Vaefesa 3

₁Hikokwalaho, mina Pawulo ndza mi khongelela n'wina vamatiko, ndzi ri mubohiwa hi mhaka ya ku tirhela Kriste. ₂Mi ta va mi twile hilaha Xikwembu, hi tintswalo ta xona, xi ndzi nyikeke ntirho lowu leswaku ndzi mi pfuna, ₃hikuva xi hlavuterile xihundla xa makungu ya xona eka mina, xi ndzi tivisa xona. Ndzi tsarile mhaka leyi hi ku komisa, ₄kutani loko mi hlaya leswi ndzi swi tsaleke, mi nga vona hilaha ndzi twisisaka xihundla xa Kriste hakona. ₅Eminkarhini leyi hundzeke, vanhu a va byeriwanga xihundla xexo hi ndlela leyi Moya wu nga xi hlavutela ha yona sweswi, eka vaapostola va Xikwembu lavo hlawuleka ni ka vaprofeta. ₆Xihundla hi lexi: Hi mhaka ya Evhangeli, vamatiko va averiwa ndzhaka yin'we na hina Vayuda, va endla swirho swin'we na hina emirini wun'we, naswona va averiwa xitshembiso xin'we na hina eka Kriste Yesu. ₇Ndzi nyikiwile ku va nandza wa Evhangeli leyi hi tintswalo ta Xikwembu, leti ndzi ti kumeke hi matimba ya xona lama tirheke eka mina. ₈Mina ndzi nga lontsongo ngopfu eka vahlawuriwa va Xikwembu hinkwavo, ndzi nyikiwile nkateko lowu wa ku fikisa eka vamatiko mahungu lamanene ya rifuwo leri nga hlayekiki ra Kriste, ₉ni ku endla leswaku vanhu hinkwavo va tiva hilaha xihundla xa makungu ya Xikwembu xi endlekaka hakona. Xikwembu, lexi nga mutumbuluxi wa hinkwaswo, xi fihlile xihundla lexi eminkarhini hinkwayo leyi hundzeke, ₁₀leswaku eminkarhini ya sweswi, hi ku tirhisa kereke, xi ta tivisa vutlhari bya xona hi matlhelo hinkwawo ya byona eka mimoya ya vundhuna ni ya matimba ehenhla matilweni. ₁₁Xikwembu xi endlile leswi hi ku landza ku tilulamisela ka xona ka khale, loku xi ku hetisiseke ha Kriste Yesu, Hosi ya hina. ₁₂Hi ku hlangana na yena, ni ku pfumela eka yena, hi ntshunxekile ku ta emahlweni ka Xikwembu hi nga ri na ku kanakana. ₁₃Hikokwalaho ndza kombela ndzi ri: Mi nga heli timbilu loko mi vona leswaku ndzi xaniseka hikwalaho ka n'wina; hinkwaswo leswi swi pfuna n'wina.

₁₄Hikwalaho ka sweswo, ndzi nkhinsama hi matsolo emahlweni ka Tatana, ₁₅loyi ndyangu wun'wana ni wun'wana, ematilweni ni la misaveni, wu vuriwaka “wa tatana” hikwalaho ka yena. ₁₆Ndzi kombela Xikwembu leswaku entalweni wa ku dzuneka ka xona, xi mi nyika matimba, hi Moya wa xona, ku tiya emunhwini wa n'wina wa le ndzeni, ₁₇ni leswaku Kriste a aka etimbilwini ta n'wina hi ku pfumela. Ndzi khongela leswaku mi mila timitsu erirhandzwini ni ku veka masungulo ya n'wina ehenhla ka rona, ₁₈ni leswaku, swin'we ni vahlawuriwa hinkwavo va Xikwembu, mi kuma matimba ya ku twisisa ku anama, ni ku leha, ni ku tlakuka, ni ku enta ka rirhandzu ra Kriste. ₁₉Mawaku loko ingi mi nga tiva rirhandzu ra yena, hambiloko swi nga endleki ku ri tiva hi ku hetiseka; kutani, matlhelo hinkwawo, mi ta tala hi vukona hinkwabyo bya Xikwembu.

₂₀Eka yena loyi a kotaka ku endla, hi matimba lama tirhaka eka hina, ku tlula ngopfu swinene hinkwaswo leswi hi nga swi kombelaka, kumbe leswi hi nga swi ehleketaka, ₂₁eka yena a ku ve ku dzuneka ekerekeni ni ka Kriste Yesu, hi minkarhi ni minkarhi hilaha ku nga heriki. Amen!