Xikhongelo xa Estere
1Kutani nkosikazi Estere, hi gome ra ku fa, a tsutsumela eka HOSI Xikwembu. 2A hluvula swiambalo swa yena leswo saseka, kutani a ambala swa nhlomulo ni nkosi. Ematshan'wini ya mafurha layo nun'hwela yo durha, a tota nhloko ya yena hi nkuma ni vulongo, a titshika hakunene, a tshika ni misisi ya yena yi mpfhumpfharile. 3Kutani a khongela eka HOSI Xikwembu xa Israele a ku: “We HOSI yanga, hi wena ntsena u nga N'wini wa mina. Ndzi pfune mina la nga yexe, ndzi nga hava mupfuni handle ka wena, 4hikuva ndzi le khombyeni! 5Ku sukela evuhlangini bya mina ndzi dyondzile endyangwini wa ka hina leswaku wena HOSI, u hlawurile Vaisraele exikarhi ka matiko hinkwawo, ni vatata wa hina exikarhi ka vakokwa wa vona hinkwavo, leswaku va va vanhu va wena hilaha ku nga heriki. Naswona u va endlerile hinkwaswo leswi u va tshembiseke swona.
6“Sweswi hi ku dyoherile, kutani u hi nyiketile emavokweni ya valala va hina, 7hikuva hi twarisile swikwembu swa vona. U lulamile we HOSI! 8Sweswi a va enerisiwi hi leswi hi nga evuhlongeni lebyo vavisa, kambe va tibohile eka swikwembu swa vona 9ku herisa leswi u swi vuleke ni ku dlaya vanhu va wena. Va lava ku miyeta lava va ku dzunisaka, va herisa alitari ya wena ni ku dzuneka ka yindlu ya wena.
10“Va navela ku pfula milomu ya vamatiko leswaku va dzunisa swikwembu swa hava ni ku twarisa mufumi wa ku fa hilaha ku nga heriki. 11We HOSI, u nga tshuki u nyiketa nhonga ya wena ya vuhosi eka leswi swi nga hanyiki. U nga tshiki vamatiko va hi hlekula eku herisiweni ka hina, kambe tlherisela makungu ya vona eka vona vini, kutani u endla xikombiso hi wanuna loyi a sunguleke mhaka leyi yo hi pfukela.
12“Hi tsundzuke we HOSI, u tikomba hi nkarhi wa mahlomulo ya hina. Ndzi nyike ntamu we Hosi ya swikwembu ni N'wini wa matiko hinkwawo! 13Nghenisa enon'wini wa mina marito lama khorwisaka loko ndzi ri emahlweni ka hosi Ahasuwerusi, nghala yo chavisa, u hundzula mbilu ya yena leswaku a venga wanuna loyi a lwaka na hina, leswaku yena ni lava yimaka na yena va herisiwa. 14Hi ponise hi voko ra wena, kutani u ndzi pfuna, mina la nga yexe no pfumala mupfuni handle ka wena, we HOSI.
15“Wena u tiva hinkwaswo. Wa swi tiva leswaku ndzi venga ku dzuneka ka lavo homboloka, ndzi nyenya ni byetlelo bya la nga yimbangiki ni bya un'wana ni un'wana wa vanhu va le handle. 16U tiva xiyimo xa mina. A ndzi tsakisiwi hi harhi ya vunkosikazi bya mina leyi ndzi bohekaka ku yi ambala enhlokweni loko ndzi humelela erivaleni. Harhi leyi, ndza yi nyenya tanihi xitlakati lexi nga ni ngati ya tin'hweti, kutani a ndzi yi ambali emasikwini ya ku wisa ka mina. 17Mina nandza wa wena a ndzi si tshama ndzi dya nchumu etafuleni ra Hamani, naswona a ndzi si dya nkhuvo wa hosi kumbe ku nwa vhinyo ya timhamba. 18Mina nandza wa wena a ndzi si tshama ndzi va ni ntsako ku sukela siku leri ndzi nga tisiwa ha rona ku fikela sweswi, ehandle ka ku tsakela wena we HOSI, Xikwembu xa Abrahama.
19“We Xikwembu, wena la nga ni matimba ehenhla ka hinkwaswo, yingisa rito ra hina Vaisraele hi helaka mbilu, kutani u hi ponisa emavokweni ya lavo homboloka. Na mina, u ndzi ponisa eku chaveni!”
