Eksoda 8

₁Kutani HOSI Xikwembu xi ku ka Muxe: “Famba eka Faro, u ya n'wi byela leswaku mina HOSI Xikwembu ndzi vurisa sweswo, ndzi ri: ‘Tshika vanhu va mina va famba va ya ndzi gandzela. ₂Loko u ala ku va tshika va famba, ndzi ta ba tiko ra wena matlhelo hinkwawo hi khombo ra mintlambya. ₃Nambu wu ta tala hi mintlambya, yi kondza yi huma yi ta emutini wa wena, ni le ndlwini ya wena, ni le masangwini ya wena, ni le tindlwini ta malandza ya wena, ni le ka vanhu va tiko ra wena, ni le swibyeni swa le xitangeni. ₄Mintlambya yi ta tlula yi tshama ehenhla ka wena, ni le henhla ka vanhu va wena, ni le henhla ka malandza ya wena hinkwawo.’ ”

₅Kutani HOSI Xikwembu xi ku ka Muxe: “Lerisa Aroni leswaku a teka nhonga ya yena hi voko, a yi tlakusela ehenhla ka milambu, ni le henhla ka tindlela ta mati, ni le henhla ka maqhivi, a vangela tiko ra Egipta khombo ra mintlambya.”

₆Hiloko Aroni a tlakusela voko ra yena ehenhla ka mati ya Egipta, kutani mintlambya yi huma yi tata tiko hinkwaro. ₇Kambe vangoma na vona va endlisa sweswo hi migilo-gilo ya vona, va vanga mintlambya etikweni ra Egipta.

₈Kutani Faro a vitana Muxe na Aroni, a ku ka vona: “Khongelani mi kombela HOSI Xikwembu leswaku xi susa mintlambya laha ka mina, ni le ka vanhu va mina; hi kona ndzi nga ta tshika vanhu, va famba va ya humesela HOSI Xikwembu emagandzelo.” ₉Muxe a hlamula a ku: “Swi le ka wena ku lerisa nkarhi lowu ndzi nga ta khongela ha wona, ndzi mi kombelela, wena ni malandza ya wena ni vanhu va wena, leswaku mintlambya yi susiwa eka wena, ni le tindlwini ta wena, yi sala enambyeni ntsena.” ₁₀Kutani Faro a ku: “Mundzuku!” Muxe a ku: “Swi ta va hilaha u vulaka hakona, u ta tiva leswaku ku hava loyi a fanaka na HOSI Xikwembu xa hina. ₁₁Mintlambya yi ta suka eka wena ni le tindlwini ta wena ni le ka malandza ya wena ni ka vanhu va wena; yi ta sala enambyeni ntsena.” ₁₂Hiloko Muxe na Aroni va suka va huma eka Faro; Muxe a huwelela eka HOSI Xikwembu hi tlhelo ra mintlambya leyi xi yi vangeleke Faro.

₁₃HOSI Xikwembu xi endla hilaha Muxe a kombeleke hakona: Mintlambya yi fa etindlwini, ni le swivaveni, ni le masin'wini, ₁₄kutani Vaegipta va yi hlengeleta hi tinhulu, tiko hinkwaro ri nun'hwa hi yona. ₁₅Kambe loko Faro a kuma nkarhi wo hefemula, a tlhela a tinonon'hwisa, a nga yingisi Muxe na Aroni, hilaha HOSI Xikwembu a xi vurile hakona.

₁₆Kutani HOSI Xikwembu xi ku ka Muxe: “Lerisa Aroni leswaku a tlakusa nhonga ya yena, a ba hansi leswaku ritshuri ri hundzuka tinhwala etikweni hinkwaro ra Egipta.” ₁₇Kutani va endlisa sweswo: Aroni a tlakusa voko, a ba hansi hi nhonga, kutani ku huma tinhwala, ti pomela vanhu ni swifuwo swa vona, ritshuri hinkwaro ri hundzuka tinhwala, ematlhelweni hinkwawo ya tiko ra Egipta. ₁₈Kwalaho vangoma va ringeta ku vanga tinhwala hi migilo-gilo ya vona, kambe va tsandzeka. Tinhwala a ti tele ehenhla ka vanhu ni swifuwo. ₁₉Kutani vangoma va ku ka Faro: “Lowu i ntirho wa Xikwembu!” Kambe Faro a tinonon'hwisa, a nga yingisi Muxe na Aroni, hilaha HOSI Xikwembu a xi vurile hakona.

₂₀Kutani HOSI Xikwembu xi ku ka Muxe: “Pfuka nimpundzu swinene, u ya sivelela Faro loko a huma a ya enambyeni, u n'wi byela leswaku mina HOSI Xikwembu ndzi vurisa sweswo, ndzi ri: ‘Tshika vanhu va mina va famba va ya ndzi humesela magandzelo. ₂₁Loko u nga lavi ku tshika vanhu va mina va famba, u ta swi vona! Ndzi ta ku rhumela mabawa, wena ni malandza ya wena ni vanhu va wena, ma nghena ni le tindlwini ta wena; mabawa ma ta tala etindlwini ta vanhu va Egipta, ma funengeta ni misava leyi va akeke ka yona. ₂₂Kambe hi siku ra kona, ndzi ta hlawula muganga wa le Goxeni, laha vanhu va mina va tshamaka kona; a ku nga vi na mabawa kona, u ta kala u swi tiva wena Faro leswaku hi mina ndzi nga HOSI laha misaveni. ₂₃Hikokwalaho, ndzi ta kutsula vanhu va mina ndzi va hambanisa ni vanhu va wena. Xikombiso lexi xi ta humelela mundzuku.’ ” ₂₄Kutani HOSI Xikwembu xi endlisa sweswo: Xi rhumela papa lerikulu ra mabawa emutini wa Faro ni le mitini ya malandza ya yena, tiko hinkwaro ra Egipta ri xanisiwa hi mabawa lawa.

₂₅Kutani Faro a vitana Muxe na Aroni, a ku ka vona: “Fambani mi ya humesela Xikwembu xa n'wina emagandzelo, kambe mi ri kwala tikweni leri.” ₂₆Muxe a hlamula a ku: “E-e, sweswo swi ta va swi hoxekile, hikuva hi ta humesela HOSI Xikwembu xa hina emagandzelo lama nga tshukaka ma khunguvanyisa Vaegipta. Loko hi tshuka hi humesa magandzelo lama yilaka emahlweni ka Vaegipta, xana a va nga hi khandli hi maribye va hi dlaya ke? ₂₇Hina hi fanele ku teka riendzo ra masiku manharhu, hi ya emananga hi ya humesela HOSI Xikwembu xa hina emagandzelo lawa xi nga ta hi lerisa wona.”

₂₈Kutani Faro a hlamula a ku: “Ndzi ta mi tshika mi famba mi ya humesela HOSI Xikwembu xa n'wina emagandzelo emananga, ntsena mi nga yi kule ngopfu. Ndzi khongeleleni!” ₂₉Kutani Muxe a ku: “Vona, sweswi ndzi humaka laha ka wena, ndzi ta khongela HOSI Xikwembu leswaku mundzuku mabawa ma suka laha ka wena Faro, ma suka ni le ka malandza ya wena ni le ka vanhu va wena; ntsena u nga ha engeti u tlanga hi hina, hi ku sivela vanhu va hina ku ya humesela HOSI Xikwembu emagandzelo.” ₃₀Kavaloko Muxe a huma eka Faro, a ya khongela HOSI Xikwembu. ₃₁Kutani HOSI Xikwembu xi endla hilaha Muxe a kombeleke hakona: Xi susa mabawa eka Faro, ni le ka malandza ya yena, ni le ka vanhu va yena, ku nga sali na rin'we ra wona. ₃₂Kambe Faro a tlhela a tinonon'hwisa, a nga va tshiki vanhu leswaku va famba.