Vayuda va herisa valala va vona
1Hi siku ra vu-13 ra n'hweti ya vu-12 ya Adara, ri nga siku leri xileriso ni nawu wa hosi a swi fanele ku va swi hetiseka, rona siku leri valala va Vayuda a va languterile ku va hlula ha rona, ri hundzuka siku leri Vayuda va hluleke valala va vona ha rona. 2Vayuda va hlengeletana emigangeni ya vona, emitini hinkwayo ya swifundzha swa hosi Ahasuwerusi, leswaku va ta dlaya vanhu hinkwavo lava a va navela ku va twisa ku vava. A ku vanga na un'we loyi a nga tiyela Vayuda, hikuva tinxaka hinkwato ta vanhu a ti va chava swinene. 3Tihosana hinkwato ta swifundzha, ni vayimeri va vuhosi eswifundzheni, ni vafambisi va swona, ni lava tirhaka entsindza, va yima ni Vayuda hikwalaho ka ku chava Mordekayi. 4Wanuna loyi Mordekayi a a ri ni xiyimo xa le henhla emutini wa hosi, naswona ku twala ka yena a ku tiveka eswifundzheni hinkwaswo, hikuva matimba ya yena a ma ya ma kula. 5Kutani Vayuda va hlasela valala va vona hinkwavo hi fumu, va va dlaya, va va herisela makumu, va endla leswi va swi lavaka ha vona. 6Entsindza le Xuxani, Vayuda va dlaya ni ku herisa vavanuna va 500, 7va tlhela va dlaya na Parixana-Data, na Dalafoni, na Asipata, 8na Porata, na Adaliya, na Aridata, 9na Parimaxata, na Arisayi, na Aridayi, na Vhayezata. 10Vanhu lava va khume a va ri vana va nala wa Vayuda Hamani n'wana Hamedata; kambe Vayuda a va phanghanga swilo swa vona.
11Hi siku rero, hosi yi tivisiwa nhlayo ya lava dlayiweke entsindza le Xuxani. 12Kutani hosi yi byela nkosikazi Estere, yi ku: “EXuxani le ntsindza Vayuda va dlayile vavanuna va 500, ni vana va Hamani va khume. Xana, loko va endlisile leswi eXuxani, va ta va va endlile yini eswifundzheni leswin'wana swa mina ke! Sweswi ke, ndzi byele leswi u swi kombelaka, u ta swi kuma; ni leswi u swi lavaka, u ta nyikiwa swona.” 13Estere a ku: “Loko u nkhensa we n'wini wanga, pfumelela Vayuda lava va nga eXuxani leswaku mundzuku va ya emahlweni va endla leswi nawu wu va pfumeleleke ku swi endla namuntlha. Naswona lerisa leswaku mintsumbu ya vana va Hamani lava va khume yi hayekiwa etimhandzeni.” 14Kutani hosi yi lerisa leswaku swilo leswi swi endliwa; nawu wa kona wu vekiwa eXuxani, na yona mintsumbu ya vana va khume va Hamani yi hayekiwa. 15Vayuda lava a va ri eXuxani, va tlhela va hlengeletana hi siku ra vu-14 ra n'hweti ya Adara, kutani va dlaya vavanuna lava ringanaka 300, kambe va nga phanghi swilo swa vona.
16Vayuda lavan'wana lava a va ri eswifundzheni swa hosi, na vona va hlengeletanile leswaku va ta tilwela, va tilamulela emavokweni ya valala va vona, kutani va dlaya vanhu va 75 000 eka valala va vona, kambe va nga phanghi swilo swa vona. 17Leswi va swi endlile hi siku ra vu-13 ra n'hweti ya Adara; hi siku ra vu-14 va wisa, va endla siku rero ri va ra nkhuvo ni ra ku tsaka. 18Kambe Vayuda lava a va ri eXuxani va hlengeletanile hi siku ra vu-13 ni ra vu-14, kutani va wisa hi siku ra vu-15, ri va nkhuvo ni ra ku tsaka. 19Hikokwalaho, Vayuda lava akeke emitini ya le kule na ntsindza, le handle, va tekile siku ra vu-14 ra n'hweti ya Adara ri ri rona siku ra ku tsaka, ni ra nkhuvo ni ximusi, leri va nyikanaka ha rona tinyiko to hlawuleka.
Ta nkhuvo wa Purimi
20Kutani Mordekayi a tsala timhaka leti; a rhumela ni mapapila eka Vayuda hinkwavo lava akeke eswifundzheni swa hosi Ahasuwerusi hinkwaswo, swa le kule ni swa le kusuhi, 21a va lerisa leswaku va fanele ku tsundzuka siku ra vu-14 ra n'hweti ya Adara, ni siku ra vu-15 ra yona n'hweti yaleyo, lembe rin'wana ni rin'wana, 22ma ri masiku lawa Vayuda va nga tilamulela eka valala va vona ha wona; va tsundzuka ni n'hweti leyi, yi ri leyi mahlomulo ni swirilo swa vona swi hundzukeke ntsako ni ku wisa ha yona; va lerisiwa ku teka masiku lawa ma va ya nkhuvo ni ku tsaka, ni ya ku rhumelana tinyiko to hlawuleka, ni ku rhumela swisiwana tinyiko. 23Kutani Vayuda va tiboha ku ya emahlweni ni leswi a va swi sungurile, va endla ni leswi Mordekayi a a va lerisile swona hi mapapila.
24Hamani loyi wa Muagaga nala wa Vayuda n'wana Hamedata, a a endlile makungu ya ku herisa Vayuda. Nakona a a hoxile vuhlolotwana lebyi vuriwaka “Puru”, a hlahluva leswaku a ta va dlaya, a va herisela makumu; 25kambe loko Estere a yile eka hosi, yi humesile xileriso lexi tsariweke, leswaku makungu lawa yo biha lawa Hamani a a ma endlerile Vayuda, ma tlhela ma vangela yena n'wini wa wona ekhombo, ni leswaku yena Hamani ni vana va yena va hayekiwa etimhandzeni. 26Kutani va thya masiku walawo vito ra “Purimi”, hi mhaka ya rito ra “Puru”. Kutani hikwalaho ka leswi a swi tsariwile epapileni leri, ni hikwalaho ka leswi a va swi vonile ni ku humeleriwa hi swona emhakeni leyi, 27Vayuda va tiboha leswaku vona ni vatukulu va vona swin'we ni vanhu lava va nga ta amukeriwa exikarhi ka vona, a va nga tsandzeki ku hlayisa masiku lawa mambirhi, hilaha swi tsariweke hakona, naswona hi nkarhi lowu vekiweke wa lembe rin'wana ni rin'wana, 28va tiboha ku tsundzuka ni ku hlayisa masiku walawo eminkarhini hinkwayo, emindyangwini ya vona hinkwayo, ni le swifundzheni hinkwaswo, ni le mitini hinkwayo. Nakona masiku lawa ya Purimi ma nga tshuki ma rivariwa hi Vayuda; hambi va ri vatukulu va vona va nga tshuki va rivala ku ma tlangela.
29Kutani Estere N'wa-Abihayili, na Mordekayi loyi wa Muyuda, va lerisa hi ku tsala, va tiyisa nawu lowu wa vumbirhi wa Purimi. 30Vayuda hinkwavo lava a va ri eswifundzheni swa 127 swa hosi Ahasuwerusi, va rhumeriwa mapapila lama kombaka ku rhula ni ku hlayiseka, 31va lerisiwa ku tsundzuka masiku lawa ya Purimi hi minkarhi ya wona, hilaha Mordekayi loyi wa Muyuda ni nkosikazi Estere va leriseke Vayuda hakona, va ma hlayisa ku fana ni masiku ya ku titsona swakudya ni ya swirilo lawa va tivekeleke wona, vona ni vatukulu va vona. 32Kutani swileriso swa nkosikazi Estere leswi tiyisaka maendlele lawa ya nkhuvo wa Purimi, swi tsariwa ebukwini.
