Ezekiele 3

₁Kutani la vulavulaka na mina a ku: “Wena munhu, teka buku leyi, u yi dya, endzhaku ka swona u ya vulavula ni Vaisraele.” ₂Hiloko ndzi pfula nomo, kutani a ndzi nyika buku leswaku ndzi yi dya. ₃A engeta a ku ka mina: “Wena munhu, mita buku leyi ndzi ku nyikaka yona, u tata khwiri ra wena!” Kavaloko ndzi dya: Enon'weni wa mina a yi nandziha kukota vulombe.

₄Kutani loyi a vulavulaka na mina a ku: “Wena munhu, yana eka Vaisraele u ya va tivisa leswi ndzi ku byelaka swona. ₅Ndzi ku rhuma eka Vaisraele, ku nga ri eka vanhu va ririmi rimbe leri u nga kotiki ku ri twisisa. ₆A ndzi ku rhumi eka mintshungu ya vamatiko lava vulavulaka tindzimi timbe to nonon'hwa, leti u nga ti twisisiki. Loko a ndzi ku rhuma eka vanhu vo tano, a va ta ku yingisa, ₇kasi Vaisraele va nga ka va nga ku yingisi, hikuva hambi a ri mina a va ndzi yingisi; hinkwavo i vanhu vo oma tinhloko, va timbilu to nonon'hwa. ₈Ndzi ku endla la tiyeke ku tlula vona, u nga chavi ku lwa na vona. ₉Ndza ku tiyisa ku fana ni dayimani, hikokwalaho u nga va chavi, naswona u nga chavisiwi hi ndlela leyi va ku langutaka ha yona, hikuva i vanhu lava tiarisaka.” ₁₀A engeta a ku ka mina: “Rhiya ndleve we Ezekiele, u yingisa hinkwaswo leswi ndzi ku byelaka swona, u swi hlayisa embilwini ya wena. ₁₁Kutani yana eka varikwenu lava nga vukhumbini; hambi va pfumela ku yingisa kumbe va nga pfumeli, va tivise leswaku mina HOSI N'wini wa vona ndzi ni rito eka vona.”

₁₂Kavaloko Moya wu ndzi tlakula, kutani ndzi twa rito lerikulu leri tsekatsekisaka misava, ri twakala endzhaku ka mina ri ku: “A ku nkhensiwe ku dzuneka ka HOSI Xikwembu, laha xi tikombaka kona.” ₁₃Ndzi twa ni mpfumawulo lowu vangiwaka hi swivumbiwa leswi hanyaka loko swi khumbana hi timpapa, ndzi tlhela ndzi twa mpfumawulo wa mavhilwa lama nga kusuhi ni swivumbiwa, wu tsekatsekisa ni misava. ₁₄Loko Moya wu ndzi tlakurile wu famba na mina, ndzi khomiwa hi gome ni ku vaviseka lokukulu, hikuva HOSI Xikwembu a xi ndzi khomile hi ntamu wa xona. ₁₅Kutani ndzi fika le Tel-Avhivhi kusuhi ni nambu wa Kebara, laha ku akeke lava yisiweke evukhumbini. Ndzi tshamile na vona masiku ya 7 ndzi nga vuli nchumu.

₁₆Loko ku hundzile masiku ya 7, HOSI Xikwembu xi vulavula na mina xi ku: ₁₇“Wena munhu, ndzi ku vekile ku va mulanguteri wa Vaisraele. Nkarhi wihi na wihi, u ta va tshinya hi vito ra mina, loko ndzi ta va ndzi vulavurile na wena. ₁₈Loko ndzi byela mudyohi ndzi ku: ‘Hakunene u ta fa!’ kambe wena u nga n'wi tsundzuxi kumbe ku n'wi tshinya, leswaku a tshika tindlela ta yena leto homboloka a ponisa vutomi bya yena, mudyohi yoloye ú ta fa hikwalaho ka swidyoho swa yena; kambe mina ndzi ta ku vona nandzu, emhakeni ya ku fa ka yena. ₁₉Kambe loko u tshinya mudyohi, kutani yena a ala ku hundzuka kumbe ku tshika tindlela ta yena leto homboloka, ú ta fa hikwalaho ka swidyoho swa yena; kambe wena u ta va u ponisile vutomi bya wena. ₂₀Nakambe loko munhu wo lulama a hambuka etindleleni ta yena leto lulama, kutani a sungula ku endla leswo biha, ndzi ta n'wi phija a wa, a fisa sweswo; munhu loyi ú ta fa hikwalaho ka swidyoho swa yena, ni mintirho ya yena leyo saseka a yi nga ha tsundzukiwi, kambe mina ndzi ta ku vona nandzu, emhakeni ya ku fa ka yena, hikuva u ta va u nga n'wi tshinyanga. ₂₁Kasi loko u tshinya munhu wo lulama leswaku a nga ha dyohi, kutani a ku yingisa a tshika ku dyoha, munhu loyi ú ta kuma ku hanya, kutani na wena u ta va u ponisile vutomi bya wena.”

₂₂Loko ndza ha ri exivandleni xexo, HOSI Xikwembu xi ndzi khoma hi matimba ya xona, kutani xi vulavula na mina xi ku: “Famba u ya erivaleni, kutani mina ndzi ta ta ndzi ta vulavula na wena kona.” ₂₃Hiloko ndzi suka ndzi kongoma erivaleni, ndzi fika ndzi kuma ku dzuneka ka HOSI Xikwembu ku ri kona, ku fana ni ku dzuneka loku ndzi ku voneke enambyeni wa Kebara, kutani ndzi wela hansi hi mombo. ₂₄Kavaloko Moya wu nghena eka mina, wu ndzi yimisa; kutani Xikwembu xi vulavula na mina xi ku: “Famba u ya tipfalela endlwini ya wena. ₂₅Wena Ezekiele, tiva leswaku vanhu va ta ku khoma va ku boha hi tintambhu, leswaku u nga ha famba-fambi exikarhi ka vona. ₂₆Ndzi ta namarheta ririmi ra wena emalakeni, leswaku u hundzuka mbheveve, u nga ha koti ku va tsundzuxa, hikuva vanhu lava va tiarisa ngopfu. ₂₇Kambe loko ndzi vulavula na wena, ndzi ta ku pfula nomo, kutani u ta va byela leswaku mina HOSI ndzi ni rito eka vona. Loyi a navelaka ku yingisa, ú ta yingisa; la alaka ú ta ala, hikuva i vanhu va ku sihalala.”