Estere (Xigriki) C

₁Lawa i marito ya papila ra kona: “Mina hosi leyikulu Ahasuwerusi, ndzi tsalela vayimeri va vuhosi ni tindhuna ta kona eka swifundzha swa 127, ku sukela le Indiya ku ya fika le Etiyopiya, ndzi ri:

₂“Hambileswi ndzi nga endliwa mufumi wa matiko yo tala ni n'wini wa misava hinkwayo, a ndzi tikukumuxi hikwalaho ka vuhosi lebyi bya mina, kambe ndzi tirha hi ku twisisa ni tintswalo. Kutani ndzi tiyimiserile ku tisa ku rhula evutomini bya vanhu va mina leswaku va va ni ku tshamiseka ematikweni ya mina, va kota ku famba-famba hinkwako eswifundzheni swa kona. Hi ndlela leyi ndzi lava ku pfuxeta ku rhula loku vanhu hinkwavo va ku lavaka.

₃“Ndzi vutisile vatsundzuxi va mina leswaku xana leswi swi nga hetiseka hi ndlela yihi, kutani hi pfuniwile ngopfu hi Hamani. Wanuna loyi wa hi tlula hinkwerhu hi vutlhari, ú tiveka swinene hi ku tinyiketa ka yena ni ku tshembeka ka yena loku tiyeke. Hi yena ndhunankulu emfun'weni wa mina. ₄Kutani Hamani ú hi kombisile leswaku ku ni vanhu va rixaka rin'wana lava tlholokeleke exikarhi ka matiko hinkwawo emisaveni lava rhandzaka madzolonga; mikhuva ya vona yi hambanile ni mikhuva ya vanhu van'wana. Minkarhi hinkwayo va tlula milawu ya tihosi, lero vun'we bya mfumo lebyi hi byi lavaka byi nge vi kona.

₅“Hi twa leswaku vanhu lava va lunya va kokela etlhelo minkarhi hinkwayo, va tihanyela vutomi bya vona lebyi hambukeke, va ni mahanyelo ya vona va ri voxe. Mfumo wa mina, a va wu tsakeli. Hi tindlela ta vona leto biha, va ringeta hi matimba ku pfilunganya matiko ya hina leswaku ma nga tshuki ma kuma ku tshamiseka. ₆Hikokwalaho hi lerisa ku dlayiwa ka vanhu lava va vuriweke emapapileni ya Hamani, a nga mufambisi wa timhaka ta mfumo ni tata wa hina wa vumbirhi. Va ta herisiwa hi matlhari ya hina valala va vona, handle ko tsetseleriwa kumbe ku tweriwa vusiwana vona ni vasati va vona ni vana. Siku ra kona ri ta va ra 14 ra n'hweti ya vu-12 nan'waka, yi nga n'hweti ya Adara. ₇Vanhu lava ku nga khale va sihalala naswona va yaka emahlweni ni ku sihalala, va ta susumeteriwa hi siku rin'we exivandleni xa vafi, leswaku mfumo wa mina wu ta sala wu hlayisekile, naswona wu nga karhatiwi hi nchumu”.