Estere (Xigriki) D

₈ Kutani Mordekayi a khongela, a ri karhi a tsundzuka mintirho hinkwayo ya Hosi, a ku: ₉ “We HOSI Xikwembu, Mufumi wa swilo hinkwaswo, swilo hinkwaswo swi le mavokweni ya wena, naswona ku hava loyi a nga ku kanetaka loko ku ri ku rhandza ka wena ku ponisa Vaisraele. ₁₀ Hikuva u endlile tilo ni misava ni swihlamariso hinkwaswo ehansi ka tilo. ₁₁ U N'wini wa hinkwaswo, kutani a nga kona loyi a nga kanetaka wena HOSI. ₁₂ U tiva hinkwaswo; wa swi tiva we HOSI, leswaku loko ndzi arile ku korhama emahlweni ka mutikukumuxi loyi Hamani, a ndzi swi endlanga hi ku titshemba, kumbe hi ku tikurisa, kumbe hi ku rhandza ku dzunisiwa. ₁₃ Ntsena a ndzi pfumelanga ku ntswontswa mikondzo ya yena leswaku Vaisraele va pona! ₁₄ Kutani leswi ndzi swi endleke, ndzi swi endlile leswaku ndzi nga dzunisi munhu ku tlula wena Xikwembu. Ndzi nga ka ndzi nga korhameli munhu ni un'we handle ka wena, wena HOSI yanga! Naswona ndzi nga ka ndzi nga endli nchumu hi ku tikukumuxa.

₁₅ “Sweswi ke, we HOSI, Xikwembu ni Mufumi, wena Xikwembu xa Abrahama, ponisa vanhu va wena, hikuva mahlo ya valala va hina ma le henhla ka hina ku hi kayelela, va lava ku herisa vanhu lava va nga va wena ka ha ri eku sunguleni. ₁₆ U nga fularheli vanhu va wena lava u tikutsuleleke vona etikweni ra Egipta. ₁₇ Yingisa xikhongelo xa mina, tsetselela vanhu va wena, hundzula nkosi wa hina wu va nkhuvo, leswaku hi ta hanya hi yimbelela hi dzunisa vito ra wena, we HOSI; u nga miyeti lava va ku dzunisaka.”

₁₈ Hiloko Vaisraele hinkwavo va huwelela hi matimba, hikuva rifu a ri va kongomile.