Estere (Xigriki) A

₂Hi lembe ra vumbirhi ra ku fuma ka Ahasuwerusi lonkulu, hi siku ro sungula ra n'hweti ya Nisani, Mordekayi n'wana Yayiri, wa Ximeyi, wa Kixi, wa nyimba ya ka Benjamini, ú vile ni norho. ₃Mordekayi a a ri Muyuda, a a tshama emutini wa Xuxani. A a ri wa xiyimo xa le henhla, a a tirhela hosi Ahasuwerusi ehubyeni ya yena. ₄A a ri un'wana wa vabohiwa lava Nebukadnetsara hosi ya Babilona a vuyeke na vona hi le Yerusalema swin'we na Yekoniya hosi ya Yuda. Norho wa yena hi lowu.

₅Ú lorhile a twa pongo ni mpfilumpfilu emisaveni, ni ku dzindza ni ku ninginika ka misava, ni nkitsikitsi. ₆Kutani ku humelela tidragona timbirhi leti a ti tilulamisele ku lwa, ti bonga hi ndlela leyo chavisa. ₇Ku bonga ka tona ku endla leswaku tiko rin'wana ni rin'wana ri tilulamisela nyimpi yo ya hlasela tiko ra vanhu lavo lulama. ₈Kwalaho ku va ni ku phumela ni munyama, maxangu ni mahlomulo, ku xaniseka ni nkitsikitsi lowukulu emisaveni. ₉Tiko hinkwaro ra lavo lulama a ri ri eku xanisekeni, vanhu va kona va chavisiwa hi vubihi lebyi a byi va kongomile, va tilulamisele ku herisiwa. ₁₀Kavaloko va huwelela eka Xikwembu, kutani eku huweleleni ka vona, ku humelela xinambyana lexi hundzukeke nambu lowukulu wa mati layo tala. ₁₁Ku va ni ku vonakala, dyambu ri tlhava; kutani lavo titsongahata va tlakusiwa, va herisa lavo tikurisa.

₁₂Mordekayi ú vonile swilo leswi hinkwaswo enorhweni, swi nga leswi Xikwembu a xi tiyimiserile ku swi endla. Loko a sisimuka a swi ehleketa minkarhi hinkwayo, a ringeta ku swi twisisa swinene-nene.