layo nandziha. Naswona eminkarhini leyi taka, nambu lowu wu ta tisa vutomi hinkwako lomu wu nga ta hundza kona. ₁₀Vaphasi va tinhlampfi va ta yima eribuweni ra Lwandle-ra-ku-fa, ku sukela le Eni-Gedi ku ya fika le Eni-Gilayimi, va ta anekela kona tinkoka ta vona. Elwandle leri ku ta va ni tinhlampfi ta tinxaka-xaka leti fanaka ni ta Lwandle ra Mediteraniya. ₁₁Kambe emakorhweni ya Lwandle-ra-ku-fa, mati ma ta tshikiwa ma ri layo dzunga, leswaku vanhu va kuma munyu kona. ₁₂Emagangeni hinkwawo ya nambu hala ni hala, ku ta mila mirhi ya mihandzu yo hambana-hambana, yi va swakudya swa vanhu. Matluka ya mirhi ya kona a ma nga dzudzeki, ni mihandzu ya yona a yi nga kayiveli. N'hweti yin'wana ni yin'wana ku ta vupfa mihandzu leyintshwa, hikuva mati ya nambu lowu ma ta tshama ma ri karhi ma khuluka ma huma eTempeleni. Mihandzu ya kona yi ta va swakudya swa vanhu, matluka ya kona ma ta va murhi wo tshungula lava vabyaka.”

₁₃HOSI N'wini wa hinkwaswo ú vurisa sweswo ú ri: “Ndzi ta mi komba mindzilekana leyi mi nga ta yi ba etikweni; loko mi phakelana miganga ya rona hi ku ya hi tinyimba ta 12 ta Vaisraele, mi nga rivali ku phakela va ka Yosefa kambirhi. ₁₄Tiko leri, ndzi hlambanyile leswaku ndzi ta ri nyika vatata wa n'wina, hikokwalaho mi ta ri teka ri va ra n'wina, mi tsemelana miganga leyi ringanaka hi vukulu.

₁₅“Mindzilekana ya tiko yi ta va leyi: Hi tlhelo ra le n'walungwini, ndzilekana wu ta sukela eLwandle ra Mediteraniya, wu ta hi le Hetiloni loko wu ri karhi wu kongoma evuxeni, wu hundza exiphandzeni xa Hamata, ni le mutini wa Sedaka, ₁₆ni wa Beroto, ni wa Sibirayimi, exikarhi ka matiko ya Damaska ni ya Hamata, wu ya fika emutini wa Hasari-Hatikoni, kusuhi ni tiko ra Hawurana. ₁₇Hi mukhuva lowu, ndzilekana wa le n'walungwini wu ta sukela eLwandle ra Mediteraniya, wu kongoma evuxeni, wu ya helela emutini wa Hasari-Enana, wu siya matiko ya Damaska ni ya Hamata evokweni ra ximatsi. Ndzilekana wa le n'walungwini wu ta va wona lowu. ₁₈Hi tlhelo ra le vuxeni, ndzilekana wu ta sukela emutini wa Hasari-Enana, exikarhi ka matiko ya Hawurana ni ya Damaska, wu lulama ni nambu wa Yordani wu ri karhi wu kongoma edzongeni, wu hundza exikarhi ka muganga wa Giliyadi ni tiko ra Israele, wu ya fika eTamari kusuhi ni Lwandle-ra-ku-fa. Ndzilekana wa le vuxeni wu ta va wona lowu. ₁₉Hi tlhelo ra le dzongeni, ndzilekana wu ta sukela eTamari, wu kongoma eswihlobyeni swa Meriba-Kadexe, kutani wu jika wu lulama ni xinambyana xa Egipta, wu ya fika eLwandle ra Mediteraniya. Ndzilekana wa le dzongeni wu ta va wona lowu. ₂₀Hi tlhelo ra vupeladyambu, ndzilekana wu ta lulama ni Lwandle ra Mediteraniya, ku ya fika endhawini leyi langutanaka ni xiphandze xa Hamata. Ndzilekana wa le vupeladyambu wu ta va wona lowu.

₂₁“N'wina Vaisraele, mi ta phakelana tiko leri hi ku ya hi tinyimba ta n'wina. ₂₂Mi ta avelana miganga ya rona hi vuhlolotwana, mi nga rivali ni valuveri lava ku nga khale va akile exikarhi ka n'wina ni ku kuma vana va ri laha ka n'wina; mi ta amukela vanhu lava va ri vaakatiko ku fana na n'wina, va phakeriwa masimu ku fana ni Vaisraele va xiviri, etinyimbeni ta vona. ₂₃Mi ta va phakela masimu laha va tshamaka kona, emugangeni wa nyimba yo karhi ya Vaisraele. Ndzi vula sweswo, mina HOSI N'wini wa hinkwaswo.”