Xikwembu xi ta ba varhangeri va Yerusalema
1Kutani Moya wu ndzi tlakula, wu ndzi yisa enyangweni ya Tempele leyi languteke evuxeni. Kusuhi ni nyangwa leyi, a ku ri ni vavanuna va 25, kutani exikarhi ka vona, ndzi vona vakulukumba vambirhi va tiko, va nga Yaazaniya n'wana Azuri na Pelatiya n'wana Benaya. 2Kavaloko Xikwembu xi ku ka mina: “Wena munhu, vanhu lava hi vona lava bohaka makungu layo biha, lava byelaka Vaisraele ku endla leswo homboloka kwala mutini. 3Va ri: ‘A hi wona nkarhi wa ku tikarhata hi aka tindlu; muti lowu i mbita ya hina, hina hi nyama ya kona leyinene!’ 4Hikokwalaho wena muprofeta vulavula na vona. Va tshinye hi vuprofeta bya wena, wena Ezekiele!”
5Moya wa HOSI Xikwembu wu ndzi khoma hi matimba, wu ndzi lerisa ku ya vulavula ni va le Yerusalema, ndzi va byela marito ya Xikwembu lama nge: “Ina mi vula sweswo n'wina Vaisraele, ndza swi tiva; ndzi tiva ni leswi mi swi ehleketaka. 6Kasi muti wa Yerusalema wu tele hi vanhu lava mi va dlayeke; mintsumbu ya vona yi tatile magondzo ya kona. 7Hikokwalaho mina HOSI N'wini wa hinkwaswo ndzi ri, muti lowu i mbita hakunene, kambe yi tele hi vanhu lava mi va dlayeke; hikokwalaho mi ta humesiwa eka yona. 8Leswi mi chavaka matlhari ya valala, mina ndzi ta mi vangela wona. Ndzi vula sweswo, mina HOSI N'wini wa hinkwaswo. 9Ndzi ta mi humesa emutini wa Yerusalema, ndzi mi nyiketa emavokweni ya vamatiko, ndzi hetisa makungu ya mina ya ku mi ba. 10Mi ta dlayiwa hi matlhari emindzilekaneni ya tiko ra Israele; ndzi ta mi bela kona, kutani mi ta tiva leswaku HOSI Xikwembu, hi mina. 11Muti lowu wa Yerusalema a wu nga ha vi mbita ya n'wina, naswona a mi nga ha vi nyama ya kona leyinene, hikuva ndzi ta mi ba mi ri kule na wona, emindzilekaneni ya tiko ra Israele. 12Hi kona mi nga ta tiva leswaku mina ndzi HOSI, Xikwembu lexi mi aleke ku yingisa milawu ni swiletelo swa xona! A mi swi hlayisanga, kambe mi hlayisile swiletelo swa vamatiko lava mi akelaneke na vona.”
13Kutani loko ndzi ri karhi ndzi vulavula, Pelatiya n'wana Benaya o tshuka a lova. Hiloko ndzi wa hansi hi mombo, ndzi rila eka Xikwembu hi rito leri tlakukeke, ndzi ku: “Yo HOSI N'wini wanga, xana masalela ya Vaisraele, u lava ku ma herisela makumu xana?”
Xikwembu xi ta vuyisa lava nga vukhumbini
14Kutani HOSI Xikwembu xi vulavula na mina xi ku: 15“Wena munhu, tiva leswaku wena ni vamakwenu ni maxaka ya n'wina hinkwawo, va nga Vaisraele hinkwavo lava rhurhisiweke, ma xisiwa hi lava nga sala eYerusalema, hikuva va mi byela va ku: ‘Tshamani laha mi nga kona, kule na HOSI Xikwembu; tiko leri, hi lo nyikiwa, i ra hina sweswi!’ 16Hikokwalaho byela Vaisraele leswaku hakunene hi mina HOSI N'wini wa vona loyi a va hangalaseke, ni ku va yisa kule ematikweni ya vanhu vambe; hambiswiritano malembenyana lawa a ndzi tshikanga ku va Tempele ya vona mina n'wini. 17Naswona, va byele leswaku mina HOSI N'wini wa vona ndzi ta tlhela ndzi va hlengeleta, ndzi va humesa ematikweni lawa va hangalasiweke va ya eka wona; ndzi ta tlhela ndzi va nyika tiko ra vona ra Israele. 18Loko va fika etikweni rero, va ta susa swilo hinkwaswo leswo nyangatsa swa manyala leswi endliwaka eka rona. 19Kutani ndzi ta va nyika ku twanana, va va ni mbilu yin'we ni miehleketo leyintshwa. Ndzi ta susa timbilu ta vona leto nonon'hwa, ndzi va nyika timbilu to olova leti yingisaka. 20Hikokwalaho va ta hlayisa milawu ya mina ni swiletelo swa mina, va famba ha swona, kutani va ta va vanhu va mina, mina ndzi va Xikwembu xa vona. 21Kambe lava nga ta tiomisa tinhloko va ya emahlweni ni mintirho ya vona leyo nyangatsa ya manyala, ndzi ta va ba ndzi va endla leswi va swi endleke eka van'wana. Ndzi vula sweswo mina HOSI N'wini wa vona.”
Ta ku dzuneka ka Xikwembu loko ku suka eYerusalema
22Kutani tikerubu ti phurumula timpapa ti haha, mavhilwa ma ti namarhele. Ku dzuneka ka Xikwembu xa Israele a ku ti ungamerile. 23Kavaloko ku dzuneka loku ka HOSI Xikwembu ku suka exikarhi ka muti wa Yerusalema, ku ya tshama entshaveni leyi nga vuxeni bya muti. 24Kutani Xikwembu lexi tikombeke ka mina hi xivono, xi ndzi tlakula hi Moya wa xona loko ndza ha ri exivonweni, xi ndzi tlherisela etikweni ra Vakalediya exikarhi ka lava nga vukhumbini. Hiloko xivono lexi ndzi kombiweke xona xi nyamalala. 25Kutani ndzi hlayela va le vukhumbini etimhaka hinkwato leti HOSI Xikwembu xi ndzi kombiseke tona.
