Estere 4

₁Loko Mordekayi a twa hinkwaswo leswi endliweke, a handzulela swiambalo swa yena, a ambala swiambalo swo khwaxa, a ticheletela nkuma, a famba exikarhi ka muti a ri karhi a ba huwa a rila hi xiviti, ₂a fika a yima enyangweni ya huvo ya hosi, hikuva munhu loyi a ambaleke swiambalo swo khwaxa a a nga pfumeleriwi ku nghena ehosini. ₃Eswifundzheni hinkwaswo, lomu nawu wa hosi ni xileriso xa yona swi fikeke kona, ku va ni swirilo leswikulu exikarhi ka Vayuda, va titsona swakudya, va rila, va vovola, lavo tala va etlela ehenhla ka swiambalo leswo khwaxa ni le nkumeni.

₄Loko vanhwana ni vatsheniwa lava tirhelaka Estere va ta va ta n'wi byela timhaka leti, ti n'wi tlhava mbilu swinene, kutani a rhumela Mordekayi swiambalo leswinene leswaku a ta ambala swona, a hluvula leswi swo khwaxa; kambe Mordekayi a nga amukelanga swiambalo leswi. ₅Kutani Estere a vitana Hataki, un'wana wa vatsheniwa va hosi lava a va vekiwile ku n'wi tirhela, a n'wi rhuma ku ya eka Mordekayi a ya kambisisa leswaku i mhaka muni leyi humelelaka ni leswaku yi vangiwa hi yini? ₆Kutani Hataki a ya eka Mordekayi, erivaleni ra muti leri langutaneke ni nyangwa ya huvo ya hosi; ₇kutani Mordekayi a byela Hataki timhaka hinkwato leti ti n'wi humeleleke, a tlhela a n'wi byela ni ntsengo wa mali leyi Hamani a tshembiseke ku yi nghenisa evuhlayiselweni bya xuma xa hosi, leswaku Vayuda va dlawa va hela. ₈Mordekayi a n'wi nyika ni tsalwa ra nawu lowu humesiweke eXuxani, lowu lerisaka leswaku Vayuda va herisiwa, leswaku Hataki a ta ri komba Estere, a n'wi hlamusela rona, ni ku n'wi rhuma ku ya rila eka hosi, a yi khongotela leswaku yi tsetselela vanhu va rixaka ra ka vona. ₉Kutani Hataki a ya byela Estere marito ya Mordekayi. ₁₀Estere a lerisa Hataki ku ya byela Mordekayi, a ku: ₁₁“Malandza ya hosi hinkwawo ni vanhu va swifundzha swa yona hinkwaswo va swi tiva leswaku loko wanuna kumbe wansati a nga tshuka a nghena exivaveni xa le ndzeni ka muti wa hosi, a nga vitaniwanga, ku ni nawu wun'we ntsena: Ú fanele ku dlayiwa, ehandle ka loko hosi yi tlakusa nhonga ya yona ya nsuku, yi n'wi komba leswaku a hanya. Sweswi ku hundzile masiku ya 30 hosi yi nga si ndzi vitana.” ₁₂Kutani va ya byela Mordekayi leswi Estere a swi vuleke.

₁₃Mordekayi a va rhuma ku tlherisela Estere nhlamulo leyi nge: “U nga ehleketi leswaku loko u ri entsindza, u hlayisekile ku tlula Vayuda lavan'wana hinkwavo, ₁₄hikuva loko u miyela hi nkarhi wo kota lowu, ku ntshunxeka ni ku ponisiwa ka Vayuda ku ta ta ku huma kun'wana, kambe wena ni varikwenu mi ta lova. Nakona swi tiviwa hi mani, kumbexana u tele nkarhi wo kota lowu kwala vuhosini?” ₁₅Estere a va byela ku ya hlamula Mordekayi, va ku: ₁₆“Yana u ya hlengeleta Vayuda hinkwavo lava nga Xuxani, kutani mi titsona swakudya masiku manharhu mi ndzi khongelela, mi nga dyi nchumu mi nga nwi nchumu vusiku ni nhlekanhi. Mina ni malandza ya mina ya xisati, na hina hi ta titsona swakudya. Endzhaku ka sweswo ndzi ta ya eka hosi, hambileswi nawu wu alaka. Loko swi vula ku fa, ndzi ta fa.” ₁₇Kavaloko Mordekayi a famba a ya endla hinkwaswo leswi Estere a n'wi leriseke swona.