Ezekiele 40

₁Eku sunguleni ka lembe ra vu-25 hi ri evukhumbini, ri nga lembe ra vu-14 endzhaku ka ku hlaseriwa ka Yerusalema, esikwini ra vukhume ra n'hweti, HOSI Xikwembu xi ndzi khoma hi matimba ya xona; kutani esikwini rero, ₂xi ndzi fikisa etikweni ra Israele hi xivono, xi ndzi yimisa entshaveni leyo leha ngopfu. Hi tlhelo ra le dzongeni ra ntshava leyi, a ku vonaka leswi fanaka ni tindlu ta muti. ₃Xikwembu xi ndzi tshineta kusuhi na swona, kutani etlhelo ka muako wun'wana wa nyangwa, a ku yimile munhu la vangamaka kukota koporo, a tamele ngoti ya ntsembyani ni rihlanga ro pima ha rona. ₄Wanuna loyi a ku ka mina: “Wena munhu, pfula mahlo u rhiya ni ndleve, u ringeta ku tsundzuka hinkwaswo leswi ndzi nga ta ku komba swona, hikuva hi xona xikongomelo xa ku tisiwa ka wena haleno; kutani u ta ya tivisa Vaisraele hinkwaswo leswi u swi vonaka kwala.”

₅Ndzi rhanga ndzi vona xivandla xa Tempele xi rhendzeriwile hi rirhangu; rihlanga leri wanuna loyi a pimaka ha rona a ri lehile 3 m, kutani a pima rirhangu ha rona, a kuma leswaku rirhangu ra kona a ri lehile 3 m ku ya henhla, ri anamile 3 m. ₆Kutani a kongoma muako wa nyangwa ya le vuxeni, a tlhandlukela eka wona hi swikhandziyo, a pima ku anama ka xihukuva xa nyangwa ya kona, a kuma 3 m, wu ri wona mpimo wa xihukuva lexi xo sungula. ₇Muako wa nyangwa a wu ri ni makamari ya varindzi hala ni hala, kamari rin'wana ni rin'wana ri ri 3 m matlhelo hinkwawo; khumbi leri hambanisaka makamari rona a ri anamile 2,50 m. Kutani etlhelweni ra le ndzeni ra muako wa nyangwa laha wu langutanaka ni Tempele, a ku ri ni xihukuva xin'wana lexi a xi anamile 3 m, xi khomana ni rikupakupa. _8-9Wanuna la pimaka a pima na rona rikupakupa leri ra muako, a ri kuma ri lehile 4 m, ni tiphuphu ta rona ti bumburile 1 m; vanhu a va nghena ha rona exivaveni xa Tempele. ₁₀Endzeni ka muako wa nyangwa, a ku ri ni makamari manharhu ya varindzi hala ni hala, hinkwawo ma ringana hi vukulu; na wona makhumbi lawa ya ma hambanisaka a ma ringana hi ku anama ka wona. ₁₁Mupimi a pima ku leha ka muako hinkwawo wa nyangwa, a kuma 6,50 m; a pima ni ku anama ka wona a kuma 5 m. ₁₂Emahlweni ka makamari hinkwawo ya varindzi, lawa a ma ri 3 m matlhelo hinkwawo, a ku hingakanya makhumbinyana lawa a ma lehile 50 cm ku ya henhla. ₁₃Kutani mupimi a pima mpfhuka ku suka ekhumbini leri rhwalaka lwangu ra makamari ya tlhelo rin'wana ku ya fika ekhumbini leri rhwalaka lwangu ra makamari ya tlhelo lerin'wana, kutani a kuma 12,50 m; tinyangwa ta makamari lawa a ti langutene. ₁₄A pima ni ku leha ka rikupakupa ku ya henhla, a kuma 10 m. Xivava xa Tempele a xi rhendzela rikupakupa leri, leri a ri huma emahlweni ka muako wa nyangwa hi tlhelo ra le ndzeni. ₁₅Ku sukela etlhelweni ra le handle ra muako wa nyangwa ku ya fika etlhelweni ra le ndzeni, laha ku nga ni rikupakupa, a ku lehile 25 m. ₁₆Muako wa nyangwa a wu ri ni mafasitere matlhelo hinkwawo, ma anamile ehandle ku tlula endzeni ka wona; na rona rikupakupa a ri ri ni mafasitere, kutani tiphuphu ta rona a ti ri ni swifaniso swa mincindzu.

₁₇Kutani mupimi a ndzi yisa exivaveni xa le handle ka Tempele. Ematlhelo hinkwawo ya xivava lexi, a ku ri ni makamari yo 30, naswona a ku andlariwile maribye ya swiphepherhele emahlweni ka wona. ₁₈Maribye lawa ya swiphepherhele a ma khomana ni muako wa nyangwa, ma ringana na wona hi ku anama, ma andlariwile exivaveni xa le handle ka Tempele. ₁₉Kutani mupimi a pima mpfhuka ku suka etlhelweni ra le ndzeni ra nyangwa ya xivava xa le handle, ku ya fika emahlweni ka nyangwa ya xivava xa le ndzeni, a kuma 50 m.

Kutani mupimi a ndzi rhangela emahlweni a kongoma en'walungwini; ₂₀a ku ri ni muako wa nyangwa lowu langutaka en'walungwini, exivaveni xa le handle, kutani a pima ku leha ni ku anama ka wona. ₂₁Muako lowu a wu ri ni makamari manharhu ya varindzi, hala ni hala; makhumbi ya makamari lawa ni rikupakupa ra kona a swi ringana ni swa muako wa nyangwa leyo sungula, swi lehile 25 m, swi anamile 12,50 m. ₂₂Mafasitere ya kona, ni rikupakupa, ni mincindzu, a swi fana hi vukulu ni swa muako wa nyangwa lowu langutaka evuxeni; a ku ri ni swikhandziyo swa 7 emahlweni ka wona, naswona rikupakupa ra kona a ri ri etlhelweni ra wona ra le ndzeni. ₂₃Muako wa nyangwa ya le n'walungwini, a wu fana ni muako wa nyangwa ya le vuxeni: A wu langutene ni muako wa nyangwa ya xivava xa le ndzeni; loko mupimi a pima mpfhuka wa kona, a kuma 50 m.

₂₄Kutani mupimi a ndzi yisa etlhelo ra le dzongeni, laha ku nga ni muako wa nyangwa ya le dzongeni; kutani a pima makhumbi ya kona ni rikupakupa, a kuma leswaku a swi ringana ni miako leyin'wana hi vukulu. ₂₅A ku ri ni mafasitere matlhelo hinkwawo ya muako lowu, ni le rikupakupeni ra wona; mafasitere ya kona a ma fana ni laman'wana. Muako a wu lehile 25 m, wu anamile 12,50 m. ₂₆A ku ri ni swikhandziyo swa 7 emahlweni ka wona, ni rikupakupa etlhelweni ra wona ra le ndzeni, ni tiphuphu timbirhi leti nga ni swifaniso swa mincindzu, phuphu yin'wana evokweni ra ximatsi, yin'wana eka lera xinene. ₂₇A ku ri ni muako wa nyangwa hi tlhelo ra le dzongeni ra xivava xa le ndzeni; kutani mupimi a pima mpfhuka exikarhi ka nyangwa leyi ni nyangwa ya xivava xa le handle hi tlhelo ra le dzongeni, kutani a kuma 50 m.

₂₈Mupimi a nghena na mina hi muako wa nyangwa ya le dzongeni, a ndzi yisa exivaveni xa le ndzeni emahlweni ka Tempele, kutani a pima muako lowu wa nyangwa, a wu kuma wu ringana ni miako leyin'wana. ₂₉Makamari ya kona ya varindzi, ni makhumbi, ni rikupakupa, a swi ringana ni swa miako leyin'wana hi vukulu; naswona a ku ri ni mafasitere ematlhelo hinkwawo ya muako lowu, ni le rikupakupeni ra wona. Muako a wu lehile 25 m, wu anamile 12,50 m. ₃₀[Miako hinkwayo a yi ri ni rikupakupa leri leheke 12,50 m, ri anamile 2,50 m.] ₃₁Rikupakupa ra muako wa nyangwa leyi ya le dzongeni a ri langutana ni xivava xa le handle ka Tempele; tiphuphu ta rona a ti ri ni swifaniso swa mincindzu, naswona a ku ri ni swikhandziyo swa 8 emahlweni ka rona.

₃₂Kutani mupimi a ndzi yisa exivaveni xa le ndzeni hi nyangwa ya le vuxeni, a pima ni muako wa nyangwa ya kona, a kuma leswaku a wu ringana ni miako leyin'wana. ₃₃Makamari ya kona ya varindzi, ni makhumbi, ni rikupakupa, a swi ringana ni swa miako leyin'wana hi vukulu; naswona a ku ri ni mafasitere ematlhelo hinkwawo ya muako lowu, ni le rikupakupeni ra wona. Muako a wu lehile 25 m, wu anamile 12,50 m. ₃₄Rikupakupa ra muako wa nyangwa leyi ya le vuxeni a ri langutana ni xivava xa le handle ka Tempele; tiphuphu ta rona a ti ri ni swifaniso swa mincindzu, phuphu yin'wana evokweni ra ximatsi, yin'wana eka lera xinene; naswona a ku ri ni swikhandziyo swa 8 emahlweni ka rikupakupa.

₃₅Kutani mupimi a ndzi yisa emahlweni ka muako wa nyangwa ya le n'walungwini, a pima muako wa kona, a wu kuma wu ringana ni miako leyin'wana hi vukulu. ₃₆Makamari ya kona ya varindzi, ni makhumbi, ni rikupakupa, a swi ringana ni swa miako leyin'wana hi vukulu; naswona a ku ri ni mafasitere ematlhelo hinkwawo ya muako lowu; wona a wu lehile 25 m, wu anamile 12,50 m. ₃₇Rikupakupa ra muako lowu a ri langutana ni xivava xa le handle ka Tempele; tiphuphu ta rona a ti ri ni swifaniso swa mincindzu, phuphu yin'wana evokweni ra ximatsi, yin'wana eka lera xinene; naswona a ku ri ni swikhandziyo swa 8 emahlweni ka rikupakupa.

₃₈Endzeni ka muako wa nyangwa ya le n'walungwini, a ku ri ni kamari leri pfulekelaka erikupakupeni; ekamarini rero, a va hlantswa nyama ya swifuwo swa magandzelo lama hisiwaka. ₃₉Naswona erikupakupeni leri ra le nyangweni a ku ri ni matafula ya mune, mambirhi evokweni ra ximatsi, ni mambirhi eka lera xinene. Swifuwo swa magandzelo lama hisiwaka ni swa lama susaka swidyoho ni swa lama rihaka milandzu, a swi dlayeriwa ematafuleni lawa. ₄₀Emahlweni ka rikupakupa ra muako wa nyangwa ya le n'walungwini, a ku ri ni matafula man'wana ya mune, mambirhi evokweni ra ximatsi, mambirhi eka lera xinene. ₄₁Hikokwalaho, emahlweni ka muako wa nyangwa a ku ri ni matafula ya mune, ni le ndzeni ka wona a ku ri ni matafula man'wana ya mune, hinkwawo ma endla 8 lawa swifuwo swa magandzelo a swi dlayeriwa eka wona. ₄₂Naswona a ku ri ni matafula man'wana ya mune yo lunghisela eka wona magandzelo lama hisiwaka. Matafula lawa a ma endliwile hi maribye lama vatliweke, tafula rin'wana ni rin'wana ri anamile 75 cm matlhelo hinkwawo, ri lehile 50 cm ku ya henhla. Swibya leswi tirhisiwaka loko ku humesiwa magandzelo lama hisiwaka a swi vekiwa ematafuleni lawa. ₄₃Ekhumbini ra muako hinkwawo, a ku beleriwile timhingu leti a ti lehile 8 cm; nyama ya magandzelo yona a yi vekiwa ematafuleni lawa.

₄₄Kutani mupimi a nghena na mina exivaveni xa le ndzeni, a ndzi komba makamari mambirhi lawa a ma ri kona; rin'wana a ri ri etlhelo ra nyangwa ya le n'walungwini, ri languta edzongeni; rin'wana a ri ri etlhelo ra nyangwa ya le dzongeni ri languta en'walungwini. ₄₅Kutani a ku ka mina: “Kamari leri langutaka edzongeni i ra vaprista lava tirhaka eTempeleni; ₄₆kasi kamari leri langutaka en'walungwini rona i ra vaprista lava tirhaka alitarini; exikarhi ka va ka Levhi, i va ka Sadoki ntsena lava fanelaka ku tirhela HOSI Xikwembu alitarini.” ₄₇Kutani mupimi a pima xivava, a kuma leswaku a xi lehile 50 m, xi anamile 50 m, xi ringana matlhelo hinkwawo. Alitari yona a yi ri emahlweni ka Tempele. ₄₈Hiloko mupimi a nghena na mina erikupakupeni ra Tempele, kutani a pima ku bumbula ka tiphuphu ta rona letimbirhi, a kuma 2,50 m; a pima mpfhuka exikarhi ka tona a kuma 7 m; a heta hi ku pima makhumbi ematlhelo ka nyangwa, a kuma leswaku a ma anamile 1,50 m. ₄₉Rikupakupa hinkwaro a ri lehile 10 m, ri anamile 6 m. A ku ri ni swikhandziyo swa 10 swo nghena eTempeleni, ni tiphuphu tin'wana timbirhi, ehandle ka leta rikupakupa.